ភ្នំពេញៈ ថៅកែហាង “ម្លប់ដូងជំនោរព្រែកក្តាត” អាងឥទ្ធិពលអ្នកមានអំណាចនៅពីក្រោយបានចាក់លដីរំលោភចូលសមុទ្រ ស្ថិតនៅភូមិក្តាត ឃុំព្រែកត្នោត ស្រុកទឹកឈូ ខេត្តកំពត។ ប្រជាពលរដ្ឋបានរិះគន់អាជ្ញាធរមូលដ្ឋានដែលមិនមានវិធានការទប់ស្កាត់ចំពោះសកម្មភាពចាក់ដីរំលោភចូលសមុទ្រ។
សេចក្តីរាយការណ៍បានឲ្យដឹងថា ថៅកែហាង “ម្លប់ដូងជំនោរព្រែកក្តាត” ឈ្មោះ ឡេ ស្រ៊ុន គឺបានចាក់ដីចូលសមុទ្រប្រហែង ៣០ម៉ែត្រ គុណ ៤០ម៉ែត្រ ជម្រៅពីកន្លះម៉ែត្រទៅមួយមែត្រ ដោយគ្មានច្បាប់អនុញ្ញាតនោះទេ។
លោកឡេ ស្រ៊ុន ថៅកែហាង “ម្លប់ដូងជំនោរព្រែកក្តាត” បានបញ្ជាក់ថា ការចាក់ដីចូលសមុទ្រនេះ គឺគ្មានលិខិតអនុញ្ញាតទេ ដែលមានទំហំ ៣០ម៉ែត្រគុណ៤០ម៉ែត្រ ជម្រៅកន្លះម៉ែត្រទៅមួយម៉ែត្រ និងទំហំ ១០ម៉ែត្រ គុណ ២០ម៉ែត្រ ជម្រៅកន្លះម៉ែត្រទៅមួយម៉ែត្រ។ ហើយការចាក់ដីចូលសមុទ្រនេះ គឺក្នុងគោលបំណងការពារល្បាប់ភក់ និងសំរាម។
ទាក់ទងករណីនេះ លោក នាក់ សុវណ្ណារី អភិបាលស្រុកទឹកឈូបានឲ្យដឹងថា លោកបានឲ្យម្ចាស់ដីកាយយកអាចម៌ដីចេញពីសមុត្រចេញវិញហើយ និងឲ្យរក្សាស្ថានភាពដូចដើមវិញ និងបានហាមឃាត់ម្ចាស់ទីតាំងមិនឲ្យចូលដីចូលសមុទ្របន្ថែមទៀតឡើយ។ ហើយបើម្ចាស់ដីមានបំណងចង់អភិវឌ្ឍន៍លើទីតាំងតំបន់នេះ ត្រូវសុំការអនុញ្ញាតពីអាជ្ញាធរមានសមត្ថកិច្ច និងគណៈកម្មការថ្នាក់ខេត្ត ឬថ្នាក់ជាតិ៕ រក្សាសិទ្ធិដោយៈ ចេស្តារ
