ភ្នំពេញ សហរដ្ឋអាមេរិកផ្ដល់ទឹកប្រាក់ប្រមាណ១៥លានដុល្លារដល់វិស័យកសិកម្មកម្ពុជាហើយគម្រោងនេះនឹងដាក់ឲ្យដំណើរការឆាប់ៗនេះនៅតាមបណ្តាខេត្តមួយចំនួនដូចជា៖ សៀមរាប បាត់ដំបង កំពង់ធំ និងពោធិ៍សាត់។
បើតាមការផ្សព្វផ្សាយព័ត៌មានរបស់ស្ថានទូតអាមេរិក និងអង្គការ USAIDប្រចាំនៅកម្ពុជា បានបង្ហាញថា គ្រោងនេះផ្ដល់ តាមរយៈភាពជាដៃគូរវាងអាជ្ញាធរឥណទានអភិវឌ្ឍន៍ (DCA) របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ រួមជាមួយនឹងវិទ្យាស្ថានមីក្រូហិរញ្ញវត្ថុAMK វិទ្យាស្ថានLOLC (Cambodia) Plc វិទ្យាស្ថានសេវាហិរញ្ញវត្ថុ RMA Financial Services (Cambodia) ។ កម្មវិធីដែលមានរយៈពេល៧ឆ្នាំនេះសំដៅដោះស្រាយកង្វះហិរញ្ញវត្ថុសម្រាប់វិស័យដ៏មានសារៈសំខាន់នេះនាពេលបច្ចុប្បន្ន។
តាមរយៈគម្រោងភាពជាដៃគូនេះឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាលសហរដ្ឋអាមេរិកក្នុងការបង្កើនភាពដែលអាចទទួលបាននូវហិរញ្ញវត្ថុក្នុងប្រទេសកម្ពុជា ដែលជាផ្នែកមួយដ៏សំខាន់ក្នុងការ ធ្វើឲ្យប្រសើរឡើងនូវផលិតភាពលើក
កម្ពស់កំណើនសេដ្ឋកិច្ចកម្ពុជា។
លោកស្រី ផលី ដាន់ហ្វ៊ត (Polly Dunford) នាយិកាបេសកកម្មនៃទីភ្នាក់ងារ USAID ប្រចាំ នៅកម្ពុជា មានប្រសាសន៍ថា៖ “យើងមានមោទនភាពក្នុងការផ្តល់ឥណទានដល់វិស័យឯកជន ដែលកំពុងបម្រើការលើវិស័យកសិកម្មនៅកម្ពុជាដែលមានប្រជាជន ៧០%នៃប្រជាជនសរុបរស់នៅ ពឹងផ្អែកលើវិស័យនេះ”។ លោកស្រីបានមាន ប្រសាសន៍បន្ថែមថា៖ “យើងមានការជឿជាក់ថាការ បង្កើនឥណទានក្នុងវិស័យកសិកម្ម នឹងគាំទ្រយ៉ាង សម្បើមដល់កំណើនសេដ្ឋកិច្ចរបស់ប្រទេសកម្ពុជា ព្រមទាំងផ្តល់ផលវិជ្ជមានដល់ប្រជាជនកម្ពុជាទាំងមូល មិនថានៅតាមទីជនបទ ឬទីប្រជុំជននោះទេ”។
អាជ្ញាធរឥណទានអភិវឌ្ឍន៍ (DCA) របស់ទីភ្នាក់ងារ USAID ធ្វើការ ជាមួយវិនិយោគិន ស្ថាប័ន ហិរញ្ញវត្ថុក្នុងស្រុក និងអង្គការអភិវឌ្ឍនានា ដើម្បីរចនានិងផ្តល់នូវជម្រើសនានាសម្រាប់ការវិនិយោគ ក្នុងគោលដៅធ្វើឲ្យជីវភាពមានភាពប្រសើរឡើង។ បច្ចុប្បន្ននេះ អាជ្ញាធរឥណទាន អភិវឌ្ឍន៍ (DCA) បានជួយប្រមូលហិរញ្ញប្បទានចំនួន៤,៧ពាន់លានដុល្លារសហរដ្ឋអាមេរិកនៅក្នុងប្រទេសចំនួន៧៦៕ ដោយ៖កូឡាប