ភ្នំពេញ៖ ថ្មីៗនេះ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានមានប្រសាសន៍ថា ការផ្គត់ផ្គង់ថាមពល ដែលផលិតបាននៅក្នុងស្រុក គឺគ្រប់គ្រាន់ ដើម្បីបំពេញតម្រូវការ ជាពិសេស នឹងគ្រប់គ្រាន់សម្រាប់ខ្សែសង្វាក់ផលិតកម្មនៃរោងចក្រ និងសហគ្រាសនៅកម្ពុជា ខណៈដែលសកម្មភាពសេដ្ឋកិច្ច និងសង្គម បានដំណើរការឡើងវិញ ក្រោយពីរាជរដ្ឋាភិបាល បានបើកប្រទេសឡើងវិញទាំងស្រុង កាលពីអំឡុងខែវិច្ឆិកា ឆ្នាំមុន។
ឯកឧត្តម ស៊ុយ សែម បានមានប្រសាសន៍ថា៖ «ការប្រើប្រាស់អគ្គិសនីទូទាំងប្រទេសនៅរដូវប្រាំងឆ្នាំនេះលែងមានការខ្វះខាត ឬរំខានដោយសារការខ្វះខាតអគ្គិសនីទៀតហើយ ពីព្រោះអគ្គិសនីកម្ពុជាឥឡូវនេះ លើសពីការផ្គត់ផ្គង់អគ្គិសនីសរុប»។ ការផ្គត់ផ្គង់ថាមពលកាលពីឆ្នាំមុន លើសពីការប្រើប្រាស់សរុប។
ការដាច់ចរន្តអគ្គិសនីបានជំរុញឱ្យរដ្ឋាភិបាលបង្កើនសមត្ថភាពផលិតថាមពលក្នុងស្រុក តាមរយៈការសាងសង់រោងចក្រថាមពលដើរដោយធ្យូងថ្ម និងរោងចក្រថាមពលដើរដោយប្រេងឥន្ធនៈ។ ប្រទេសកម្ពុជា ប្រឈមនឹងការខ្វះខាតអគ្គិសនីក្នុងឆ្នាំ ២០១៩ ដែលនាំឱ្យមានការដាច់ចរន្តអគ្គិសនីដើម្បីរក្សាថាមពល។ កាលពីឆ្នាំមុន ការផលិតថាមពលក្នុងស្រុក មានចំនួន ៣,០៣៣ មេហ្គាវ៉ាត់ ហើយក្រសួងរំពឹងថា នឹងកើនឡើងដល់ ៣,១១៦មេហ្គាវ៉ាត់ នៅឆ្នាំនេះ។ សព្វថ្ងៃនេះ កម្ពុជាមានសមត្ថភាពផលិតថាមពលប្រមាណ ៧០ ភាគរយនៃតម្រូវការថាមពលសរុបរបស់ខ្លួន ខណៈ ២៥ ភាគរយទៀត នៅតែត្រូវនំាចូលពីបរទេស។
ជុំវិញការអះអាងនេះដែរ អ្នកធុរកិច្ចក្នុងវិស័យឧស្សាហកម្ម និងកែច្នៃខ្សែសង្វាក់ផលិតកម្ម បានលើកឡើងថា វាជាការប្រសើរ ប្រសិនបើតម្លៃថាមពល មានកម្រិតទាប ដើម្បីធ្វើឱ្យផលិតផលមានការប្រកួតប្រជែង។ ហើយការដំឡើងពន្ធអគ្គិសនីត្រឹមត្រូវ ក៏បានចូលរួមចំណែកដល់ការប្រកួតប្រជែងផលិតផល តាមរយៈការកាត់បន្ថយតម្លៃផលិតផងដែរ៕
