ភ្នំពេញ៖ តាមរយៈគម្រោង សហគ្រិនស្ត្រីសកម្ម អង្គការផេកប្រចាំប្រទេសកម្ពុជា ដែលទទួលបានជំនួយពីទីភ្នាក់ងារជំនួយសហរដ្ឋ អាមេរិក ដែលហៅកាត់ថា USAID បានប្រារព្ធវេទិកាប្រព័ន្ធអេកូឡូស៊ីសហគ្រិនភាព ក្រោមប្រធានបទ “លទ្ធភាពទទួលបានហិរញ្ញប្បទានសម្រាប់សហគ្រិនស្ត្រីក្នុងសម័យកាលកូវីដ-១៩” ដែលប្រព្រឹត្តិនៅ សណ្ឋាគារ សូហ្វីតែល ភ្នំពេញ ភូគីត្រា ក្រោមកិច្ចសហការរៀបចំដោយ ធនាគារជាតិនៃកម្ពុជា សហគ្រិនខ្មែរ Swisscontact និង Good Return។
វេទិការនេះត្រូវបានប្រព្រឹត្តិឡើងដើម្បីឆ្លើយតបទៅនឹងគោលបំណងរួមគ្នារបស់ភាគីពាក់ព័ន្ធដើម្បីគាំទ្រសហគ្រិនស្ត្រីក្នុងការទទួលបានផលិតផលនិងសេវាហិរញ្ញវត្ថុនានា ក្នុងអំឡុងពេលនិងក្រោយពេលជំងឺរាតត្បាត កូវីដ-១៩ និង ដោយការសង្កេតឃើញនូវតម្រូវការសិក្សា ចែករំលែក និងសហការគ្នារវាងភាគីពាក់ព័ន្ធជាច្រើនដើម្បីផ្តល់ព័ត៌មាន និងផលិតផលហិរញ្ញវត្ថុសម្រាប់សហគ្រិនស្ត្រី។
បន្ទាប់ពីវេទិកានេះ យើងរំពឹងថានឹងអាចបង្កើនកិច្ចសហប្រតិបត្តិការរវាងតួរអង្គសំខាន់ៗ ដើម្បីពាំនាំនូវជម្រើសហិរញ្ញវត្ថុប្រកប ដោយសុវត្ថិភាពទៅដល់សហគ្រិនស្ត្រីវ័យក្មេងដើម្បីអោយពួកគេអាចពង្រីកនិងចាប់ផ្តើមមុខជំនួញរបស់ខ្លួន។
លោកស្រីសាប៉ីន យៅគ្គ ប្រធានគម្រោងសហគ្រិននារីសកម្មបានថ្លែងថា៖«ពួកយើងមានគោលបំណងក្នុងការផ្សារភ្ជាប់តួរអង្គសមាសភាពទាំងអស់ដើម្បីពាំនាំជម្រើសហិរញ្ញវត្ថុដែលឆ្លើយតបទៅនឹងតម្រូវការរបស់សហគ្រិនស្ត្រី ហើយដើម្បីប្រាកដថាយើងអាចបំពេញចន្លោះខ្វះខាត ដូចនេះសហគ្រិនស្ត្រីមានជម្រើសដ៏ល្អដែលឆ្លើយតបទៅនិងតម្រូវការរបស់ពួកគាត់។»
អ្នកចូលរួមវេទិការបានចែករំលែកព័ត៌មានអំពីតម្រូវការជាក់ស្តែងរបស់សហគ្រិនស្ត្រីនៅក្នុងប្រទេសកម្ពុជា និងបំផុសកិច្ចពិភាក្សាដើម្បីឆ្លុះបញ្ចាំងនិងជំរុញគ្រឹះស្ថានផ្តល់សេវាហិរញ្ញវត្ថុ និងភាគីពាក់ព័ន្ធនានា ក្នុងការបង្កើតផលិតផលនិងសេវាហិរញ្ញវត្ថុ និងពិចារណាពីលក្ខខណ្ឌសងត្រឡប់សមស្របណាមួយសម្រាប់សហគ្រិនស្ត្រីនៅអំឡុងពេលនៃការរីករាលដាលនៃជំងឺកូវីដ-១៩។
យោងទៅតាមប្រសាសន៏របស់ លោក រ័ត្ន សុវណ្ណនរៈ អគ្គនាយកត្រួតពិនិត្យ ធនាគារជាតិនៃកម្ពុជា៖ “ទោះបីជាកម្រិតបរិយាបន្នហិរញ្ញវត្ថុនៅកម្ពុជា មានកំណើនឡើងគួរឱ្យកត់សម្គាល់ ក៏ការជំរុញបរិយាបន្នហិរញ្ញវត្ថុនៅជួបប្រទះបញ្ហាប្រឈមមួយចំនួន ជាពិសេសចំពោះស្ត្រី។
