នេះជាខណៈពេលដ៏ស្លុតរន្ធត់ និងសាហាវដែលគួរឲ្យប្រុងប្រយ័ត្ន គ្រាដែលស្ត្រីម្នាក់ត្រូវបានចោរប្លន់ទាំងកណ្តាលថ្ងៃត្រង់ ស្ថិតនៅក្នុងកន្លែងចតរថយន្តមួយកន្លែង នៅក្នុងប្រទេសម៉ាឡេស៊ី កាលពីពេលថ្មីៗនេះ។
តាមរយៈវីដេអូបង្ហោះនៅលើទំព័រហ្វេសប៊ុកមួយឈ្មោះថា IJKB បានបង្ហាញឲ្យឃើញស្ត្រីម្នាក់ បានចុះពីរថយន្ត និងដើរទៅបិទឃ្លុបក្រោយរថយន្ត មុនពេលដើរចាកចេញជាមួយកាបូបស្ពាយនៅនឹងស្មា ស្ថិតនៅក្នុងបរិវេណចតរថយន្តមួយកន្លែង នៅក្នុងប្រទេសម៉ាឡេស៊ី។ ប៉ុន្តែ ខណៈពេលនោះ គេក៏បានឃើញជនសង្ស័យជាចោរម្នាក់ បានជិះម៉ូតូចូលមកឆ្លងកាត់ផ្លូវពីមុខ ខណៈនាងកំពុងឆ្លងផ្លូវ។
បន្ទាប់មក ជនសង្ស័យរូបនោះក៏បានបើកម៉ូតូបត់ត្រឡប់ក្រោយវិញ និងបានជិះសំដៅមកកាន់នាងតែម្តង។ ហើយភ្លាមៗនោះ នាងហាក់បានដឹងពីចេតនារបស់ជនសង្ស័យនោះមកលើខ្លួន នាងក៏បានស្រែកឆោឡោឡើង និងព្យាយាមរត់ចេញពីជនសង្ស័យដោយស្រែកខ្លាំងៗថា៖ «ខ្ញុំគ្មានអ្វីទេ!» ខណៈជនសង្ស័យបានដេញតាមនាងជុំវិញឡាន។
ទោះយ៉ាងណា ដោយសារតែខំប្រឹងព្យាយាមរត់ ទីបំផុត នាងក៏បានដួល ហើយភ្លាមៗនោះ ជនសង្ស័យក៏បានចុះពីម៉ូតូ ដើរចូលមកជាមួយរបស់ស្រួចទំនងជាកាំបិត ដើម្បីគំរាម ហើយកញ្ឆក់យកកាបូបពីដៃនាង រួចឡើងជិះម៉ូតូគេចខ្លួន។ បន្ទាប់ភ្លាមៗនោះ គេក៏បានឃើញមនុស្សប្រុសស្រីនៅទីនោះបង្ហាញខ្លួន និងរត់មកជួយនាង។
យោងតាមអ្នកលេងអ៊ីនធឺណេតជាច្រើន បានឲ្យដឹងថា ហេតុការណ៍នេះបានកើតឡើងកាលពីថ្ងៃទី១៩ ខែមករា ឆ្នាំ២០២១ ស្ថិតនៅ Kota Kemuning, Selangor ជិតផ្សារទំនើប Sanctuary។
តែយ៉ាងណា ជាមួយម៉ូតូជនសង្ស័យពាក់ផ្លាកលេខ BPC 6163 ដែលកាមេរ៉ាសុវត្ថិភាពចាប់បាន នោះមហាជនសង្ឃឹមថា វីដេអូនេះនឹងទទួលការចាប់អារម្មណ៍ពីប៉ូលិស ហើយថា ពួកគេនឹងចាត់វិធានការសមស្របចំពោះជនសង្ស័យ៕ រក្សាសិទ្ធិដោយ៖ លឹម ហុង
