ភ្នំពេញ ៖ ការប្រកបមុខរបរប្រចាំរបស់ប្រជាពលរដ្ឋខេត្តក្រចេះត្រូវបានលើកឡើងដោយលោក សេក ប៊ុនហេង អភិបាល នៃគណៈអភិបាលក្រុងក្រចេះ ក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីនៅព្រឹកថ្ងៃទី១៦ខែកុម្ភៈឆ្នាំ២០២១ ស្តីពី “វឌ្ឍនភាពមូលដ្ឋាន ឃុំ សង្កាត់ និងទិសដៅការងារបន្តរបស់ខេត្តក្រចេះ”។
ក្រុងក្រចេះ គឺជាក្រុងមួយក្នុងចំណោមក្រុង ស្រុកទាំង ០៦ នៃខេត្តក្រចះ ដែលបានបង្កើតឡើងចាប់ពីឆ្នាំ ២០០៩ តាមអនុក្រឹត្យលេខ ១០ អនក្រ.បក ចុះ ថ្ងៃទី០៩ ខែមករា ឆ្នាំ២០០៩ មានព្រំប្រទល់ ខាងលិចទល់នឹងស្រុកព្រែកប្រសព្វ ខាងកើត ខាងជើង ខាងត្បូង ជាប់ព្រំប្រទល់ នៃស្រុកចិត្របុរី មានផ្ទៃដីសរុប 88,89 គីឡូម៉ែត្រការ៉េ ចែកចេញជា ៥សង្កាត់ មាន ១៦ ភូមិ។
លោកអភិបាលក្រុងក្រចេះបានបញ្ជាក់ថាប្រជាពលរដ្ឋ ប្រកបរបរកសិកម្ម 40.3 % មុខរបរសិប្បកម្ម 2% និងផ្នែកសេវាកម្ម 57.7%។ ប្រជាពលរដ្ឋដែលមានទឹកស្អាតប្រើប្រាស់ចំនួន 100% និងថាមពលអគ្គីសនីចំនួន 100%។
ក្រុងក្រចេះមានប្រជាពលរដ្ឋរស់នៅ សរុបចំនួន 7.625 គ្រួសារ (ក្នុងនោះគ្រួសារអចិន្ត្រៃយ៍ចំនួន 7.450 គ្រួសារ គ្រួសារបណ្តោះអាសន្ន ចំនួន 175 គ្រួសារ) ប្រជាពលរដ្ឋសរុបចំនួន 31.824 នាក់ ក្នុងនោះជាស្ត្រីចំនួន 16.173 នាក់ ប្រជាពលរដ្ឋមានអាយុ ១៨ ឆ្នាំឡើង 20.863 នាក់ ក្នុងនោះជាស្ត្រីចំនួន 10.852 នាក់។
លោកបានលើកឡើងថាផ្នែករដ្ឋបាលឆ្នាំ២០២០នេះ ការអនុវត្តកំណែទំរង់វិមជ្ឈការ និងវិសហមជ្ឈការបានឈានដល់ដំណាក់កាលចុងក្រោយនៃការអនុវត្តផែនការនៃកម្មវិធីជាតិរយៈពេល១០ឆ្នាំ (២០១០-២០១៩) សមិទ្ធិផលដ៏សំខាន់ និងចាត់ទុកជាប្រវត្តិសាស្ត្រនោះ គឺការកែសម្រួលរចនាសម្ព័ន្ធថ្មីរបស់រដ្ឋបាលក្រុង-ស្រុក-ខណ្ឌ និងការប្រគល់មុខងារ និងវិស័យជាច្រើនទៅឱ្យរដ្ឋបាលក្រុង-ស្រុក-ខណ្ឌ ក្នុងនោះមានមុខងារចំនួន 55 និងមុខងាររងចំនួន 162 ក្នុងវិស័យចំនួន 19 និងផ្ទេរមុខងារវិស័យ សុខាភិបាល ឱ្យស្ថិតក្រោមការគ្រប់គ្រងចាត់ចែង របស់រដ្ឋបាលរាជធានី-ខេត្ត។