ទោះជាស្ត្រីនិងបុរសមានលទ្ធភាពស្មើគ្នាក្នុងការទទួលបានសេវាហិរញ្ញវត្ថុ ប៉ុន្តែការប្រើប្រាស់សេវាហិរញ្ញវត្ថុរបស់បុរសនិងស្ត្រីនៅតែមានគម្លាត។ តួយ៉ាង នៅក្នុងប្រទេសកម្ពុជា មូលនិធិ UNCDF បានរកឃើញថាគណនីប្រាក់បញ្ញើប្រមាណ ៧០% គឺជាគណនីអសកម្មដែលមានសមតុល្យតិចតួចបំផុត ហើយភាគច្រើននៃគណនីទាំងនេះគឺជារបស់ស្ត្រី។ លើសពីនេះ មានភស្តុតាងជាច្រើនបានបង្ហាញថាលទ្ធភាពទទួលបានឥណទានរបស់ស្ត្រីនិងបុរសមានកម្រិតប្រហាក់ប្រហែលគ្នា ប៉ុន្តែទំហំឥណទានជាមធ្យមរបស់ស្ត្រីមានកម្រិតទាប បើធៀបនឹងទំហំឥណទានជាមធ្យមរបស់បុរស”។
លោក អគ្គនាយក បានបន្តទៀតថា៖ “ដើម្បីដោះស្រាយបញ្ហាប្រឈមទាំងនេះ ការជំរុញនវានុវត្តន៍សេវាឥណទានសម្រាប់សហគ្រាសធុនតូចនិងមធ្យម ការលើកកម្ពស់សិទ្ធិនិងបង្កើនកិច្ចការពារអតិថិជន ព្រមទាំងបង្កើនតម្លាភាពក្នុងវិស័យហិរញ្ញវត្ថុ ត្រូវបានកំណត់ជាសកម្មភាពអាទិភាពរបស់យើង”។
លោក ឈៀង វណ្ណមុនិណ្ឌ នាយកប្រតិបត្តិសហគ្រិនខ្មែរបានអោយដឹងថា “សហគ្រិនខ្មែរមើលឃើញពីគុណតម្លៃនៃការផ្តល់ឱកាសដល់ស្ត្រីក្នុងការជំរុញការបង្កើតអាជីវកម្មថ្មីៗដើម្បីប្រែក្លាយខ្លួនទៅជាអាជីវកម្មរឹងមាំសម្រាប់ការពង្រីកប្រព័ន្ធអេកូឡូស៊ីសហគ្រាស ការតភ្ជាប់សាជីវកម្ម និងការបណ្តាក់ទុនអាជីវកម្ម។ ការរាំងស្ទះសម្រាប់អាជីវកម្មក្នុងស្រុក ការចាប់ផ្តើមអាជីវកម្ម និងការរីកចម្រើនរបស់សហគ្រាសដំណាក់កាលដំបូង គឺការទទួលបានហិរញ្ញប្បទានសមស្រប។ ដូច្នេះវាគឺជាការចាំបាច់ក្នុងការធ្វើឱ្យប្រសើរឡើងនូវការទទួលបានហិរញ្ញវត្ថុតាមរយៈកម្មវិធីគាំទ្រភាពជាសហគ្រិនត្រូវបានបង្កើតឡើងតាមរយៈភាពជាដៃគូក្នុងចំណោមដៃគូ គ្រឹះស្ថានហិរញ្ញវត្ថុ និង វិនិយោគិន”។
លោកបានបន្ថែមថា៖«សហគ្រិនខ្មែរបានចាប់ផ្តើមបង្កើតកញ្ចប់ជំនួយសម្រាប់ការចាប់ផ្តើមចំនួន ២ លើកសម្រាប់សហគ្រាសទើបចាប់ផ្តើមថ្មីនិងសហគ្រាសធុនតូចនិងមធ្យមដែលជួបការលំបាកក្នុងអំឡុងពេលនៃការរីករាលដាលជំងឺកូវីដ-១៩។ មានអ្នកដាក់ពាក្យប្រហែល ៣០០ មកពីខេត្តចំនួន ១៩ និងសហគ្រាសចំនួន ២៧ បានទទួលជំនួយ។ ក្នុងចំណោមសហគ្រាសទាំង ២៧ ដែលទើបចាប់ផ្តើមថ្មីនិងសហគ្រាសធុនតូចនិងមធ្យមសហគ្រាស ៦០% នៃសហគ្រាសដែលឈ្នះគឺជារបស់សហគ្រិនស្ត្រី៕ រក្សាសិទ្ធិដោយ ៖ CEN
