ភ្នំពេញ ៖ ឯកឧត្តមស្បោង សារ៉ាត់ ក្រុមប្រឹក្សាខេត្តព្រៃវែង នៅថ្ងៃអង្គារទី៩ ខែកុម្ភៈ ឆ្នាំ២០២១ វេលាម៉ោង៩និង៣០នាទីព្រឹកនេះបានដឹកនាំប្រតិភូខេត្តអញ្ជើញចូលរួមអង្គ ភាព អ្នកនាំពាក្យរាជរដ្ឋាភិបាល នឹងរៀបចំសន្និសីទសារព័ត៌មានស្តីពី «វឌ្ឍនភាពមូល ដ្ឋានឃុំ សង្កាត់ និងទិសដៅការងារបន្តរបស់ខេត្តព្រៃវែង» ។
ថ្លែងក្នុងសន្និសីទសារព័ត៌មានឯកឧត្តម ស្បោង សារ៉ាត់ប្រធាបក្រុមប្រឹក្សាខេត្តព្រៃវែងបញ្ជាក់ថាខេត្តព្រៃវែងមានស្រុកចំនួន១២ ក្រុងចំនួន0១ ឃុំចំនួន១១២ សង្កាត់ចំនួន០៤ និងមានភូមិ១.១៤៩ មានប្រជាពលរដ្ឋ សរុប ១.២៤៩.៨១៣នាក់ ស្រីចំនួន៦៤៥.២៧០នាក់ ស្មើនឹង២៩០.១០៥គ្រួសារ ក្នុងនោះ ប្រជាពលរដ្ឋ ដែលមានអាយុចាប់ពី១៨ឆ្នាំឡើងទៅ មានចំនួន៨០០.៥៥៩នាក់ ស្រីចំនួន៤២២.០២៩នាក់។
ឯកឧត្តម ថ្លែងថា ខេត្តព្រៃវែងមានសក្តានុពលលើវិស័យស្រូវដោយពលរដ្ឋខេត្តព្រៃវែងធ្វើស្រូវ១ឆ្នាំបីដង ដែលស្រូវខេត្តព្រៃវែងជាប់លេខ១ចំនួនពីរឆ្នាំជាប់គ្នា។ តម្លៃស្រូវមានតម្លៃ១គីឡូក្រាមពី៨០០រៀលទៅ៩០០រៀល។
ឯកឧត្តមបញ្ជាក់ថាខេត្តមានផ្ទៃដីសរុប៤.៨៨៣គីឡូម៉ែត្រក្រឡា និងមានដង់ស៊ីតេប្រជាជន២៥៥នាក់/គម២។ ខេត្តព្រៃវែង មានប្រជាពលរដ្ឋប្រកបរបរកសិកម្មជាចម្បងចំនួន៦៣,៩% សិប្បកម្មមានចំនួន០,២% សេវាកម្មមាន៣៥,៩% ក្នុងនោះ អត្រាប្រាក់ចំណូលជាមធ្យមប្រចាំឆ្នាំ របស់ប្រជាពលរដ្ឋមានចំនួន១.២១៨,៩ដុល្លា ដែលធ្វើឱ្យអត្រានៃភាពក្រីក្រ របស់ប្រជាពលរដ្ឋថយចុះមកនៅត្រឹម៧,៤០%។
ខេត្តមានច្រកទ្វារ ព្រំដែនចំនួន០៦ ក្នុងនោះ មានច្រកទ្វារអន្តរជាតិចំនួន០៣កន្លែង គឺច្រកទ្វារព្រំដែនអន្តរជាតិបន្ទាយចក្រី កោះរការ ម៉ឺនជ័យ និងច្រកទ្វារតំបន់ព្រំដែនចំនួន០៣កន្លែង គឺច្រកទ្វារតំបន់ព្រំដែនកោះសំពៅ ពាមមន្ទារ ស្វាយអាង៉ោង។
ខេត្តព្រៃវែង ជាខេត្តដែលមានសក្តានុពលផ្នែកកសិកម្ម មានផ្ទៃដីបង្កបង្កើនផលសរុបចំនួន៣២៥.០០០ហិកតា ក្នុងនោះផ្ទៃដីស្រូវវស្សាអនុវត្តបាន២៨០.៣៩៩ហិកតា ស្មើនឹង១១២,១៦%នៃផែនការ២៥០.០០០ហិកតា លើសឆ្នាំមុនចំនួន៩.៨៥៥ហិកតា និងទទួលបានទិន្នផលជាមធ្យម៣.២៤០គីឡូក្រាម/ហិកតា ដែលមានបរិមាណផលសរុប៩០៨.៩៣៧តោន និងស្រូវប្រាំងអនុវត្តបានលើផ្ទៃដី៧១.៩៨៥ហិកតា ស្មើនឹង៩៥% នៃផ្ទៃដីគ្រោង៧៥.០០០ហិកតា ទិន្នផលជាមធ្យមបាន៤.៤៨៣គីឡូក្រាម/ហិកតា ព្រៃវែងជាខេត្ត ទទួលបានចំណាត់ថ្នាក់លេខ១ទូទាំងប្រទេសក្នុងការផលិតស្រូវ ជាប់គ្នា២ឆ្នាំ គឺឆ្នាំ២០១៩ និងឆ្នាំ២០២០។
ប្រជាជនមានការសប្បាយរីករាយ ដោយតម្លៃស្រូវបច្ចុប្បន្ននេះ មានតម្លៃល្អចន្លោះពី៩០០៛ ទៅ១២០០៛/គីឡូក្រាម។ ក្រៅពីដំណាំស្រូវ ខេត្តព្រៃវែងមានដំណាំរួមផ្សំជាច្រើនដូចជាៈ ពោត សណ្តែកល្ងអំពៅឈូកបន្លែ និងការ ចញ្ចឹមសត្វ គោ ក្របី ជ្រូក មាន់ទា ចញ្ចឹមត្រី បង្កង កង្កែប។
