ភ្នំពេញ៖ រដ្ឋមន្ត្រីក្រសួងសុខាភិបាល បានថ្លែងថា ចាប់ពីថ្ងៃទី៥ដល់ទី១៩ ខែតុលាឆ្នាំ២០១៧ មន្ទីរពេទ្យគន្ធបុប្ផាបានទទួលអ្នកជំងឺជាកុមារចំនួន៣នាក់ និងមន្ទីរពេទ្យបង្អែកខេត្តស្វាយរៀង បានទទួលអ្នកជំងឺចំនួន២៩នាក់ ដែលពាក់ព័ន្ធខ្លាំងទៅនឹងការប៉ះពាល់សារធាតុគីមី ដែលជាសំណល់គ្រាប់បែកគីមីរបស់សហរដ្ឋអាមេរិក។
បើតាមប្រកាសក្រសួងសុខាភិបាល លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល បានឃើញកុមារនេះ “មានសេចក្តីរន្ធត់ និងគួរឲ្យសង្វេគណាស់ដែលកុមារទាំងនេះ ទទួលរងទុក្ខវេទនាដូច្នេះ ដោយពួកគេពុំទាំងបានធ្វើអ្វីខុសសោះ តើអ្នកណាជាអ្នកទទួលខុសត្រូវលើសោកនាដកម្មនេះ?” លោកបន្តថា ក្រុមការងារក្រសួងសុខាភិបាលបានចុះពិនិត្យស្រាវជ្រាវ រកផលប៉ះពាល់បញ្ហាសុខភាព ប្រជាពលរដ្ឋហើយបានរកឃើញករណីជំងឺមិនប្រក្រតីមួយចំនួននៅឃុំគគីរ ស្រុករមាសហែក ខេត្តស្វាយរៀង ដែលមានដូចជា សភាពជំងឺមិនប្រក្រតី មាត់វៀច ក្បាលធំ និងជំងឺស្បែក ជាដើម៕ ដោយ៖ជាលី
