កាលពីពេលថ្មីៗនេះ ពិតមានការភ្ញាក់ផ្អើល និងក៏ដូចហួសចិត្តជាខ្លាំងតែម្តង គ្រាដែលថៅកែដេប៉ូការ៉ាស់សាំងតេលាមួយកន្លែង បានប្រកាសស្វែងរកឡាន Land Cruiser ១គ្រឿង ដឹកព្រះសង្ឃចំនួន៣អង្គ ព្រោះចាក់ប្រេងក្នុងតម្លៃ ២៥ ដុល្លារ ឲ្យលុយក្រដាស ១០០ដុល្លារ ទៅឲ្យកូនចៅរបស់ខ្លួនអាប់ ដែលបន្ទាប់មកទើបពិនិត្យឃើញថាជាក្រដាសក្លែងក្លាយ។
នេះបើតាមគណនីហ្វេសប៊ុកឈ្មោះ Vichet Tep កាលពីល្ងាចថ្ងៃទី២២ ខែកុម្ភៈ ឆ្នាំ២០២២ បានបង្ហោះឲ្យដឹងថា «មុននេះបន្ដិចម៉ោង 4:18 នាទី មានឡាន Land cruiser ភ្នំពេញ 2U3989 បានចាក់ប្រេងម៉ាស៊ូតនៅកន្លែងដេប៉ូតេលារបស់ខ្ញុំ បានអោយលុយដុល្លារក្លែងក្លាយ យកមកអោយកូនចៅខ្ញុំ ឡានហ្នឹងដឹកលោកសង្ឃ ខ្ញុំមិនដឹងថាឡានលោក រឺឡានឧបាសកទេ តែលោកសង្ឃគង់នៅខាងក្រោយអ្នកអោយលុយដុល្លានេះមក អុីចឹងសូមលោកបងមកយកលុយលោកបងទៅវិញ ហើយយកលុយថ្មីមកសងកុរណាផង»។
នៅពេលបងប្អូនអ្នកលេងបណ្តាញសង្គម ស្តីបន្ទោសឲ្យថា មុនដូរគួរពិនិត្យអោយបានច្បាស់ មនុសុ្សសម័យនេះពិបាកទុកចិត្តណាស់ ម្ចាស់ដេប៉ូខាងលើ ក៏បានសារភាពថា កូនចៅរបស់ខ្លួនគ្នាមិនចេះមើលលុយដុល្លារទេ ទើបបានជាអុីចឹង។ ប៉ុន្តែ បើតាមពិនិត្យ អ្នកខ្លះថា នេះជាលុយក្រដាស (100$) ស៊េរីចាស់ មិនមែនក្លែងក្លាយទេ។
តែទោះយ៉ាងណា គេក៏បានណែនាំជាការល្អថា នេះជាមេរៀនមួយទៅថ្ងៃក្រោយ ហេតុនេះគួរចំណាយពេល 10 ទៅ 20 នាទី ដើម្បីបង្រៀនបុគ្គលិកមើលលុយឡើងវិញ ដើម្បីជៀសវាងកើតមានរឿងនេះទៀត ព្រោះថា លុយយកពីគេដោះដូររួចហើយ បែរជាមកថាក្លែងក្លាយ គេមិនព្រមឡើយ ទោះលុយនោះក្លែងក្លាយ ឬមិនក្លែងក្លាយក៏ដោយ៕ រក្សាសិទ្ធិដោយ៖ លឹម ហុង
