កំពត៖ កម្លាំងជំនាញនៃស្នងការដ្ឋាននគរបាលខេត្តកំពត បាននឹងកំពុងបន្តស្រាវជ្រាវស្វែងរកចាប់ខ្លួនជនសង្ស័យឈ្មោះ អំ រដ្ឋា ឋានន្តរស័ក្តិផ្កាយ១ បានបោកលុយបុរសម្នាក់ ចំនួន ១២.០០០ដុល្លារ ដោយសន្យាថារត់ការចូលក្របខ័ណ្ឌនគរបាលក្រសួងមហាផ្ទៃ តាមដីកាបង្គាប់ឲ្យចាប់ខ្លួនរបស់សាលាដំបូងខេត្តកំពត ដើម្បីយកមកផ្តន្ទាទោសតាមច្បាប់។
ស្នងការដ្ឋាននគរបាលខេត្តកំពតមានកិត្តិយស សូមជម្រាបជូនសាធារណជន អ្នកសារព័ត៌មាន និងបណ្ដាញទំនាក់ទំនងសង្គមជ្រាបពាក់ព័ន្ធនឹងគណនីហ្វេសប៊ុកឈ្មោះ និស្ស័យ សីហៈ បានសំណូមពរ សុំឱ្យសម្តេចក្រឡាហោម ស ខេង ជួយអន្តរាគមន៍ដោះស្រាយ ដែលមានខ្លឹមសារដូចខាងក្រោម: “ខ្ញុំឈ្មោះ និស្ស័យ សីហៈ មានទុក្ខស្នើសុំឱ្យ សម្តេចក្រឡាហោម ស ខេង ជួយអន្តរាគមន៍ដោះស្រាយ ដោយខ្ញុំបាទត្រូវបានជនឆបោកឈ្មោះ អំ រដ្ឋា តួនាទីស្គាល់មិនច្បាស់ ឋានន្តរស័ក្តិផ្កាយ១ បានបោកលុយខ្ញុំបាទចំនួន ១២.០០០ដុល្លារ ដោយសន្យាថារត់ការចូលក្របខ័ណ្ឌនគរបាលក្រសួងមហាផ្ទៃ យកលុយនៅថ្ងៃទី២៧ ខែកក្កដា ឆ្នាំ២០១៧ និងបានយកជាបន្តបន្ទាប់សន្យាថាតែ ១៤ថ្ងៃបានឈ្មោះចូលក្របខ័ណ្ឌ ប៉ុន្តែមកដល់ពេលកំណត់មិនមានឈ្មោះ ខ្ញុំទុកពេលឱ្យរហូតដល់១ឆ្នាំក៏នៅតែមិនបាន ហើយលុយ ក៏មិនប្រគល់ឱ្យខ្ញុំបាទវិញ រហូតឈានដល់ថ្ងៃទី៥ ខែមិថុនា ឆ្នាំ២០១៩ ខ្ញុំបាទបានដំណឹងថាឈ្មោះ អំ រដ្ឋា ត្រូវបានគេប្តឹងពីបទឆបោក រត់ការចូលក្របខ័ណ្ឌក្រសួងមហាផ្ទៃ។ ខ្ញុំក៏បានទៅដាក់ពាក្យ បណ្តឹងទៅតុលាការខេត្តកំពត។ តែក្រោយរយៈពេល១០ថ្ងៃ បុគ្គល អំ រដ្ឋា ត្រូវបានដោះលែងឱ្យមានសេរីភាពវិញទៅហើយ។ ខ្ញុំបន្តដាក់ពាក្យបណ្តឹងទៅតុលាការខេត្តកំពត ឱ្យជួយរកយុត្តិធម៌។ ហើយមកដល់ថ្ងៃទី១៤ ខែកញ្ញា ឆ្នាំ២០២០ តុលាការក៏បានចេញសាលក្រមសម្រេចរឿងដល់ដំណាក់កាលកាត់ទោសជាប់ពន្ធនាគារ និងសំណងទឹកប្រាក់ចំនួន ១៣.