ភ្នំពេញ ៖ កម្លាំងនគរបាលនាយកដ្ឋានសន្តិសុខផ្ទៃក្នុង សហការជាមួយមន្ទីរប្រឆាំងគ្រឿងញៀន ក្រសួងមហាផ្ទៃ បានស្រាវជ្រាវចាប់ខ្លួនជនជាតិបារាំងម្នាក់ រួមជាមួយថ្នាំញៀនជិត៤គីឡូក្រាម ដែលផ្ញើមកពីប្រទេសប៊ែលហ្ស៊ិកតាមរយៈស្ថានីយ៍ប្រៃសណីភ្នំពេញ ហើយនៅព្រឹកថ្ងៃទី៤ ខែមេសា ឆ្នាំ២០១៨នេះ បញ្ជូនទៅសាលាដំបូងរាជធានីភ្នំពេញ។
មន្ដ្រីនគរបាលបានឲ្យដឹងថា ជនសង្ស័យឈ្មោះ MAXIME COLAS ជនជាតិបារាំង កាន់លិខិតឆ្លងដែនលេខ 13BE17572។
គួររំលឹកថា កាលពីវេលាម៉ោង១០ព្រឹក ថ្ងៃទី៣០ ខែមីនា ឆ្នាំ២០១៨ នៅចំណុចស្ថានីយ៍ប្រៃសណីភ្នំពេញ សមត្ថកិច្ចបានពិនិត្យកញ្ចប់បញ្ញើរមិនប្រក្រតីមួយ ដែលផ្ញើមកពីប្រទេសប៊ែលហ្ស៊ិក ហើយបានធ្វើតេស្តបឋមឃើញថាជា ប្រភេទថ្នាំញៀនអិចស្តាស៊ី (MDMA)។
ក្រោមការសម្របសម្រួលពី លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ ក្រុមការងារបានប្រគល់កញ្ចប់បញ្ញើរនោះ ទៅឲ្យអ្នកដែលមកទទួល គឺជនជាតិបារាំងឈ្មោះ MAXIME COLAS ដោយរឹបអូសសារធាតុញៀនប្រភេទអេចស្តាស៊ី (MDMA) គ្រាប់ពណ៌លឿងខ្ចី និងបៃតង និងបានឃាត់ខ្លួន បញ្ជូនទៅនាយកដ្ឋានសន្តិសុខផ្ទៃក្នុង ដើម្បីធ្វើការសាកសួរ។ បន្ទាប់ពីបញ្ចប់ការសាកសួរ សមត្ថកិច្ចនគរបាលនាយកដ្ឋានសន្តិសុខផ្ទៃក្នុង បានបញ្ជូនជនសង្ស័យទៅតុលាការ៕ ដោយ៖បញ្ញាស័ក្តិ
