ភ្នំពេញ៖ ក្នុងកិច្ចជំនួបពិភាក្សាការងារជាមួយ ឯកអគ្គរាជទូតចក្រភពអង់គ្លេសប្រចាំកម្ពុជា លោកទេសរដ្ឋមន្ត្រី ប្រាក់ សុខុន បានអះអាងថា ការចូលរួមប្រកួតប្រជែង ដ៏សកម្មរបស់គណបក្សនយោបាយចំនួន២០ ក្នុងការបោះឆ្នោតជាតិនៅចុងខែកក្កដាខាងមុខនេះ បង្ហាញថា កម្ពុជានៅតែស្ថិតនៅលើមាគ៌ា ប្រជាធិបតេយ្យ សេរី ពហុបក្ស។នេះបើតាមសេចក្តីប្រកាសព័ត៌មានរបស់ក្រសួង ការបរទេស ដែលទើបចេញផ្សាយនៅរសៀលថ្ងៃទី៣០ ខែឧសភានេះ។
លោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានថ្លែងកាលពីថ្ងៃទី២៩ខែឧសភា ក្នុងកិច្ចជំនួបពិភាក្សាការងារជាមួយ លោក William Longhurst ឯកអគ្គរាជទូតចក្រភពអង់គ្លេសប្រចាំកម្ពុជា អំពីការខិតខំរបស់ គណៈកម្មាធិការជាតិរៀបចំការបោះឆ្នោត ក៏ដូចជារបស់អាជ្ញាធរពាក់ព័ន្ធ ទាំងអស់ ក្នុងការត្រៀមរៀបចំការបោះឆ្នោត ខែកក្កដាខាងមុខនេះ ដើម្បីធានាឲ្យការបោះឆ្នោត ប្រព្រឹត្តទៅដោយ សេរី ត្រឹមត្រូវ យុត្តិធម៌ គ្មានអំពើហឹង្សា និងមានតម្លាភាព។ លោក បានគូសបញ្ជាក់ថា តាមការប្រកាសរបស់ គណៈកម្មាធិការជាតិរៀបចំការបោះឆ្នោត (គ.ជ.ប) មានគណបក្សចំនួន២០ បានចូលរួមប្រកួតប្រជែង នៅក្នុងការ បោះឆ្នោតនាខែកក្កដា ខាងមុខនេះ ក្នុងនោះក៏មានគណបក្សមួយចំនួន ដែលមានជំហរប្រឆាំង បានធ្វើសកម្មភាពយ៉ាងសកម្ម និងបានបង្ហាញភាពខ្លាំងគួរឲ្យចាប់អារម្មណ៍ ដែលប្រការនេះ បានបញ្ជាក់ថា កម្ពុជានៅតែស្ថិតលើមាគ៌ា ប្រជាធិបតេយ្យ សេរី ពហុបក្ស។
លោកឯកអគ្គរាជទូតចក្រភពអង់គ្លេស បានអះអាងថា ចក្រភពអង់គ្លេសកំពុងតាមដាន ដោយយកចិត្តទុកដាក់ ចំពោះការបោះឆ្នោតនៅកម្ពុជា ហើយបានបង្ហាញក្តីសង្ឃឹមថា ក្រោយការបោះឆ្នោត អ្វីៗនឹងមានការប្រែប្រួលល្អ៕ ដោយ៖បញ្ញាស័ក្តិ