កំពត ៖ យោងតាមសេចក្តីរាយការណ៍ពីខេត្តកំពត បានបញ្ជាក់នៅថ្ងៃទី១២ខែកុម្ភៈឆ្នាំ២០២១នេះថា ជនរងគ្រោះឈ្មោះ ថាន់ ហាំ អាយុ៣២ឆ្នាំ បានស្លាប់ភ្លាមៗបន្ទាប់ពីជួបគ្រោះថ្នាក់ដោយជិះម៉ូតូបុកសត្វគោកំពុងដើរឆ្លងផ្លូវ។
ហេតុការណ៍នេះបានកើតឡើងកាលពីវេលាម៉ោង៦ និង៣០នាទីព្រលប់ថ្ងៃទី១១ ខែកុម្ភៈ ឆ្នាំ២០២១ នៅលើដងផ្លូវជាតិលេខ៤១ ស្ថិតក្នុងភូមិល្អាង ឃុំល្អាង ស្រុកដងទង់ ខេត្តកំពត។
មន្ត្រីអធិការរដ្ឋាននគរបាលស្រុកដងទង់ បានប្រាប់សារព័ត៌មានក្នុងស្រុកថា ជនរងគ្រោះ មានទីលំនៅភូមិស្រែជ្រៅ ឃុំល្បើក ស្រុកឈូក ខេត្តកំពត។ មុនពេលកើតហេតុ គេឃើញបុរសរូបនោះជិះម៉ូតូម្នាក់ឯង លើផ្លូវជាតិលេខ៤១ក្នុងទិសដៅពីកើតទៅលិចដោយមិនមានពាក់មួកសុវត្ថិភាពទេ។
នគរបាលបានអះអាងថាពេលជនគ្រោះជិះមកដល់ចន្លោះគីឡូម៉ែត្រលេខ៩៥-៩៦ ស្របពេលដែលមានសត្វគោមួយក្បាលដើរឆ្លងផ្លូវ ម៉ូតូនោះក៏បុកពេញទំហឹងបណ្តាលឱ្យដួលខ្លួនឯងតែម្តង។ ប្រភពដដែលបានបញ្ជាក់ថា ក្នុងស្ថានភាពបែបនោះ អ្នកជិតខាងបាននាំគ្នាចូលទៅជួយ ស្រាប់តែឃើញជនរងគ្រោះស្លាប់ភ្លាមៗ ។
ក្រោយពេលកើតហេតុសមត្ថកិច្ចដើម្បីស្វែងរកសាច់ញាតិមកទទួលយកសព។ ចំពោះម៉ូតូជនរងគ្រោះម៉ាកហុងដាឌ្រីម C125 ផលិតឆ្នាំ២០២០ ពណ៌ខ្មៅ ពាក់ផ្លាកលេខ កំពត1R -1125 និងសត្វគោពាក់ព័ន្ធនឹងហេតុការណ៍នេះ ត្រូវបានយកទៅរក្សាទុកនៅអធិការដ្ឋាននគរបាលស្រុកដងទង់ដើម្បីដោះស្រាយនាពេលក្រោយ៕ រក្សាសិទ្ធិដោយ៖CEN
