ភ្នំពេញ ៖ សិស្សវិទ្យាល័យ ប៊ុន រ៉ានី ហ៊ុនសែន កោះដាច់ បានដួលសន្លប់ ជាបន្តបន្ទាប់ ចំនួន ៤៦នាក់ហើយត្រូវបានលោកគ្រូអ្នកគ្រូ បានដឹកបញ្ជូន ទៅសង្គ្រោះនៅមណ្ឌលសុខភាពកោះដាច់ ។ ទោះបីជាយ៉ាងណា ពុំមានយុវសិស្សណាម្នាក់ គ្រោះថ្នាក់ដល់អាយុជីវីតឡើយ។
ហេតុការណ៍ នេះបង្កឲ្យមានការភ្ញាក់ផ្អើល ជាបន្តបន្ទាប់ ហើយនៅថ្ងៃទី១២ ខែ កុម្ភៈឆ្នាំ ២០២១ យុវសិស្សបានដួលសន្លប់កាន់តែច្រើនរហូត១៨នាក់ក្នុង១ថ្ងៃទី១២នេះ ធ្វើឲ្យ លោកគ្រូអ្នកគ្រូបង្ខំចិត្តឲ្យសិស្សទាំងអស់ឈប់សម្រាកតែម្តង ។ ទន្ទឹមនោះ នៅវេលារសៀលមន្ទីរសុខាភិបាល រាជធានីភ្នំពេញ, មន្ទីរអប់រំយុជននិងកីឡារាជធានីភ្នំពេញ និងអាជ្ញាធរខណ្ឌជ្រោយចង្វា បានចុះទៅស្រាយជ្រាវ សាកសួររកពីមូលហេតុនៃការដួលសន្លប់នេះ ។
តាមព័ត៌មានឲ្យដឹងថា យុវសិស្ស វិទ្យាល័យនេះ បានដួលសន្លប់ ជាបន្តបន្ទាប់ រយៈពេល ៨ថ្ងៃ មកហើយគិតចាប់ពីថ្ងៃទី៤ ដោយពុំដឹងពីមូលហេតុឡើយ ហើយយុវសិស្សខ្លះ បានសម្រាកព្យាបាលបានធូរស្រាលហើយ និងបានចូលទៅវិញក៏បានដួលសន្លប់ម្តងទៀត។
បើតាមលោកឃុយ គឹមឡេង ប្រធានមណ្ឌលសុខភាពកោះដាច់ បានឲ្យដឹងថា យុវសិស្ស បានដួលសន្លប់ ជាបន្តបន្ទាប់ ចាប់តាំងពីថ្ងៃទី៤ ខែ កុម្ភៈមកម្លេះ ដោយថ្ងៃមុនដំបូង ១នាក់, ២នាក់ហើយថ្ងៃទី១១ខែកុម្ភៈ ចំនួន ១១នាក់និងថ្ងៃទី១២ ខែ កុម្ភៈយុវសិស្សដួលសន្លប់ចំនួនរហូតដល់១៨នាក់ ដែលសរុបទាំងអស់ចំនួន ៤៦នាក់ ក្នុងនោះមាននារី៤៥នាក់ និងប្រុសស្លៀកពាក់ធ្វើជាស្រីចំនួន ១នាក់ ។
លោកប្រធានមណ្ឌលសុខភាព បានឲ្យដឹងទៀតថា ការដួលសន្លប់ យុវសិស្សមានអការថប់ដង្ហើមពិបាកដកដង្ហើម ។ ភ្លាមៗ ត្រូវបានលោកគ្រូអ្នកគ្រូបញ្ជូន ទៅសម្រាកនៅមណ្ឌលសុខភាព។
ទាក់ទិនមូលហេតុ នៃការដួលសន្លប់ ត្រូវបានមន្ត្រីសុខាភិបាល បានឲ្យដឹងថា ដោយសារតែយុវសិស្សខ្សោយ ខ្វះជាតិស្ករ ញាំមិនគ្រប់គ្រាន់ ហើយនៅពេលមានយុវសិស្សណាម្នាក់ដួលសន្លប់ភ័យ ក៏បានដួលសន្លប់ជាបន្តបន្ទាប់។
លោក ឃុយ គឹមឡេង ប្រធានមណ្ឌលសុខភាពកោះដាច់ ក៏បានផ្ញាំផ្ញើដល់សិស្សានុសិស្ស ត្រូវពង្រឹងស្មារតី ឡើងវិញនេះមិនមែនជាជំងឺឆ្លងនោះទេ គឺដោយសារតែមានអារម្មណ៍ភ័យ ឃើញម្នាក់ដួលសន្លប់ ក៏បានដួលសន្លប់តៗគ្នា ។ អការបែបនេះត្រូវសង្គ្រោះសន្ទ្រាន់ បើសិនជាបណ្តែតបណ្តោយទុកឲ្យយុវសិស្សរូបនោះ នៅតែឯងអាចបណ្តាលឲ្យមានគ្រោះថ្នាក់ដល់អាយុជីវិតដែរ។
ចំណែកអ្នកស្រុកដែលជាអនាព្យាបាលសិស្សក៏មានការសង្ស័យ ថាបណ្តាលមកពីការចាក់សំរាម និងកាកសំណល់ហើយដុត នៅមុខខ្ទមអ្នកតា ទើបអ្នកតាកាច់បណ្តាលឲ្យវសិស្សថ្នាក់ទី១១និង១២ បានដួលសន្លប់ជាបន្តបន្ទាប់បែបនេះ ៕ រក្សាសិទ្ធិដោយ៖សារឿន
