ភ្នំពេញ៖ ដោយសារតែភាពលំបាកក្នុងជីវិត បច្ចុប្បន្ន គេសង្កេតឃើញថា មានក្មេងៗជាច្រើនបានចេញដើរលក់របស់របរនៅតាមដងផ្លូវ ដើម្បីបានលុយចំណេញបន្តិចបន្តួច ជួយដោះស្រាយជីវភាពរបស់ឪពុកម្តាយ និងក៏ដូចសម្រាប់ការចំណាយទៅលើសិក្សារបស់ពួកគេផងដែរ។ រីឯក្មេងៗដទៃទៀត ក៏បានជ្រើសយកជម្រើសដើរសុំទានអ្នកដំណើរ ដើម្បីគ្រាន់បានលុយកាក់បន្តិចបន្តួច សម្រាប់អាហាររស់បានមួយពេលៗ ដោយសារតែឪពុកម្តាយគ្មានលទ្ធភាពក្នុងការចិញ្ចឹមពួកគេ។
ប៉ុន្តែ សម្រាប់ក្មេងប្រុសជនជាតិហ្វីលីពីនម្នាក់នេះវិញ ពុំបានធ្វើដូច្នេះទេ គឺរូបគេដាច់ខាតសុំទាន ឬ ក៏ព្រមទទួលយកលុយពីទឹកចិត្តសប្បុរសជនដែលហុចឲ្យតាមផ្លូវឡើយ។ និងផ្ទុយទៅវិញ គឺក្មេងប្រុសម្នាក់នេះ បានទទួចសុំឲ្យអ្នកដំណើរជួយទិញទំនិញរបស់ខ្លួនជាការប្រសើរជាង។
នេះបើយោងតាមគណនីហ្វេសប៊ុកឈ្មោះ Xof Naraplap បានបង្ហោះវីដេអូ និងសរសេររៀបរាប់ឲ្យដឹងថា នៅពេលគាត់ និងប្រពន្ធ បានធ្វើដំណើរតាមផ្លូវត្រឡប់ទៅផ្ទះវិញ នៅពេលនោះ ពួកគេបានប្រទះឃើញក្មេងប្រុសម្នាក់កំពុងលក់ផ្លែប៉ោម នៅតាមផ្លូវ។ ដោយឃើញគួរឲ្យអាណិត ពួកគេក៏បានឈប់រថយន្ត និងហុចលុយខ្លះដល់ក្មេងប្រុសនោះ ដោយពួកគេមិនទិញផ្លែប៉ោមទេ។ ប៉ុន្តែ ពួកគេពិតជាមានការភ្ញាក់ផ្អើលជាខ្លាំង នៅពេលក្មេងប្រុសនោះ បដិសេធទទួលយកលុយពីពួកគេហុចឲ្យទៅវិញ។
តាមរយៈវីដេអូ ក្មេងប្រុសនោះអាចត្រូវបានឮនិយាយថា៖ «នោះគឺជាហេតុផល ដែលពួកមីងទិញវាសម្រាប់យកទៅហូប, ពូមីងគួរទទួលយកនូវអ្វីដែលពួកមីងបានទិញ ព្រោះកុំឲ្យខ្ជះខ្ជាយលុយទទេៗអី»។
នៅទីបំផុត ប្តីប្រពន្ធនោះក៏បានសម្រេចចិត្តទទួលយកផ្លែប៉ោម ហើយក្មេងប្រុសនោះ ក៏បានទទួលយកលុយពីពួកគេដែលបានជួយទិញ។
ក្រោយពីបានឃើញបែបនេះ អ្នកលេងអ៊ិនធើរណិតជាច្រើន បានកោតសរសើរ ពីទំហំចិត្តរបស់ក្មេងប្រុសរូបនេះជាខ្លាំង៕ រក្សាសិទ្ធិដោយ៖ លឹម ហុង
