ភ្នំពេញ៖ ឧបនាយករដ្ឋមន្ត្រី ជា សុផារ៉ា បានបញ្ជាក់ថាបច្ចុប្បន្នព្រះរាជាណាចក្រកម្ពុជាកំពុងមានការរីកចំរើនលើគ្រប់វិស័យបើទោះបីជាប្រឈមនឹងហានិភ័យនៃវិបត្តិជំងឺកូវីត១៩យ៉ាងណាក្តីហើយភាពរីកចំរើននេះបានទទួលការសាទរពីប្រជាពលរដ្ឋគ្រប់មជ្ឈដ្ឋានលើកលែងតែក្រុមអគតិមួយចំនួនដែលមិនសាទរឬមិនគាំទ្រចំពោះសមិទ្ធិផលដែលប្រមុខរាជរដ្ឋាភិបាលកម្ពុជាបានកសាងឡើងមកដោយលំបាកនិងមានការអភិវឌ្ឍមកទល់សព្វថ្ងៃនេះឡើយ។
ព្រឹកថ្ងៃទី៤ ខែកុម្ភៈ ឆ្នាំ២០២១នេះ នៅទីស្តីការក្រសួង ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានអញ្ជើញជាអធិបតីក្នុងពិធីសំណេះសំណាលជាមួយមន្ត្រីរាជការជាយុវជនក្រោមឱវាទក្រសួងចំនួន ២០២ នាក់។
ក្នុងពេលជួបសំណេះសំណាលនោះឯកឧត្តមឧបនាយករដ្ឋមន្ត្រី ជា សុផារ៉ា បានឲ្យដឹងថា ការជួបជុំគ្នានៅពេលនេះ គឺក្នុងគោលបំណង ដើម្បីណែនាំនិងផ្សព្វផ្សាយ ដល់មន្ត្រីរាជការជាយុវជនក្រោមឱវាទក្រសួង ឲ្យចូលរួមពង្រឹងការអនុវត្ត ផែនការយុទ្ធសាស្ត្ររបស់ក្រសួងរៀបចំដែនដីនគរូបនីយកម្មនិងសំណង់សម្រាប់យុវជននាឆ្នាំ 2021-2023 ដោយ ឯកឧត្តមឧបនាយករដ្ឋមន្ត្រីរួមនិងថ្នាក់ដឹកនាំក្រសួងបានផ្ដល់ការគាំទ្រចំពោះផែនការយុទ្ធសាស្ត្រអភិវឌ្ឍន៍របស់ក្រសួងសម្រាប់យុវជនក្នុងរយៈពេល ៣ ឆ្នាំនេះផងដែរ។ ជារួមការងាររបស់យុវជនក្រោមឱវាទក្រសួងរៀបចំដែនដីនគរូបនីយកម្មនិងសំណង់បានដើរតួនាទីយ៉ាងសំខាន់ ដែលជំរុញឲ្យក្រសួងកាន់តែមានសកម្មភាពល្អប្រសើរ ក្នុងការអនុវត្តនូវគោលនយោបាយរបស់រាជរដ្ឋាភិបាលក្រោមការដឹកនាំរបស់សម្ដេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជា។
ជាមួយនោះ ឯកឧត្តមឧបនាយករដ្ឋមន្ត្រីក៏បានលើកឡើងពីចំណុចសំខាន់ៗសំរាប់អោយមន្ត្រីរាជការជាយុវជនបានស្វែងយល់ដូចជា៖-សភាពការណ៍នយោបាយក្នុងប្រទេស -ឧបាយកលរបស់ជនអគតិមួយចំនួនដែលមានបំណងផ្តួលរំលំរដ្ឋាភិបាលស្របច្បាប់ -ការងាររបស់ក្រសួងរៀបចំដែនដីនគរូបនីយកម្មនិងសំណង់ដែលក្នុងនោះយុវជនក្រោមឱវាទក្រសួងទាំង ២០២ រូប ក៏បានរួមចំណែកនៅក្នុងការអនុវត្តផងដែរ -ការគាំទ្ររបស់គណបក្សប្រជាជនកម្ពុជាក្នុងក្រសួងរៀបចំដែនដីនគរូបនីយកម្មនិងសំណង់ដោយដាក់ទិសដៅសំរាប់ការការពារគាំទ្រនិងលើកទឹកចិត្ត ដើម្បីជំរុញឲ្យផែនការយុទ្ធសាស្ត្ររបស់យុវជនក្នុងឆ្នាំ 2021-2023 នេះអនុវត្តបានដោយរលូនទៅតាមដំណើរការផែនការសកម្មភាពដូចដែលបានគ្រោងទុក -និងការបង្ហាញជូនកិច្ចការរបស់ក្រសួងដែលនឹងត្រូវរៀបចំកម្មវិធីផ្សេងៗនៅពេលខាងមុខ។
ឯកឧត្តម ឧបនាយករដ្ឋមន្ត្រី ជា សុផារ៉ា បានបញ្ជាក់ថាបច្ចុប្បន្នព្រះរាជាណាចក្រកម្ពុជាកំពុងមានការរីកចំរើនលើគ្រប់វិស័យបើទោះបីជាប្រឈមនឹងហានិភ័យនៃវិបត្តិជំងឺកូវីត១៩យ៉ាងណាក្តីហើយភាពរីកចំរើននេះបានទទួលការសាទរពីប្រជាពលរដ្ឋគ្រប់មជ្ឈដ្ឋានលើកលែងតែក្រុមអគតិមួយចំនួនដែលមិនសាទរឬមិនគាំទ្រចំពោះសមិទ្ធិផលដែលប្រមុខរាជរដ្ឋាភិបាលកម្ពុជាបានកសាងឡើងមកដោយលំបាកនិងមានការអភិវឌ្ឍមកទល់សព្វថ្ងៃនេះឡើយប៉ុន្តែបែរជាខំរិះរកវិធីសាស្ត្របង្កបញ្ហាដើម្បីរាំងស្ទះដល់ដំណើរការអភិវឌ្ឍរីកចំរើនរបស់ប្រទេសជាតិនិងសុខសន្តិភាពស្ថេរភាពនយោបាយទៅវិញប៉ុន្តែទោះជាយ៉ាងណាក្តីយើងទាំងអស់គ្នានឹងមិនថយក្រោយហើយនឹងខិតខំប្រឹងប្រែងបោះជំហានទៅមុខសំរាប់ជំរុញការអភិវឌ្ឍជាតិនិងស្ថេរភាពក្នុងតួនាទីជាគណបក្សដែលកំពុងកាន់អំណាច។
ឯកឧត្តម បន្ថែមថា ក្រោមការដឹកនាំរបស់ប្រមុខរាជរដ្ឋាភិបាលកម្ពុជាគឺសម្តេចអគ្គមហាសេនាបតីតេជោហ៊ុនសែនដែលមានគោលនយោបាយយុទ្ធសាស្ត្រដ៏ត្រឹមត្រូវច្បាស់លាស់ក្នុងការពុះពារឆ្លងកាត់គ្រប់ឧបសគ្គនោះបានធ្វើឲ្យកម្ពុជាទទួលបាននូវជ័យជំនះលើគ្រប់កាលៈទេសៈនិងទប់ស្កាត់បានរាល់ឧបាយកលរបស់ជនអគតិដែលមានបំណងរារាំងដល់ការអភិវឌ្ឍជាតិព្រមទាំងបាននាំនាវាកម្ពុជាឆ្ពោះទៅកាន់វឌ្ឍនភាពនិងភាពសុខសាន្តជូនប្រជាពលរដ្ឋបានយ៉ាងពិតប្រាកដផងដែរ៕ រក្សាសិទ្ធិដោយ៖បញ្ញាស័ក្តិ