ដោយឡែក វិស័យទេសចរណ៏ ៖ ក្រុងក្រចេះ មានតំបន់ទេសចរណ៏ចំនួន 2 កន្លែង មានសណ្ឋាគារ និងផ្ទះសំណាក់ ចំនួន 39 កន្លែង ភោជនីយដ្ឋាន និងអាហារដ្ឋាន ចំនួន 49 កន្លែង និងមាន ភ្ញៀវទេសរណ៏ជាតិ 16.850នាក់ និងអន្តរជាតិ 376 នាក់ ក្នុងឆ្នាំ 2020 ។
លោកបានបញ្ជាក់ថា៖យើងមានរមណីយដ្ឋានទេសចរណ៍ ១កន្លែងនៅសង្កាត់កោះទ្រង់ ដោយបញ្ហាកូវីដ 19 ផងក៏នៅមានភ្ញៀវទេសចរណ៍ចូលទៅកម្ហសាន្តនិងស្នាក់នៅទីនោះ។ ភ្ញៀវអន្តរជាតិមានចំនួន 376នាក់ និងភ្ញៀវជាតិមានចំនួន 16850នាក់ ដែលទទួលបានប្រាក់ចំណូលពីភ្ញៀវទេសចរណ៍ចំនួន 126.371.000៛ ក្នុងឆ្នាំ ២០២០កន្លងទៅនេះ និងមានរមណីដ្ឋានវប្បធម៌ ១កន្លែង នៅសង្កាត់រកាកណ្តាល។
រាជរដ្ឋាភិបាលបានដាក់ចេញនូវអនុក្រឹត្យចំនួន 03 ដើម្បីជំរុញឲ្យរចនាសម្ព័ន្ធថ្មីទាំងនេះ ចាប់ផ្ដើមបំពេញការងាររបស់ខ្លួន ចាប់ពីឆ្នា២០២០ នេះតទៅ។ ក្រោយសមាហរណកម្ម រដ្ឋបាលក្រុងក្រចេះ មានការិយាលយ័ចំណុះចំនួន 13 មានមន្ត្រីក្របខណ្ឌសរុបចំនួន 47នាក់ ស្រី 23នាក់ និងមន្ត្រីជាប់កិច្ចសន្យាចំនួន 2នាក់ ស្រី 1នាក់ ស្មៀន 5នាក់ ស្រី 2នាក់ និង ក្រុមប្រឹក្សាក្រុងចំនួន 15នាក់ ស្រី 1នាក់។
ផ្នែកសេដ្ឋកិច្ច + វិសយ័កសិកម្ម ៖ មានផ្ទៃដីដាំដុះចំនួន 2.603ហ.ត ក្នុងនោះស្រូវវស្សាចំនួន 1.064ហ.ត ស្រូវប្រាំង1.370ហ.ត និងដំណាំរួមផ្សំចំនួន 169ហ.ត។ កំពុងប្រមូលផលស្រូវប្រាំងជាបណ្តើរៗបានប្រមាណ 550ហ.ត ទិន្នផលជាមធ្យមប្រមាណ 4.298គ.ក ក្នុងមួយហិចតា។ និងមានការចិញ្ចឹមសត្វគោ ជ្រូក មាន់ ទា ជាលក្ខណៈគ្រួសារផងដែរ។ល។ មានទំនប់ 6កន្លែង និងបឹងធំៗចំនួន 6កន្លែង ដែលបំរើឱ្យការស្រោចស្របបានគ្រប់គ្រាន់។ មានរោងចក្រដំឡូងមី 1កន្លែង ដែលមានកំលាំងផលិតម្សៅមីចំនួន 250តោនក្នុងមួយថ្ងៃ ប្រើកំលាំងកម្មករបុគ្គលិកចំនួន 270នាក់។
នៅសង្កាត់កោះទ្រង់ យើងមានដំណាំសេដ្ឋកិច្ច(ក្រូចថ្លុង)មានចំនួន 8817ដើម កំពុងអោយផលចំនួន3414ដើម។ ក្នុងមួយឆ្នាំៗប្រជាពលរដ្ឋទទួលបានចំណូលពីការដាំក្រូចនេះចំនួន 358.680ដុល្លា។
