ម៉ូតូពីរគ្រឿងបុកគ្នាពេញទំហឹង បណ្ដាលឲ្យស្លាប់ម្នាក់ និងម្នាក់ទៀត រងរបួសធ្ងន់បញ្ជូនទៅមន្ទីរពេទ្យ

ភ្នំពេញ÷ យុវជនពីរនាក់ ជួបគ្រោះថ្នាក់ចរាចរណ៍ជិះម៉ូតូក្នុងល្បឿនលឿនបញ្រ្ចាសទិសគ្នា ក៏ជ្រុលទៅបុកចំពីមុខពេញទំហឹង បណ្ដាលឲ្យស្លាប់ម្នាក់ក្នុងថ្លុកឈាម និងម្នាក់ទៀតរងរបួសធ្ងន់។

ហេតុការណ៍នេះដែរកើតឡើងនៅវេលាម៉ោង ១០ និង ០០ នាទីយប់ថ្ងៃសៅរ៍ទី ១៩ ខែធ្នូ ឆ្នាំ ២០២០ ស្ថិតនៅតាមបណ្ដោយផ្លូវជាតិលេខ ៤ ក្នុងភូមិអង់សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ ។

សពជនរងគ្រោះមានឈ្មោះ ចន ភេទប្រុសអាយុ ២៤ ឆ្នាំ មុខរបរនៅផ្ទះ មានស្រុកកំណើត នៅភូមិពោធិអង្រ្កង ស្រុក បសេដ្ឋ ខេត្តកំពង់ស្ពឺ
និងម្នាក់ទៀតរងរបួសធ្ងន់ នៅមិនទាន់ស្គាល់អត្តសញ្ញាណនៅឡើយ។

ប្រភពព័ត៌មានពីបងប្រុសរត់ម៉ូតូកងបីបានឲ្យដឹងថា មុនពេលកើតហេតុគាត់បានឃើញយុវជនម្នាក់ ជិះម៉ូតូម៉ាកឡែត ពណ៌ស លាយក្រហមមួយគ្រឿងដែលពាក់ផ្លាកលេខ តាកែវ 1T 2374 ធ្វើដំណើរក្នុងទិសដៅលិចមកកើតក្នុងល្បឿនលឿន ខណៈមកដល់ចំណុចកើតហេតុ ស្រាប់តែមានម៉ូតូម៉ាកទ្រីមសង់សេ១២៥ មួយគ្រឿងទៀតដែលពាក់ផ្លាកលេខ ភ្នំពេញ 1HY 3247 ជិះដោយយុវជនម្នាក់ក្នុងទិសដៅពីកើតទៅលិច ក្នុងល្បឿនលឿនដូចគ្នា គេចពីរថយន្តក៏ជ្រុលទៅបុកចំពីមុខនិងម៉ូតូឡែត ពេញទំហឹង បណ្តាលឲ្យម្ចាស់ម៉ូតូឡែត ស្លាប់នៅនិងកន្លែងកើតហេតុ ចំណែកឯម្ចាស់ម៉ូតូម្ខាងទៀតរងរបួសធ្ងន់បញ្ជូនទៅមន្ទីរពេទ្យភ្លាមៗផងដែរ។

ក្រោយពេលកើតហេតុខាងលើ សមត្ថកិច្ចមូលដ្ឋានសហការគ្នា ជាមួយជំនាញចុះមកវាស់វែង យកម៉ូតូពីរគ្រឿងទៅរក្សាទុក និងធ្វើកំណត់ហេតុប្រគល់សព ឲ្យក្រុមគ្រួសារយកទៅធ្វើបុណ្យតាមប្រពៃណី៕រក្សាសិទ្ធដោយ៖ សា មេត