ភ្នំពេញ ៖ ប្រជាពលរដ្ឋ មន្ត្រីរាជការ ស្ថាប័នច្បាប់ អ្នកនយោបាយ ពាណិជ្ជករ ធុរជន ព្រះសង្ឃកងទ័ព នគរបាល បានសម្ដែងការគាំទ្រយ៉ាងភ្លូកទឹកភ្លូកដី នូវនយោបាយថ្មីរបស់ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ដែលប្រកាសថា ដើម្បីបង្ហាញនូវការស្មោះត្រង់ចំពោះជាតិ និងបញ្ចៀសនូវការជ្រៀតជ្រែកពីបរទេស ថ្នាក់ដឹកនាំជាតិ ដែលកាន់តួនាទីជា ប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ ត្រូវមានសញ្ជាតិខ្មែរតែមួយ។
នៅក្នុងផេកហ្វេសប៊ុកផ្លូវការរបស់ សម្ដេចតេជោ ហ៊ុន សែន នាថ្ងៃទី០៦ ខែតុលា ឆ្នាំ២០២១ បុរសខ្លាំងដែលមានប្រជាប្រិយភាពបំផុត នៅកម្ពុជារូបនេះ បញ្ជាក់ថា ខ្ញុំបានប្រគល់ការងារនេះ ជូន ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ សិក្សារៀបចំធ្វើសេចក្តីព្រាងច្បាប់ វិសោធនកម្មរដ្ឋធម្មនុញ្ញ ឬសេចក្តីព្រាងច្បាប់អង្គការ ដែលចេញពី រាជរដ្ឋាភិបាល ឬជាសេចក្តីស្នើច្បាប់ ដែលចេញពី ព្រឹទ្ធសភា និង រដ្ឋសភា។
សម្ដេចតេជោ ហ៊ុន សែន បានថ្លែងនៅក្នុងទំព័រហ្វេសប៊ុកទៀតថា បើលេងកុំខឹង បើខឹងកុំលេង ព្រោះទ្វារត្រូវបានបិទជារៀងរហូតហើយសម្រាប់ពួកសញ្ជាតិពីរ ដែលប៉ុនប៉ងកាន់តំណែងកំពូលនេះ ពិសេស តំណែងនាយករដ្ឋមន្ត្រី ព្រោះថា វិសោធនកម្មរដ្ឋធម្មនុញ្ញក្តី ឬច្បាប់អង្គការក្តី ត្រូវការសំឡេង ២ភាគ៣ ទើបអាចអនុម័តបាន។
តាមរយៈទំព័រហ្វេសប៊ុក របស់ សម្ដេចតេជោ ហ៊ុន សែន ដដែលនេះ និងនៅតាមបណ្ដាញផ្សព្វផ្សាយជាច្រើន ត្រូវបានប្រជាពលរដ្ឋចូលខុម្មិន និងក្រុមមន្ត្រីរាជការ បានចេញមុខប្រកាសស្ទើរតែទូទាំងប្រទេសថា គាំទ្រនយោបាយថ្មីរបស់ សម្ដេចតេជោ ហ៊ុន សែន ” ថ្នាក់ដឹកនាំកំពូលសញ្ជាតិតែមួយ ” ។
នយោបាយថ្មីមួយនេះ ត្រូវបានមជ្ឈដ្ឋានជាតិ និងអន្តរជាតិ មើលឃើញយ៉ាងច្បាស់ថា សម្ដេចតេជោ ហ៊ុន សែន ពិតជាស័ក្ដិសមជាអ្នកលះបង់ជីវិតធ្វើដើមទុន រំដោះប្រទេសជាតិ ការពារប្រទេសជាតិ ធ្វើអ្វីៗដើម្បីសន្តិភាព និងការអភិវឌ្ឍ យ៉ាងពិតប្រាកដ។
ដូច្នេះ អ្នកនយោបាយសញ្ជាតិពីរ ដែលប៉ុនប៉ងប្រកួតប្រជែងធ្វើជាមេដឹកនាំកំពូលនៅកម្ពុជា ត្រូវបានដាច់ផ្ងារមុនការប្រកួតរួចទៅហើយ៕ រក្សាសិទ្ធិដោយ ៖ ពិសិដ្ឋ CEN