០០០ដុល្លារ ប៉ុន្តែខ្ញុំត្រូវចំណាយសេវាកម្លាំងដើម្បីចុះចាប់ តែខ្ញុំបាទគ្មានលទ្ធភាពបង់ ដូច្នេះមិនដឹងពេលណាទើបបានទទួលសំណងមកវិញ ហើយជនឆបោកក៏មិនព្រមសងតាមចំនួនទាមទារ ដោយព្រមសងតែ២.០០០ដុល្លារ ខ្ញុំមិនទទួល ព្រោះខ្ញុំក៏បានខ្ចីលុយគេដែរចំនួន ១២.០០០ដុល្លារ ដើម្បីយកមកឱ្យជននេះរត់ការ ដូច្នេះខ្ញុំបាទសូម សម្តេច ជួយដោយក្តីគោរពពីខ្ញុំបាទផង សូមអរគុណ។ លេខទូរស័ព្ទខ្ញុំបាទ និស្ស័យ សីហៈ ០១១ ៧០២ ២០៦ និង ០៧០ ៧០២ ២០៦។”
ចំពោះករណីនេះ ស្នងការដ្ឋាននគរបាលខេត្តកំពត សូមធ្វើការបំភ្លឺជូនជ្រាប ដូចខាងក្រោម:
ថ្ងៃទី៣១ ខែឧសភា ឆ្នាំ២០១៩ បន្ទាប់ពីបានទទួលពាក្យបណ្តឹងពីឈ្មោះ កាន់ វណ្ណធឿន ភេទប្រុស អាយុ ៥១ឆ្នាំ និងឈ្មោះ ស៊ីម គឹមអាន អាយុ ៤១ឆ្នាំ ប្តឹងឈ្មោះ អំ រដ្ឋា ភេទប្រុស អាយុ ៤០ឆ្នាំ រស់នៅភូមិទួលត្បែង ឃុំជាងទង ស្រុកត្រាំកក់ ខេត្តតាកែវ ពីបទឆបោក (ប្រាក់) ចំនួន ២៣.០០០ដុល្លារ ជាថ្នូររត់ការចូលក្របខ័ណ្ឌនគរបាលជាតិ។ កម្លាំងជំនាញនៃស្នងការដ្ឋាននគរបាលខេត្តកំពត បានចាប់ខ្លួនជនសង្ស័យឈ្មោះ អំ រដ្ឋា និងកសាងសំណុំរឿងបញ្ជូនទៅសាលាដំបូងខេត្តកំពត។
ថ្ងៃទី០៥ ខែមិថុនា ឆ្នាំ២០១៩ សាលាដំបូងខេត្តកំពត បានចេញដីកាលេខ ៣៩៤ បង្គាប់ឱ្យឃុំខ្លួនឈ្មោះ អំ រដ្ឋា បណ្តោះអាសន្ននៅពន្ធនាគារខេត្តកំពត។ ប៉ុន្តែបន្ទាប់ពីសវនាការរួចឈ្មោះ អំ រដ្ឋា បានយល់ព្រមតាមការទាមទារពីភាគីដើមបណ្តឹង និងបានបញ្ចប់នីតិវិធីដោយការព្រមព្រៀងសះជា ហើយតុលាការខេត្តកំពតសម្រេចដោះលែងឈ្មោះ អំ រដ្ឋា ឱ្យនៅក្រៅឃុំ។
