បន្ទាយមានជ័យ : ព្រះសង្ឃ២អង្គរងរបួសធ្ងន់ ដោយសាររថយន្តតូចម៉ាកតូយ៉ូតាកាមរីឆ្លាម១គ្រឿង បានបើកបុកម៉ូតូពេលកំពុងបត់ឆ្វេង។ គ្រោះថ្នាក់កើតឡើងនៅវេលាម៉ោង១រលៀលថ្ងៃទី២៣ ខែតុលា ឆ្នាំ២០១៧ នៅលើកំណាត់ផ្លូវជាតិលេខ៦ ត្រង់ចំណុចភូមិសាលាក្រៅ សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ យ៉ាន់ សុវណ្ណ មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណឲ្យដឹងថា : នៅមុនពេលកើតហេតុនោះមានម៉ូតូ១គ្រឿង ម៉ាកហុងដាវ៉េវ ពណ៌ខ្មៅ សេរី២០០១ ពាក់ស្លាកលេខ បន្ទាយមានជ័យ១A-២០៣៣ បានបើកបរពីខាងលិចទៅកើត។ លុះបើកមកដល់ចំណុចខាងលិចស្ពានសាលាក្រៅ ម្តុំក្រុមហ៊ុនក្រឡុកស៊ីម៉ង់បានបត់ឆ្វេងផ្លូវចូលទៅសង្កាត់ភ្នៀតដោយមិនបានមើលឆ្វេងស្តាំ ស្របនោះក៏មានរថយន្តម៉ាកកាមរីឆ្លាម ពណ៌ប្រផេះ ពាក់ស្លាកលេខ ភ្នំពេញ២L-៦៨០៨ បើកមកពីក្រោយបុកចំពីចំហៀង។ ចំណែកអ្នកបើករថយន្តគេចខ្លួនបាត់ស្រមោល។
អ្នកបើកម៉ូតូឈ្មោះ ស្រេង ស្រួច ភេទប្រុស អាយុ៣៧ឆ្នាំ រស់នៅភូមិឈ្នួរ ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ បានឌុបព្រះសង្ឃ២អង្គ គង់នៅវត្តប្រាសាទស្រះឈ្នួរ។ ព្រះសង្ឃទាំងពីរអង្គរងរបួសធ្ងន់ ព្រោះព្រះអង្គមិនអាចពាក់មួកសុវត្ថិភាពឡើយ។ ព្រះនាមព្រះសង្ឃនៅមិនទាន់ក្តាប់បាននៅឡើយ។ ចំណែកអ្នកបើកម៉ូតូមិនមានរងរបួសទេ។
ក្រោយពីកើតហេតុ រថយន្តសង្គ្រោះរបស់នគរបាលបានដឹកយកទៅសម្រាកព្យាបាលនៅមន្ទីពេទ្យខេត្តមិត្តភាពកម្ពុជា-ជប៉ុន មង្គលបូរី៕ ដោយ : បន្ទាយ