+ សេវាសាធារណៈ ៖ នៅការិយាល័យច្រកចេញចូលតែមួយ ផ្តល់សេវាសាធារណៈជូនដល់ប្រជាពលរដ្ឋដែលមកទទួលសេវាលើវិស័យចំនួន 14 បានចំនួន សរុប 7.617 សេវា ។ ក្នុងនេះរួមមានៈ វិស័យនីត្យានុកូលកម្ម ចំនួន 5.898 សេវា, អត្រានុកូលដ្ឋាន ចំនួន 982 សេវា, ទេសចរណ៍ ចំនួន 39 សេវា, វប្បធម៌ចំនួន 45 សេវា, ពាណិជ្ជកម្មចំនួន 203សេវា, ឧស្សាហកម្មចំនួន 23 សេវា, កសិកម្មចំនួន 08 សេវា, សុខាភិបាលចំនួន 17 សេវា, អប់រំចំនួន 12 សេវា, ការងាររដ្ឋបាលចំនួន 14 សេវា,សំណង់ចំនួន 110 សេវា, សុរិយោដីចំនួន 10សេវា, សាធារណការចំនួន 285 សេវា។
ការផ្ទេរសមត្ថកិច្ចក្នុងការផ្តល់សៀវភៅគ្រួសារ(ក៤) និងសៀវភៅស្នាក់នៅ(ក២) ដល់អធិការក្រុង និងប៉ុស្ដិ៍នគរបាលរដ្ឋបាល ចាប់ពីថ្ងៃទី១ ខែកក្កដា ឆ្នាំ២០២០ បានផ្តល់ សៀវភៅគ្រួសារ(ក៤)ថ្មីដែលចុះហត្ថលេខាត្រឹមអធិការនគរបាលក្រុង ចំនួន 241គ្រួសារ, ទុតិយតា(ក៤) ចំនួន 24គ្រួសារ, ផ្ដល់សៀវភៅស្នាក់នៅ(ក២)ថ្មីដែលចុះហត្ថលេខាត្រឹមប៉ុស្តិ៍នគរបាលរដ្ឋបាល បានចំនួន 248គ្រួសារ, ទុតិយតា(ក២) ចំនួន 24គ្រួសារ, និងផែនការបន្តធ្វើអត្តសញ្ញាណប័ណ្ណ សម្រាប់ឆ្នាំ២០២១ ។
ប្រជាពលរដ្ឋមានការសប្បាយរីករាយគាំទ្រយ៉ាងពេញទំហឹងចំពោះរាជរដ្ឋាភិបាលដែលបានបង្ខិតសេវាមកដល់មូលដ្ឋាន និងសេវាជាច្រើន មិនយកកំរ៉ៃសេវា។ធ្វើអត្តសញ្ញាណ ប័ណ្ណ សញ្ជាតិខ្មែរគំរូថ្មីជូនប្រជាពលរដ្ឋ សរុបចំនួន 1.004 នាក់ ស្រី 549នាក់ និងបានចែកជូនដល់ប្រជាពលរដ្ឋដល់ផ្ទះ។
សូមជម្រាបថាវិស័យហេដ្ឋារចនាសម្ពន្ធ័ ៖ ក្រុងក្រចេះ មានផ្លូវកៅស៊ូ 22.950 ម៉ែត្រ ផ្លូវបេតុង 7.650 ម៉ែត្រ ផ្លូវគ្រួសក្រហម 66.695ម៉ែត្រ មានស្ពានបេតុងចំនួន 4កន្លែង និងស្ពានដែកបេឡេ 1 កន្លែង ។ ផ្សារចំនួន ៣ ក្នុងនោះ មាន ២ កន្លែង (ផ្សារសាមគ្គីក្រុងក្រចេះ និងផ្សារអូរឬស្សី ) ជាអំណោយរបស់ សម្ដេចតេជោនាយករដ្ឋមន្ដ្រី ៕ រក្សាសិទ្ធិដោយ៖CEN