ថ្ងៃទី០៤ ខែវិច្ឆិកា ឆ្នាំ២០២០ ស្នងការដ្ឋាននគរបាលខេត្តកំពតទើបតែបានទទួលដីកាលេខ ២៥៥ របស់ សាលាដំបូងខេត្តកំពត ចុះថ្ងៃទី២៨ ខែកញ្ញា ឆ្នាំ២០២០ បង្គាប់ឱ្យចាប់ខ្លួនឈ្មោះ អំ រដ្ឋា ជាថ្មីម្តងទៀត ដែលមានដើមបណ្តឹងឈ្មោះ និស្ស័យ សីហៈ ករណីនេះកម្លាំងជំនាញបាន នឹងកំពុងធ្វើការស្រាវជ្រាវស្វែងរកឃាត់ខ្លួនបុគ្គលឈ្មោះ អំ រដ្ឋា មកផ្តន្ទាទោសតាមច្បាប់ ប៉ុន្តែបច្ចុប្បន្នជនសង្ស័យរូបនេះបានរត់គេចខ្លួន។
ស្នងការដ្ឋាននគរបាលខេត្តកំពត សូមបដិសេធចំពោះការលើកឡើងពីឈ្មោះ និស្ស័យ សីហៈ ដែលថា សមត្ថកិច្ចទាមទារសេវាចុះចាប់ជនសង្ស័យ ឬអនុវត្តដីកា។ កន្លងមកកម្លាំងជំនាញនៃស្នងការដ្ឋាននគរបាល ខេត្តកំពត ពុំធ្លាប់ទទួលបានពាក្យបណ្តឹង ឬទំនាក់ទំនងការងារជាមួយឈ្មោះ និស្ស័យ សីហៈ នោះឡើយ។
លុះរសៀលថ្ងៃទី ១៤ ខែមករា ឆ្នាំ ២០២១ កម្លាំងជំនាញនៃស្នងការដ្ឋាននគរបាលខេត្តកំពត បានកោះអញ្ជើញឈ្មោះ និស្ស័យ សីហៈ ដើម្បីសួរនាំពាក់ព័ន្ធករណីខាងលើ។
នៅចំពោះមុខសមត្ថកិច្ចឈ្មោះ និស្ស័យ សីហ: បានឆ្លើយថា ខ្លួនបានទៅដាក់ពាក្យបណ្តឹងនៅសាលាដំបូងខេត្តកំពតពិតប្រាកដមែន ពុំបានដាក់ពាក្យបណ្តឹងនៅស្នងការដ្ឋាននគរបាលខេត្តកំពតនោះទេ រីឯការសរសេរថាត្រូវចំណាយសេវាដើម្បីតាមចាប់ជនសង្ស័យនោះ គឺបានដឹងពីមិត្តភក្តិប៉ុណ្ណោះ ពុំពាក់ព័ន្ធជាមួយមន្ត្រីនៃស្នងការដ្ឋាននគរបាលខេត្តកំពតនោះឡើយ។ ឈ្មោះ និស្ស័យ សីហ: បានសុំការអភ័យទោសពីសមត្ថកិច្ចនៃស្នងការដ្ឋាននគរបាលខេត្តកំពត ចំពោះការសរសេរខ្លឹមសារមិនពិត ប៉ះពាល់កិត្តិយស និងសេចក្តីថ្លៃថ្នូររបស់ស្នងការដ្ឋាននគរបាលខេត្តកំពត ព្រមទាំងយល់ព្រមសរសេរខ្លឹមសារគោរពជូនសម្តេចក្រឡាហោម ស ខេង
ដើម្បីគោរពជូនជ្រាប។
បច្ចុប្បន្ន កម្លាំងជំនាញនៃស្នងការដ្ឋាននគរបាលខេត្តកំពត បាននឹងកំពុងបន្តស្រាវជ្រាវស្វែងរកចាប់ខ្លួនជនសង្ស័យឈ្មោះ អំ រដ្ឋា តាមដីកាបង្គាប់ឲ្យចាប់ខ្លួនរបស់សាលាដំបូងខេត្តកំពត ដើម្បីយកមកផ្តន្ទាទោសតាមច្បាប់៕ រក្សាសិទ្ធិដោយ៖បញ្ញាស័ក្តិ
