ភ្នំពេញ៖ ស្រូវជាច្រើនពាន់តោន ត្រូវបាននាំចេញទៅលក់នៅប្រទេសវៀតណាម ដោយឈ្មួញមកពីបណ្តាខេត្តនានា បាននឹងកំពុងសម្រុកនាំចេញ ក្នុងមួយថ្ងៃ ទៅប្រទេសវៀតណាម តាមច្រកតន់ហន់ នៃស្រុកកំពង់ត្រាច ខេត្តកំពត បណ្តាលឲ្យមានការស្ទះរថយន្តចតជាជួរនៅលើដងផ្លូវរាប់គីឡូម៉ែត្រ។
ការសម្រុកនាំស្រូវចេញទៅប្រទេសវៀតណាមនេះ ឯកឧត្តម នុត ច័ន្ទសុខា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ដែលបានចុះទៅពិនិត្យផ្ទាល់ បានឱ្យដឹងថា ការផលិតនិងការនាំស្រូវចេញទៅវៀតណាមតាមច្រកតន់ហន់នេះ គឺជាជ្រុងមួយ បង្ហាញពីភាពខ្លាំងរបស់កម្ពុជា មិនត្រឹមតែអាចផលិត និងផ្គត់ផ្គង់តម្រូវការក្នុងស្រុកបានទេ ប៉ុន្តែថែមទាំងអាចនាំចេញទៅលក់ក្នុងតម្លៃសមរម្យទៅប្រទេសវៀតណាមទៀតផង។ ជាមួយគ្នានេះ ឯកឧត្តម បានស្នើដល់ឈ្មួញទាំងអស់ ត្រូវប្រុងប្រយ័ត្នការពារខ្លួនពីជំងឺឆ្លងកូវីដ១៩ និងសូមមានអាធ្យាស្រ័យខ្ពស់ ចំពោះការយឺតយ៉ាវក្នុងការនាំស្រូវទៅលក់នៅច្រកតន់ហន់នេះ។
បើយោងតាមលោក ចាន់ រិទ្ធ ដែលជាប្រធានមន្ទីរកសិកម្ម រក្ខាប្រមាញ់ និងនេសាទខេត្តកំពត បានឲ្យដឹងថា ក្នុងមួយថ្ងៃស្រូវចម្រុះ ត្រូវបាននាំចេញតាមច្រកតន់ហន់នេះ ក្នុងរង្វង់២ពាន់តោន។ លោក ចាន់ រិទ្ធ បន្តថា នៅរដូវប្រមូលផល ការនាំស្រូវចេញទៅលក់នៅប្រទេសវៀតណាមតាមច្រកតន់ហន់នេះ មានការហក់ឡើងខ្ពស់ ជាងពេលធម្មតា។
លោក បានគូសបញ្ជាក់ថា មូលហេតុដែលឈ្មួញយកស្រូវមកលក់នៅច្រកនេះ ព្រោះតម្លៃស្រូវមានទីផ្សារល្អជាងកន្លែងផ្សេងៗ គឺចន្លោះពី១១០០រៀល ទៅ១២០០រៀល ក្នុងមួយគឺឡូក្រាម។
គួរបញ្ជាក់ថា បើតាមក្រសួងកសិកម្ម រុក្ខាប្រមាញ់ និងនេសាទ ការនាំស្រូវចេញពីប្រទេសកម្ពុជា ទៅកាន់ប្រទេសវៀតណាម នៅតាមច្រកសំខាន់ៗ តាមបណ្តាខេត្តជាប់ព្រំប្រទល់ដែនកម្ពុជា បើគិតត្រឹមដើម ខែវិច្ឆិកា ឆ្នាំ២០២០នេះ មានចំនួនជាង ១លាន ៥សែនតោន៕
ដោយ៖CEN
