ភ្នំពេញ៖ បុរសម្នាក់ រួមទាំងអ្នកដំណើរ បានបើករថយន្តក្នុងល្បឿនលឿន ស្រាប់តែផ្ទុះកង់ខាងមុខបានរេចង្កូត ជ្រុលទៅបុករះចូលរបងផ្ទះប្រជាពលរដ្ឋពេញទំហឹង បណ្តាលឲ្យបាក់អស់ជាច្រើនកង់។ ចំណែកឯតៃកុងរថយន្ត និងអ្នករួមដំណើរមិនមានរងរបួសនោះទេរងការខូចខាតតែរថយន្តផ្ទៃខាងមុខស្ទើទាំងស្រុង។
ហេតុការណ៍គ្រោះថ្នាក់ចរាចរណ៍នេះដែរ កើតឡើងនៅវេលាម៉ោង ១ និង ៥០នាទីយប់រំលងអធ្រាត្រឈានចូលថ្ងៃទី១១ ខែមករា ឆ្នាំ ២០២១ ស្ថិតនៅតាមបណ្តោយផ្លូវ វិមាន ឈ្នះ ឈ្នះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុគាត់បានឃើញបុរសម្នាក់ រួមទាំងអ្នកដំណើរបានបើករថយន្តម៉ាក ស៊ីណា មួយគ្រឿងពណ៌សពាក់ផ្លាកលេខ ភ្នំពេញ 2BF 6341 ធ្វើដំណើរតាមបណ្តោយផ្លូវ វិមាន ឈ្នះ ឈ្នះ ក្នុងទិសដៅពីជើងមកត្បូងក្នុងល្បឿនលឿន ខណៈពេលមកដល់ផ្លូវកោងមិនបង្អង់ ស្រាប់តែផ្ទុះកង់មុខរេចង្កូតជ្រុលទៅបុករះចូលរបងផ្ទះប្រជាពលរដ្ឋ បាក់អស់ជាច្រើនកង់។ សំណាងល្អក្នុងករណីគ្រោះថ្នាក់ចរាចរណ៍នេះ មិនបង្ករបួសស្នាមទៅលើភាគីដទៃ និងតៃកុងនោះទេ រងការខូចខាតតែរថយន្តស្ទើរទាំងស្រុង។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងជំនាញចរាចរណ៍ខណ្ឌពោធិ៍សែនជ័យ ចុះមកដល់ទីតាំងកន្លែងកើតហេតុរួចប្រគល់តួនាទីនេះ ទៅឲ្យខាងចរាចរណ៍ជំនាញក្រុង ចុះមកធ្វើការវាស់វែងនិងយករថយន្តស្ទូច មកស្ទូចយករថយន្តបង្កហេតុខាងលើ ទៅរក្សាទុកនៅខាងចរាចរណ៍ក្រុង រង់ចាំដោះស្រាយនៅពេលក្រោយ៕រក្សាសិទ្ធិដោយ៖ សា មេត
