ដាកា/បង់ក្លាដែស – ទីផ្សារអចលនទ្រព្យមានការរីកចម្រើនគួរឱ្យកត់សម្គាល់ក្នុងអំឡុងពេលពីរឆ្នាំចុងក្រោយនេះ ដោយសារការអភិវឌ្ឍយ៉ាងឆាប់រហ័សរបស់ប្រទេសបង់ក្លាដែស។
ចាប់តាំងពីការកើនឡើងចុងក្រោយនៃប្រាក់ចំណូលរបស់មនុស្សម្នាក់ៗ និងការកើនឡើងនៃវណ្ណៈកណ្តាល តម្រូវការលំនៅឋានបានកើនឡើង ដែលនៅទីបំផុតបានរួមចំណែកដល់កំណើននៃវិស័យអចលនទ្រព្យទាំងមូល។
ចាប់តាំងពីឆ្នាំ ១៩៧០ មានតែក្រុមហ៊ុនអចលនទ្រព្យចំនួនប្រាំ ឥលូវមានជាងមួយពាន់ក្រុមហ៊ុនដែលសកម្មនៅក្នុងវិស័យនាពេលឥឡូវនេះ ដោយមិនរាប់បញ្ចូលចំនួនអាជីវកម្មដែលមិនបានចុះបញ្ជីច្រើនទឿត។ ក្នុងចំណោមនោះ ក្រុមហ៊ុនអចលនទ្រព្យ REHAB សមាគមអចលនទ្រព្យ និងលំនៅឋាននៃប្រទេសបង់ក្លាដែស បានចុះឈ្មោះក្រុមហ៊ុនចំនួន 879។
ទីផ្សារអចលនទ្រព្យបានកើនឡើងក្នុងអត្រាប្រចាំឆ្នាំជាមធ្យម 10% ក្នុងកំឡុងពេលឆ្នាំ 2019-2020 ដែលធ្វើឱ្យប្រាក់ចំណូលទីផ្សារប្រចាំឆ្នាំសរុប 58 ពាន់លានតាកា។ ឥឡូវនេះ គំនិតទៅលើអចលនវត្ថុមិនកំណត់ចំពោះត្រឹមតែការអភិវឌ្ឍអាផាតមិនប៉ុណ្ណោះទេ ថែមទាំងទីក្រុងគំរូ ផ្សារទំនើប និងហេដ្ឋារចនាសម្ព័ន្ធសំខាន់ៗផងដែរ។
ការរួមចំណែករបស់វិស័យលំនៅឋានចំពោះផលិតផលក្នុងស្រុកសរុបក្នុងប្រទេសបង់ក្លាដែសមាន 7.96 ភាគរយ ខណៈដែលឧស្សាហកម្មដែលពាក់ព័ន្ធមានដូចជា ដែកសរសៃ ស៊ីម៉ងត៍ ឥដ្ឋ ខ្សាច់ ក្បឿងសេរ៉ាមិច ថ្នាំលាប និងបរិក្ខារផ្សេងៗទៀត រួមចំណែកប្រហែល 12 ភាគរយ។
ការព្យាករពីជំរឿនប្រជាជនចុងក្រោយនិយាយថា តម្រូវការលំនៅឋានសរុបមានចំនួន 0.8 លានឯកតាក្នុងឆ្នាំ 2020 ហើយនឹងមាន 1.14 លានឯកតានៅឆ្នាំ 2030។ វិស័យនេះបន្ថែមដោយផ្ទាល់ទៅនូវប្រាក់ចំណូលរបស់រដ្ឋាភិបាល (ក្នុងទម្រង់ជាអាករលើតម្លៃបន្ថែម ថ្លៃចុះឈ្មោះ ថ្លៃប្រើប្រាស់។ល។) ជាមធ្យមជិត 5 ពាន់លានតាកា បង់ក្លាដែស។
លោក Kamal Mahmud អនុប្រធានក្រុមហ៊ុន REHEB បាននិយាយថា សារាចរដែលបានចេញផ្សាយនៅដើមឆ្នាំសារពើពន្ធ ២០២០-២០២១ ដោយក្រសួងពាណិជ្ជកម្មស្តីពីការវិនិយោគប្រាក់ដែលមិនបង់ពន្ធដល់វិស័យអចលនទ្រព្យគឺជាចំណុចរបត់នៃវិស័យនេះ។
វាបានអនុញ្ញាតឱ្យពួកគេលក់ផ្ទះល្វែង និងកន្លែងពាណិជ្ជកម្មជាច្រើននៅពេលនោះ។ លោកបានបន្ថែមថា៖«“គំនិតផ្តួចផ្តើមរបស់រដ្ឋាភិបាលក្នុងការកាត់បន្ថយការប្រាក់កម្ចីទិញផ្ទះក្នុងលេខតែមួយខ្ទង់ គឺជាគំនិតផ្តួចផ្តើមជំរុញមួយ ក្នុងការជំរុញវិស័យនេះ។ ជាងនេះទៅទៀត ការកាត់បន្ថយថ្លៃចុះបញ្ជី ពន្ធផ្ទេរកម្មសិទ្ធិ ពន្ធប្រថាប់ត្រា ថ្លៃផ្លាស់ប្តូរ និងការធ្វើឱ្យឯកសារទាក់ទងនឹងដីធ្លីជាឌីជីថល គឺជាហេតុផលចម្បងផ្សេងទៀតសម្រាប់ការស្ទុះងើបឡើងវិញយ៉ាងឆាប់រហ័សនៃវិស័យលំនៅឋាន។»
យោងតាមការស្រាវជ្រាវរបស់ REHAB ប្រាក់ចំណូលមិនទាន់បានបង់ពន្ធចំនួនប្រហែល 35 ពាន់លានតាកាត្រូវបានវិនិយោគក្នុងវិស័យនេះក្នុងរយៈពេលប្រាំមួយខែចុងក្រោយនេះ។ ការកើនឡើងជាបន្តបន្ទាប់នៃតម្លៃសម្ភារៈសំណង់សំខាន់ៗ និងកង្វះការផ្គត់ផ្គង់បានធ្វើឱ្យមានផលប៉ះពាល់យ៉ាងធ្ងន់ធ្ងរដល់វិស័យអចលនទ្រព្យរបស់ប្រទេសនេះ ការបន្ថែមគម្រោងជាច្រើន – ដែលបានបន្តបន្ទាប់ពីការបន្ធូរបន្ថយនៃការរឹតបន្តឹង Covid-19 – អាចនឹងត្រូវបញ្ឈប់ម្តងទៀតដោយសារវិបត្តិថ្មី ដែលរារាំងដល់កិច្ចខិតខំប្រឹងប្រែងស្តារឡើងវិញ។ នេះបើតាមអ្នកនៅក្នុងឧស្សាហកម្ម៕