ក្នុងនោះ វិស័យសំខាន់ៗដែលលេចធ្លោ នៃកិច្ចអភិវឌ្ឍខេត្ត រួមមាន វិស័យធនធានទឹក ធារាសាស្ត្រ សាធារណការដឹកជញ្ជូន អភិវឌ្ឍន៍ជនបទ រៀបចំដែនដី សុខាភិបាល អប់រំ សាសនា សេដ្ឋកិច្ចហិរញ្ញវត្ថុ ពន្ធដារ ធនាគារ អគ្គិសនី ឧស្សាហកម្ម ទេសចរណ៍… ក៏បានខិតខំអនុវត្ត ទៅតាមតួនាទី ភារកិច្ច របស់ខ្លួនសម្រេចបានលទ្ធផលល្អប្រសើរ។
ចំពោះការងារសន្តិសុខ សណ្តាប់ធ្នាប់សាធារណៈទូទាំងខេត្ត សមត្ថកិច្ចគ្រប់ផ្នែក បានទប់ស្កាត់ទាន់ពេលវេលានូវរាល់សកម្មភាពជនអគតិមួយចំនួន និងរក្សាបាននូវ សណ្តាប់ធ្នាប់សាធារណៈតាមទីប្រជុំជន និងរក្សាបាននូវស្ថេរភាពនយោបាយ និងសុខក្សេមក្សាន្តជូនប្រជាពលរដ្ឋ។
លោកស៊ួ ភួង មេឃុំក្របៅ ថ្លែងថាឃុំក្របៅជាឃុំមួយ ក្នុងចំណោមឃុំទាំង០៨ នៃស្រុកកំចាយមារ ខេត្តព្រៃវែង ដែលមានព្រំប្រទល់ ខាងលិចទល់នឹងឃុំក្រញូង និងឃុំជាច ខាងកើតទល់នឹងឃុំកក់ ស្រុក ពញាក្រែក ខេត្តត្បូងឃ្មុំ និងឃុំតិនប៊ិន ស្រុកតិនបៀង ខេត្តតៃនិញ ប្រទេសវៀតណាម ខាងជើងទល់នឹងឃុំដូនតី ស្រុកពញាក្រែក ខេត្តត្បូងឃ្មុំ ខាងត្បូងទល់នឹងឃុំអណ្តូងត្របែក ស្រុករមាសហែក ខេត្តស្វាយរៀង។
lលោកមេឃុំបន្តថាឃុំមានភូមិចំនួន១១ភូមិ មានប្រជាពលរដ្ឋសរុបចំនួន៣.០៣១គ្រួសារ ស្មើនឹងមនុស្ស សរុបចំនួន១០.៤០៤នាក់ ស្រីចំនួន៥.២២៦នាក់ ប្រជាពលរដ្ឋអាយុ១៨ឡើង ចំនួន៥.៨៦៩នាក់ស្រីចំនួន៣.០៧២នាក់ ប្រជាជនមានឈ្មោះក្នុងបញ្ជីបោះឆ្នោតចំនួន៥.៩២៣នាក់ ស្រីចំនួន ៣.២៥៣នាក់។
លំនៅដ្ឋានប្រជាពលរដ្ឋឃុំក្របៅមានចំនួន២.៤៨០ខ្នង ក្នុងនោះ ផ្ទះស្បូវ ចំនួន៤៤ខ្នង ផ្ទះស៊ីប្រូស៊ីម៉ង់ស៍ចំនួន៨៩៣ខ្នងផ្ទះក្បឿងចំនួន១.៤១៣ខ្នង ផ្ទះថ្មមិនមែនបេតុងចំនួន១១៧ខ្នង ផ្ទះថ្មល្វែងចំនួន០៥ខ្នង ផ្ទះភូមិគ្រឹះ(វិឡា)ចំនួន០៨ខ្នង។
ឯកឧត្តមបន្តថា ការរៀបចំឃុំ/សង្កាត់របស់យើងមានតម្លាភាព និងមានការដេញថ្លៃត្រឹមត្រូវ ជាសាធារណៈមានការចូលរួមពីមហាជននិងក្រុមប្រឹក្សាស្រុក ខេត្ត និងអង្គភាពប្រឆាំងអំពើពុករលួយចូលរួមពិនិត្យ។ នេះជាអ្វីដែលឆ្លើយតបនឹងអភិបាលកិច្ចល្អ របស់ក្រុមប្រឹក្សាឃុំ/សង្កាត់ដែលបានខិតខំរបស់ខ្លួន។
ឯកឧត្តមបានសង្កត់ធ្ងន់ថា ក្រោមការដឹកនាំដ៍ត្រឹមត្រូវរបស់សម្តេចតេជោហ៊ុនសែន នាយករដ្ឋមន្ត្រី ក្រុមប្រឹក្សាឃុំ/សង្កាត់បានមកពីការបោះឆ្នោតពីប្រជាពលរដ្ឋ ក្នុងឃុំសង្កាត់និមួយៗរបស់ខ្លួនជាអង្គការគ្រឹះរបស់ឃុំ/សង្កាត់ ដែលជាយន្តការប្រជាធិបតេយ្យមូលដ្ឋានជាអង្គការនៅជាប់ប្រជាពលរដ្ឋ យើងបានធ្វើបានល្អប្រសើរនិងប្រកបអភិបាលកិច្ចល្អ ដែលបានបម្រើផលប្រយោជន៍ប្រជាពលរដ្ឋ មិនប្រកាន់និន្ននាការនយោបាយឡើយ៕ រក្សាសិទ្ធដោយ ៖ CEN
