ភ្នំពេញ៖ ក្រោយពីស្វែងរកនិងសំរាញ់ជាង ១ឆ្នាំ គិតចាប់ពីខែតុលា ឆ្នាំ២០១៩ មកដល់ពេលនេះ សាលារាជធានីភ្នំពេញ រកបានហើយនូវក្រុមហ៊ុនឯកជន ចំនួន ៣ ដើម្បីធ្វើអាជីវកម្ម ប្រមូលសំរាម នៅក្នុងរាជធានីភ្នំពេញ។ ក្រុមហ៊ុនឯកជនទាំង ៣នោះ គឺ ក្រុមហ៊ុនស៊ីនទ្រី ក្រុមហ៊ុន Mizuda Group Co.,Ltd និងក្រុម ហ៊ុន 800 Super/GAEA។
រដ្ឋបាលរាជធានីភ្នំពេញនឹងប្រកាសថា ពិធីប្រគល់-ទទួលកិច្ចសន្យា ស្តីពី ការផ្តល់ សេវាប្រមូល និងដឹកជញ្ជូន សំរាម សំណល់រឹង នៅរាជធានីភ្នំពេញ នឹង ធ្វើនៅម៉ោង ៩ព្រឹក ថ្ងៃទី៥ ខែកុម្ភៈ ឆ្នាំ២០២១ នៅសាលារាជធានីភ្នំពេញ ។
សូមរម្លឹកថា កាលពីថ្ងៃទី ២៥ ខែតុលា ឆ្នាំ ២០១៩ សម្តេចតេជោហ៊ុន សែន បានប្រកាសជាផ្លូវការក្នុង កិច្ចប្រជុំពេញអង្គគណៈរដ្ឋមន្ត្រី សម្រេចដកសិទ្ធិប្រមូលសំរាម នៅរាជធានីភ្នំពេញ ពីក្រុមហ៊ុនស៊ិនទ្រី ដោយដាក់ ឲ្យស្ថិតក្រោមការគ្រប់គ្រង របស់រដ្ឋជាបណ្តោះអាសន្ន ។
គួរបញ្ជាក់ថា៖សម្តេចតេជោ ក៏បានប្រកាស ឲ្យក្រសួងសេដ្ឋកិច្ច និងហិរញ្ញវត្ថុ និងអាជ្ញាធររាជធានីភ្នំពញ រៀបចំ បែងចែកតំបន់ គ្រប់គ្រង និងប្រមូលសំរាម យ៉ាងហោចណាស់ ៤តំបន់ ហើយដាក់ ឲ្យក្រុមហ៊ុនឯកជន ដេញថ្លៃ ប្រមូល និង គ្រប់គ្រងសំរាម នៅរាជធានីភ្នំពេញ ដោយក្រុមហ៊ុន១ មានសិទ្ធិទទួលបានតែ ១តំបន់ប៉ុណ្ណោះ។
ការដកសិទ្ធិពីក្រុមហ៊ុនស៊ីនទ្រី ឈប់ឲ្យប្រមូលសំរាមនៅភ្នំពេញ ដោយសារតែក្រុមហ៊ុន ផ្តាច់មុខយូរឆ្នាំមកហើយមួយនេះ មិនអាចគ្រប់គ្រងប្រមូល និងដឹកជញ្ជូនសំរាមទាន់ពេលវេលា ៕ រក្សាសិទ្ធិដោយ៖បញ្ញាស័ក្តិ
