ភ្នំពេញ ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា បានថ្លែងថា ក្រសួងសុខាភិបាលសូមជូនព័ត៌មានថា សរុបអ្នកមកចាក់ថ្ងៃទី១០ ខែកុម្ភៈ ឆ្នាំ២០២១ចំនួន ៤២៥នាក់ (ស្រី ១០៤នាក់) ។ អ្នកបានចាក់វ៉ាក់សាំងរួចចំនួន ៣៣៩នាក់ (ស្រី ៧៥នាក់) និងអ្នកដែលគ្រូពេទ្យមិនអនុញ្ញាតឲ្យចាក់ចំនួន ៨៦នាក់ (ស្រី ២៩នាក់)។
សេចក្តីជូនព័ត៌មានរបស់ក្រសួងសុខាភិបាល ស្តីពីកម្មវិធីចាក់វ៉ាក់សាំងកូវីដ-១៩ ជាបន្ត នៅថ្ងៃទី១១ ខែកុម្ភៈ ឆ្នាំ២០២១ និងថ្ងៃបន្តបន្ទាប់។
ក្រសួងសុខាភិបាល សូមគោរពជម្រាបជូនសាធារណជនទាំងអស់ ឲ្យបានជ្រាបពីកម្មវិធីចាក់វ៉ាក់ សាំងដោយឈរលើគោលការណ៍ស្ម័គ្រចិត្ត សម្រាប់ថ្ងៃទី១១ ខែកុម្ភៈ ឆ្នាំ២០២១ និងថ្ងៃជាបន្តបន្ទាប់ទៀត។
សម្រាប់ឥស្សរជន និងអ្នកដែលមិនទាន់បានចាក់នៅថ្ងៃទី១០ ខែកុម្ភៈ ឆ្នាំ២០២១ ៖ ឯកឧត្តម លោកជំទាវ លោក លោកស្រី ដែលនៅក្នុងក្រុមដែលក្រសួងសុខាភិបាល បានជូនព័ត៌មានកាលពីថ្ងៃទី៨ ខែកុម្ភៈ ឆ្នាំ២០២១ រួចហើយនោះ ហើយដែលមិនទាន់បានអញ្ជើញទៅចាក់វ៉ាក់សាំងកូវីដ-១៩ សូមអញ្ជើញទៅចាក់តាមទីកន្លែង ដែលក្រសួងសុខាភិបាលបានជូនព័ត៌មាន កាលពីថ្ងៃទី៨ ខែកុម្ភៈ ឆ្នាំ២០២១ រួចហើយ ដូចជា មន្ទីរពេទ្យកាល់ម៉ែត មន្ទីរពេទ្យកុមារជាតិ មន្ទីរពេទ្យព្រះអង្គឌួង និងមន្ទីរពេទ្យមិត្តភាពខ្មែរសូវៀត។
ការចាក់វ៉ាក់សាំងកូវីដ-១៩ នេះ ត្រូវបន្តធ្វើជារៀងរាល់ថ្ងៃ ធ្វើការចាប់ពីម៉ោង០៨និង០០នាទីព្រឹក ដល់ម៉ោង១៧និង០០នាទីល្ងាច (ដោយសម្រាកពិសារអាហារថ្ងៃត្រង់ ពីម៉ោង១២និង០០នាទីដល់ម៉ោង ១៤និង០០នាទី)។
ឥស្សរជន និងអ្នកដែលបានចាក់ដូសទី១រួចហើយ សូមអញ្ជើញទៅចាក់ដូសលើកទី២ នៅតាមទីកន្លែងដែលខ្លួនបានចាក់លើកទី១ (ចន្លោះថ្ងៃទី១៤ ដល់ថ្ងៃទី២៨ (មិនឲ្យលើសពីថ្ងៃទី២៨) គិតបន្ទាប់ពីថ្ងៃដែលបានចាក់លើកទី១)។
ក្រសួងសុខាភិបាល បន្តជូនដំណឹងដល់សាធារណជន អំពីក្រុមអាយុពី១៨ឆ្នាំ ដល់ ៥៩ឆ្នាំ ផ្សេងៗទៀត ដែលនឹងសូមអញ្ជើញទៅចាក់វ៉ាក់សាំងកូវីដ-១៩ ដោយស្ម័គ្រចិត្ត នៅពេលក្រោយៗទៀត។
សូមបងប្អូនប្រជាពលរដ្ឋដែលស្ថិតនៅក្នុងក្រុមអាទិភាពផ្សេងៗទៀតនោះ ដែលស្ម័គ្រចិត្តចាក់វ៉ាក់សាំងកូវីដ-១៩ មេត្តាអធ្យាស្រ័យ ប្រសិនបើមិនទាន់ដល់វេនរបស់ខ្លួនទេនោះ សូមមេត្តារង់ចាំបន្តិចសិន ដោយសារវ៉ាក់សាំងមានចំនួនកំណត់នៅពេលនេះ និងដើម្បីឲ្យអ្នកដែលបានស្ម័គ្រចិត្តចាក់រួចហើយនោះ មានវ៉ាក់សាំងគ្រប់គ្រាន់សម្រាប់ដូសលើកទីពីរទៀតផងដែរ៕ រក្សាសិទ្ធិដោយ៖បញ្ញាស័ក្តិ
