ភ្នំពេញ ៖ ប្រិយមិត្ត និងមហាជនបានស្គាល់ហើយ ពីតារាជើងសិល្បៈជើងចាស់គឺយាយ អឿន ដែលតែងតែផ្តល់នូវសំណើចសប្បាយ ទៅដល់ទស្សនិកជនរៀងរាល់ការសម្តែង មិនថាតាមរយៈការច្រៀងអាយ៉ាឆ្លើយឆ្លង និងលេងកំប្លែងនោះទេ។
ជាការពិតណាស់ ដោយសារតែមានវ័យចំណាស់ទៅហើយ តែខណៈទីផ្សារសិល្បៈនៅតែបន្ត ហើយការគាំទ្រក៏នៅតែទទួលបានច្រើនដដែលនោះៗ កាលពីអំឡុងខែកក្កដា ឆ្នាំ២០២០ តារាកំប្លែងជើងចាស់ យាយ អឿន បានដឹកដៃយាយ យ៉យ ជាមិត្តរួមអាជីព ទៅកែសម្ផស្ស ដើម្បីបំបាត់ស្នាមជ្រីវជ្រួញលើផ្ទៃមុខតទៅទៀត និងទទួលបានទម្រង់ផ្ទៃមុខតឹងណែនស្រស់ស្អាតមើលទៅដូចវ័យទើបតែ ៥០ ឆ្នាំ អ៊ីចឹង។
ដោយឡែក ថ្មីៗនេះ យាយអឿន បានធ្វើឲ្យហ្វេនៗ និងក៏ដូចមហាជន មានការភ្ញាក់ផ្អើលជាខ្លាំង ក្រោយពីបានឃើញរូបភាពប៉ុន្មានសន្លឹករបស់តារាជើងចាស់មានវ័យប្រមាណជា ៧០ ឆ្នាំ រូបនេះ តុបតែងខ្លួនជាមួយរូបសម្រស់ប្រែប្រួលស្រស់ស្អាតខ្លាំង និងថែមទាំងក្មេងប្លែកដូចមនុស្ស២នាក់ផ្សេងគ្នា មើលសឹងពុំស្គាល់តែម្តង។
គួរបញ្ជាក់ថា គិតមកទល់ពេលនេះ ឃើញថាមានរយៈពេលប្រមាណជាង ៥ ខែហើយ ក្រោយយាយ អឿន បានបបួលយាយ យ៉យ ទៅកែសម្ផស្សដែលក្នុងនោះដូចជា៖ កាត់ត្របកភ្នែកយារធ្លាក់, អ៊ុតទាញបន្តឹងស្បែកមុខ និងធ្វើច្រមុះជាដើម៕ រក្សាសិទ្ធិដោយ៖ លឹម ហុង
