ភ្នំពេញ ៖ បុរសជនជាតិហ្វីលីពីនម្នាក់រងរបួសធ្ងន់ ចំណែកម៉ូតូរងការខូចខាតទាំងស្រុង ខណៈពេលកំពុងជិះម៉ូតូឆ្លងផ្លូវត្រូវរថយន្តស៊េរីទំនើបមួយគ្រឿង បើកបុកឣូសជាច្រើនម៉ែត្រ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៧និង៤០នាទីព្រឹកថ្ងៃទី៧ ខែកុម្ភៈ ឆ្នាំ២០២១ ស្ថិតនៅចំណុចផ្លូវបំបែកជា៤ ផ្លូវលេខ៣២៧ កែងនឹងផ្លូវ៣២៧ ស្ថិតនៅសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
តាមប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុគេឃើញបុរសជនជាតិហ្វីលីពីនម្នាក់ ជិះម៉ូតូមួយគ្រឿងម៉ាកឣ៊ែប្លែក ពណ៌ខ្មៅពាក់ផ្លាកលេខ ភ្នំពេញ 1AB 3335
ចេញមកពីហាត់ប្រាណក្នុងទិសដៅពីកើតទៅលិច លុះដល់ចំណុចកើតហេតុនៅស្តុបផ្លូវបំបែកជា៤ ស្រាប់តែមានរថយន្តស៊េរីទំនើបមួយគ្រឿងទៀតម៉ាក Ford RANGER ពណ៌ទឹកប្រាក់ពាក់ផ្លាកលេខ ភ្នំពេញ 2BL 0038
បើកបរដោយបុរសជនជាតិខ្មែរ ទិសដៅពីជើងទៅត្បូងក្នុងល្បឿនលឿន បានជ្រុលទៅបុកជនរងគ្រោះដែលកំពុងជិះម៉ូតូឆ្លងផ្លូវយ៉ាងពេញទំហឹង បណ្តាលឲ្យរងរបួសបែកក្បាលហូរឈាម ត្រូវបានបញ្ជូនទៅកាន់មន្ទីរពេទ្យដើម្បីធ្វើការសង្គ្រោះបន្ទាន់។
ចំណែកឣ្នកបើកបរបានព្យាយាមបើករថយន្តរត់គេចខ្លួន តែត្រូវបានសមត្ថកិច្ចប៉ុស្តិ៍បឹងកក់ ស្ទាក់ចាប់បានភ្លាមៗ
ក្រោយពេលកើតហេតុ សមត្ថកិច្ចនគរបាលចរាចរណ៍ខណ្ឌទួលគោក ចុះមកធ្វើការវាស់វែងនិងយករថយន្តនិងម៉ូតូ ទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយគ្នានៅពេលក្រោយ៕ រក្សាសិទ្ធិដោយ ៖ សួង សាម
