គ្រប់ប្រភេទត្រីស្ទើរតែទាំងអស់ មិនអាចដើរ និងដកដង្ហើមលើគោកបាននោះទេ ប៉ុន្តែត្រីមួយប្រភេទនេះពិតជាចម្លែកមែនទែន ព្រោះវាអាចដើរបាននៅលើគោក ព្រមទាំងអាចដង្ហើមបានធម្មតាផងដែរ។
ត្រីប្រភេទនេះមានឈ្មោះជាភាសាអង់គ្លេសថា Mudskipper ហើយក៏មានរស់នៅក្នុងប្រទេសយើងផងដែរ។ នៅពេលទឹកនាច វាអាចដើរលើគោកបាន និងអាចដកដង្ហើមបានតាមស្បែក។
ត្រីប្រភេទនេះមានរូបរាងចម្លែកដែរ ចំណែកស្រកីរបស់វា អាចផ្ទុកខ្យល់បាន។ វាដើរដោយប្រើព្រុយរបស់វាជាជំនួយ។ ត្រីនេះអាចឡើងទុំលើមែកឈើបានរហូតដល់កំពស់ ២ម៉ែត្រផងដែរ ហើយវាអាចសម្រាកនៅលើថ្ម ឬមែកឈើបាន។
ចំពោះភ្នែករបស់វាវិញ គឺមានថង់ទឹកដែលជួយរក្សាសំណើមនៅភ្នែកកុំឲ្យស្ងួត។ សំរាប់ចំណីរបស់វាវិញមានដូចជាសត្វល្អិត ពពួកគ្រំ និងត្រីតូចៗជាដើម៕ សុភ័ក្ត្រ
