ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានមានប្រសាសន៍ថា “ពេលនេះនៅ ទីក្រុងរ៉ង់ហ្គោន សាធារណៈរដ្ឋសហភាពមីយ៉ាន់ម៉ា បានចាប់ផ្ដើមហើយ គឺប្រធានាធិបតី និងទីប្រឹក្សារដ្ឋត្រូវទាហានចាប់ខ្លួនហើយ”។
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានលើកឡើងបែបនេះនៅព្រឹកថ្ងៃ ទី១ ខែកុម្ភៈ ឆ្នាំ២០២១ ក្នុងឱកាសអញ្ជើញបើកការដ្ឋានសាង សង់រោងចក្រប្រព្រឹត្តកម្មទឹកស្អាតបាក់ខែង និងពិធីសម្ពោធដាក់ឱ្យដំណើរការជាផ្លូវការរោងចក្រប្រព្រឹត្តកម្មទឹកស្អាតចម្ការមន។
សម្តេចតេជោ ហ៊ុន សែន បានថ្លែងថា ពាក់ព័ន្ធស្ថានភាពចាប់ខ្លួនមេដឹកនាំ និងប្រធានាធិបតីនៅប្រទេសមីយ៉ាន់ម៉ា កម្ពុជាមិនថ្លែងសារអ្វីពាក់ព័ន្ធបញ្ហាផ្ទៃក្នុងរបស់មីយ៉ាន់ម៉ាទេ។
សម្តេចតេជោ បានបន្ថែមថា បញ្ហានេះកម្ពុជានឹងមិនធ្វើអត្ថាធិប្បាយទៅលើកិច្ចការផ្ទៃក្នុងរបស់ប្រទេសណាទាំងអស់នៅ ក្នុងអាស៊ាន។ ព័ត៌មានអាចផ្សព្ធផ្សាយបានតែមិនត្រូវធ្វើអត្ថាធិប្បាយអ្វីទាំងអស់ ។
លោកស្រី អោងសាន ស៊ូជី ទីប្រឹក្សារដ្ឋ និងជារដ្ឋមន្ត្រីការបរទេស នៃសាធារណរដ្ឋមីយ៉ាន់ម៉ា និងឥស្សរជនជាន់ខ្ពស់ដទៃទៀត មកពីគណបក្សកាន់អំណាច ត្រូវបានឃុំខ្លួនក្នុងការឆ្មក់ចូលមួយដោយពួកយោធាដ៏មានអំណាច នៅពេលព្រឹកព្រលឹម ថ្ងៃទី១ ខែកុម្ភៈ ឆ្នាំ២០២១។
យោធាមីយ៉ាន់ម៉ា នៅព្រឹកថ្ងៃចន្ទនេះ ប្រកាសដាក់ប្រទេសទាំងមូលក្នុងគ្រាមានអាសន្នរយៈពេលមួយឆ្នាំ បន្ទាប់ពីលោកស្រី អោង សាន ស៊ូជី ត្រូវបានចាប់ ឃុំខ្លួននៅក្នុងផ្ទះ ដោយយោធា ដែលគេមើលឃើញថាទង្វើបែបនេះគឺជា រដ្ឋប្រហារ។ នេះបើតាមការចេញផ្សាយដោយទីភ្នាក់ងារព័ត៌មានចិនស៊ីនហួ នៅថ្ងៃចន្ទ ទី១ ខែកុម្ភៈ ឆ្នាំ២០២១។
តាមរយៈប្រព័ន្ធផ្សព្វផ្សាយរបស់ខ្លួន យោធាមីយ៉ាន់ម៉ា ក៏ប្រកាសដែរថា អនុប្រធានាធិបតី U Myint Swe ដែលត្រូវបានជ្រើសតាំងដោយយោធា នឹងឡើងកាន់តំណែងជា ប្រធានាធិបតីបណ្ដោះអាសន្ន។ ការប្រកាសដាក់ប្រទេសក្នុងគ្រាមានអាសន្ននេះ ធ្វើឡើងក្រោយអ្នកនាំពាក្យគណបក្សសម្ព័ន្ធជាតិដើម្បីប្រជាធិបតេយ្យ NLD បានឱ្យដឹងនៅព្រឹក ថ្ងៃចន្ទនេះថា ទីប្រឹក្សារដ្ឋ លោកស្រី អោង សាន ស៊ូជី និងលោកប្រធានាធិបតី Win Myint ព្រមទាំងមន្ត្រីជាន់ខ្ពស់ជាច្រើនរូបទៀត នៃគណបក្ស NLD ត្រូវបានយោធាចាប់ និងឃុំខ្លួន។
បច្ចុប្បន្ន យោធាមីយ៉ាន់ម៉ា កំពុងគ្រប់គ្រងស្ថានការណ៍ ហើយកងទ័ពជាច្រើនត្រូវបានដាក់ពង្រាយនៅតាមដងផ្លូវ ក្នុងរដ្ឋធានីណៃពិដោរ និងទីក្រុង យ៉ាងហ្គន។ ចំណែកឯ បណ្ដាញទូរស័ព្ទ, អ៉ិនធើណិត, និងប្រព័ន្ធទំនាក់ទំនងនានា នៅក្នុងរដ្ឋធានី ក៏ដូចជានៅតាមទីក្រុងធំៗ ក៏ត្រូវបានកាត់ផ្ដាច់ផងដែរ ខណៈប្រព័ន្ធផ្សព្វផ្សាយរដ្ឋមីយ៉ាន់ម៉ា អះអាងថា វាបណ្ដាលមកពីបញ្ហាបច្ចេកទេស។
គួរបញ្ជាក់ថា ការចាប់ខ្លួនលោកស្រី ស៊ូជី និងមន្ត្រីជាន់ខ្ពស់នៃរដ្ឋាភិបាលរបស់លោកស្រី កើតមានឡើងចំពេលសភាជាតិមីយ៉ាន់ម៉ា ត្រូវបើកសម័យប្រជុំដំបូង នៅព្រឹកថ្ងៃចន្ទ នេះ ក្រោយការបោះឆ្នោតសកលកាលពីថ្ងៃទី៨ ខែវិច្ឆិកា ឆ្នាំ២០២០ ដែលបង្ហាញថាគណបក្សលោកស្រីស៊ូជី ជាអ្នកទទួលបានជ័យជម្នះភ្លូកទឹកភ្លូកដី។ គណៈកម្មាការជាតិ រៀបចំការបោះឆ្នោតមីយ៉ាន់ម៉ា បាននិយាយថាការបោះឆ្នោតនេះបានប្រព្រឹត្តទៅដោយតម្លាភាព និងយុត្តិធម៌ ហើយសហរដ្ឋអាមេរិក និងសហភាពអឺរ៉ុបក៏បានជំរុញឱ្យយោធា ទទួលស្គាល់លទ្ធផលបោះឆ្នោតនេះដែរ។ ប៉ុន្តែ យោធាមីយ៉ាន់ម៉ា បានចោទថាការបោះឆ្នោតនេះត្រូវបានលួចបន្លំ ជាមួយការព្រមានថានឹងចាត់វិធានការឆ្លើយតប៕ រក្សាសិទ្ធិដោយ៖បញ្ញាស័ក្តិ
