ខេត្តកណ្តាល ៖ លោករដ្ឋមន្ត្រីខៀវ កាញារីទ្ធ បានចេញផ្សាយព័ត៌មានលើផេកផ្លូវការថា នៅរសៀលថ្ងៃទី២១ ខែកុម្ភៈ ឆ្នាំ២០២១ អាជ្ញាធរចុះបិទទីតាំងហាងខារ៉ាអូខេ(ឡូហ្ស៊ិត២) បន្ទាប់ពីរកឃើញប្តីស្ត្រីបម្រើការងារនៅទីនោះមានផ្ទុកជម្ងឺកូវីដ-១៩ ហើយភរិយាធ្វើការនៅក្លឹបកម្សាន្ត N8 ដែលជាកន្លែងកើតមានឆ្លងកូវីដ-១៩ ក្នុងសហគមន៍នៅក្រុងភ្នំពេញ។ បុគ្គលិកក្លឹបកម្សាន្តឡូហ្សិច២ ចំនួន៧៤នាក់ ក្នុងនោះមានបុរស១១នាក់ បានបញ្ជូនយកទៅធ្វើចត្តាឡីស័កនៅសាលាបឋមសិក្សាព្រែកល្ពៅ ស្ថិតក្នុងភូមិដើមមៀន សង្កាត់-ក្រុងតាខ្មៅ ខេត្តកណ្តាល។
តាមការអោយដឹងពីក្រុមការងារ គឺសមត្ថកិច្ច និងអាជ្ញាធរក្រុងតាខ្មៅ បានចុះបិទទីតាំងហាងផឹកស៊ី និងខារ៉ាអូខេ (យីហោឡូហ្ស៊ិត២) នៅតាមបណ្តោយផ្លូវ២១០ ស្ថិតក្នុងភូមិព្រែកសំរោង សង្កាត់/ក្រុងតាខ្មៅ ខេត្តកណ្តាល។
សមត្ថកិច្ចប្រាប់ថា ការចុះបិទទីតាំងខារ៉ាអូខេ(ឡូហ្ស៊ិត២) នេះធ្វើឡើង បន្ទាប់ពីរកឃើញបុរសម្នាក់ឈ្មោះ គង់ ចាន់ឌី អាយុ ៣៩ឆ្នាំ បម្រើការងារនៅទីនោះ មានផ្ទុកជម្ងឺកូវីដ១៩ ។ បុរសរូបនេះមានប្រពន្ធនៅបម្រើការងារក្នុងហាងផឹកស៊ី និងខារ៉ាអូខេផងដែរ។ ទើបសមត្ថកិច្ច និងអាជ្ញាធរ សម្រេចចុះបិទទីតាំងនេះ ជាបណ្តោះអាសន្ន រកអ្នកដែលពាក់ព័ន្ធយកសំណាក និងនាំពួកគាត់យកទៅធ្វើចត្តាឡីស័ក ។
ចំពោះស្ត្រីខាងលើត្រូវបាននាំយកទៅធ្វើចត្តាឡីស័កនៅមណ្ឌលសុខភាពចាក់អង្រែ ។ដោយឡែកទីតាំងផ្ទះជួលប្តីប្រពន្ធខាងលើនេះមានទីតាំងស្ថិតក្នុងភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ និងទីតាំងផ្ទះនៅស្រុកកៀនស្វាយ ក៏ត្រូវបានសមត្ថកិច្ចចុះបិទជាបណ្តោះអាសន្នផងដែរ។
រដ្ឋបាលខេត្តកណ្តាល បានឲ្យដឹងថា ឯកឧត្តមអភិបាលរងខេត្តបានដឹកនាំក្រុមការងារចុះពិនិត្យ និងបញ្ជូនអ្នកពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ ដែលជាបុគ្គលិកបម្រើការងារនៅភោជនីយដ្ឋានឡូហ្សិក២ ចំនួន៧៥នាក់ ដើម្បីដាក់ឱ្យធ្វើចត្តាឡីស័កនៅមណ្ឌលចត្តាឡីស័ក។ រសៀលថ្ងៃទី២១ ខែកុម្ភៈ ឆ្នាំ២០២១
ឯកឧត្តម គង់ សោភ័ណ្ឌ អភិបាល នៃគណអភិបាលខេត្តកណ្តាល បានដឹកនាំក្រុមការងារចុះពិនិត្យ និងបញ្ជូនអ្នកពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ ដែលជាបុគ្គលិកបម្រើការងារនៅភោជនីយដ្ឋានឡូហ្សិក២ ចំនួន៧៥នាក់ ដើម្បីដាក់ឱ្យធ្វើចត្តាឡីស័កនៅមណ្ឌលចត្តាឡីស័ក ស្ថិតក្នុងសាលាបឋមសិក្សាព្រែកតាពៅ ភូមិព្រែកតាពៅ សង្កាត់ដើមមៀន ក្រុងតាខ្មៅ និងបានបញ្ជាឱ្យផ្អាកដំណើការអាជីវកម្មភោជនីយដ្ឋាននេះជាបណ្តោះអាសន្ន។
ក្នុងប្រតិបត្តិការនេះដែរ ឯកឧត្តម បានណែនាំដល់ បងប្អូន ក្មួយៗដែលត្រូវធ្វើចត្តាឡីស័កទាំងអស់នាពេលនេះ ត្រូវចូលរួមគោរព អនុវត្តឱ្យបានដាច់ខាតតាមការណែនាំរបស់ក្រសួងសុខាភិបាល និងត្រូវចូលរួមផ្តល់សំណាក ដើម្បីធ្វើតេស្ត ឱ្យបានគ្រប់តាមលក្ខខណ្ឌរបស់ក្រុមគ្រូពេទ្យជំនាញ រីឯអាជ្ញាធរ មានសមត្ថកិច្ចត្រូវយកចិត្តទុកដាក់ ការពារ យាមកាម ដោយមិនត្រូវមានការធ្វេសប្រហែស បណ្តាល ឱ្យអ្នកធ្វើចត្តាឡីស័ក លួចរត់ចេញពីមណ្ឌលចត្តាឡីស័កបាន ជាដាច់ខាត៕ រក្សាសិទ្ធិដោយ៖បញ្ញាស័ក្តិ
