បាត់ដំបង ៖ អាជ្ញាធរខេត្តបាត់ដំបង បានប្រគល់ប្រាក់ឧបត្ថម្ភឲ្យម្ចាស់តូបដែលអគ្គិភ័យឆេះនៅផ្សាណាត់ សម្រាប់ពង្រីកមុខរបរបន្ថែមទៀត ដើម្បីស្ដារជីវភាពគ្រួសារឡើងវិញ បន្ទាប់ពីតូបបានជួសជុលរួចរាល់ ដែលប្រព្រឹត្តធ្វើឡើងកាលពីថ្ងៃទី៤ ខែមករា ឆ្នាំ២០២១។
លោក សឿម ប៊ុនរិទ្ធ អភិបាលរងខេត្តបាត់ដំបង បានមានប្រសាសន៍ថា ចំពោះតូបដែលត្រូវអគ្គិភ័យឆាប់ឆេះនោះ មានចំនួន៤០តូប ដោយតូបមួយចំនួនខូចខាតទាំងស្រុង គិតជាទឹកប្រាក់អស់ជាង ១លានដុល្លារអាមេរិក ដោយតូបទាំងអស់នោះ ត្រូវបានជួសជុលរួចរាល់កាលពីអំឡុងខែធ្នូ ឆ្នាំ២០២០។ សម្រាប់ថវិកាជួសជុលតូបមានថវិការបស់អាជ្ញាធរខេត្ត ថវិកាឯកឧត្តម ហ៊ុន ម៉ានី ឯកឧត្តម ច័ន្ទ សុផល សមាជិករដ្ឋសភា សមាគមខ្មែរ-ចិនខេត្តបាត់ដំបង បន្ទាប់ពីធ្វើនិងប្រគល់តូបរួចរាល់ អាជ្ញាធរខេត្ត បានឧបតម្ថថវិកាឲ្យក្រុមអាជីវកររងគ្រោះ ក្នុងម្នាក់ៗមានទឹកប្រាក់ចំនួន ៤១០ដុល្លារ។
ក្រុមអាជីវករ បានថ្លែងអំណរគុណ ចំពោះអាជ្ញាធរខេត្ត រួមទាំងសម្បុរជននានា ក្នុងពេលទទួលបានប្រាក់ឧបត្ថម្ភថា មានការខិតខំជួសជុលកែលម្អរតូប ដែលត្រូវអគ្គិភ័យឆាប់ឆេះ រួមទាំងបានផ្ដល់ប្រាក់ដល់ពួកគាត់ សម្រាប់បើកអាជីវកម្មជាថ្មី។
ឯកឧត្តម ចាន់ សុផល តំណាងរាស្ត្រមណ្ឌលបាត់ដំបង បានសម្តែងនូវការសោកស្តាយពីគ្រោះអគ្គីភ័យដែលកើតឡើង បណ្តាលឲ្យឆេះតូបលក់ដូរ នៅក្នុងផ្សារណាត់នេះ ធ្វើឲ្យខាតបាត់បង់ទ្រព្យធន និងប៉ះពាល់ធ្ងន់ធ្ងរ ដល់ការធ្វើអាជីវកម្មរបស់ពលរដ្ឋ មួយរយៈកន្លងមក។ ឯកឧត្តមចាន់ សុផល បានមានប្រសាសន៍លើកទឹកចិត្តដល់ក្រុមអាជីវកររងគ្រោះទាំងអស់ ខិតខំប្រកបអាជីវកម្មរបស់ខ្លួន ដើម្បីស្ដារជីវភាពគ្រួសារឡើងវិញ និងកុំមានការបាក់ទឹកចិត្ត។
គួរបញ្ជាក់ផងដែរថា ផ្សារណាត់បាត់ដំបង ដែលត្រូវសាងសង់ឡើង កាលពីសម័យអាណានិគមនិយមបារាំង នៅថ្ងៃទី៣០ ខែសីហា ឆ្នាំ២០២០ ត្រូវបានអគ្គិភ័យឆាប់ឆេះ ធ្វើឲ្យមានការភ្ញាក់ផ្អើលយ៉ាងខ្លាំង និងត្រូវបានចុះអន្តរាគមន៍ពន្លត់អគ្គិភ័យនេះ ដោយផ្ទាល់ពីសំណាក់ឯកឧត្តម ងួន រតនៈ អភិបាលខេត្តបាត់ដំបង អាជ្ញាធរក្រុង កងកម្លាំងប្រដាប់អាវុធទាំង៣ ក្នុងខេត្តផងដែរ ៕រក្សាសិទ្ធិដោយ៖អ៊ុងសារុំ
