ការហាត់ប្រាណហុចផលល្អដល់សុខភាពរាងកាយ ដូច្នេះទើបនៅពេលនិយាយពីរឿងសុខភាព អ្នកជំនាញផ្នែកផ្សេងៗតែងណែនាំឱ្យហាត់ប្រាណ តែមិនមែនថា គ្រប់គ្នាចេះតែអាចហាត់ប្រាណយឺតសរសៃ យឺតសសូងបានតាមតម្រូវការនោះទេ ជាពិសេសចំពោះមនុស្សចាស់ ដែលមានរោគប្រចាំកាយ ដូចជា ជំងឺទឹកនោមផ្អែម ជំងឺសរសៃឈាមខួរក្បាល ជំងឺរលាកឆ្អឹងសន្លាក់ ជំងឺលើសឈាម ជំងឺផាគិនសុន ជាដើម ព្រោះការដែលមានអាយុកាន់តែច្រើនឡើង ក៏ធ្វើឱ្យការធ្វើចលនារាងកាយ លំបាកផងដែរ។
វេជ្ជបណ្ឌិតជំនាញផ្នែកការព្យាបាលរោគដោយការធ្វើចលនា បានណែនាំថា មនុស្សចាស់ដែលលំបាកក្នុងការធ្វើចលនា រឹតតែចាំបាច់ខ្លាំង ក្នុងការត្រូវតែហាត់ប្រាណបញ្ចេញកម្លាំងកាយ ព្រោះនឹងជួយស្តារស្ថានភាពការធ្វើចលនាឱ្យរឹតតែល្អឡើង ជាពិសេសរឿងសន្លាក់ឆ្អឹង ព្រោះការហាត់ប្រាណដែលសង្កត់ធ្ងន់លើការធ្វើចលនារបស់សន្លាក់ ក៏ជួយឱ្យការធ្វើការងាររបស់សន្លាក់ ល្អឡើងបានដែរ ព្រមទាំងបង្កើនភាពរឹងមាំរបស់សាច់ដុំ និងជួយក្នុងរឿងការទប់លំនឹងខ្លួនបានទៀតផង។
ចំណុចដែលគួរចងចាំក្នុងការហាត់ប្រាណរបស់មនុស្សចាស់ គឺហាមបញ្ចេញកម្លាំងខ្លាំងៗ ឬធ្វើចលនារហ័សៗ ដោយអាចហាត់ប្រាណជាផ្នែកៗបាន និងមិនចាំបាច់ធ្វើដដែលៗទេ តែគួរធ្វើឱ្យបានបន្តបន្ទាប់ និងជាប់លាប់។
ការហាត់ប្រាណរបស់មនុស្សចាស់ គឺដើម្បីជំរុញ និងជួយបង្កើនការធ្វើការងាររបស់រាងកាយ ដូចតទៅនេះ…
១- បង្កើនការធ្វើចលនារបស់សន្លាក់ ដោយការធ្វើចលនាត្រង់ឆ្អឹងសន្លាក់ផ្សេងៗឱ្យសព្វ ដូចជា ធ្វើចលនាឆ្អឹងសន្លាក់ស្មា ដោយដាក់ដៃផ្អឹបជាប់នឹងដងខ្លួន ហើយលើកឡើងយឺតៗឱ្យផុតក្បាល ធ្វើជាបន្តបន្ទាប់ប្រមាណជា ៥-១០ដង។
២- បង្កើនភាពរឹងមាំរបស់សាច់ដុំ ដោយការហាត់ប្រាណបែបប្រើកម្លាំងប្រឹង ដូចជាលើកដុំដែក ដែលមិនសូវជាធ្ងន់ប៉ុន្មាន រុញជញ្ជាំង ឬការលើកដៃ លើកជើង ជាដើម។
៣- បង្កើនភាពយឺតយាររបស់សាច់ដុំ សរសៃ និងការទប់លំនឹងខ្លួន ដោយការធ្វើចលនាយឺតៗ។ ការហាត់ប្រាណប្រភេទនេះ មានដូចជា ការរាំលើកដៃ លើកជើងតាមក្បាច់ប្រដាល់ចិន ធ្វើយ៉ូហ្គា តែត្រូវសង្កត់ធ្ងន់លើការជ្រើសរើសធ្វើក្បាច់ងាយៗ ស្រួលៗ និងមិនត្រូវសម្រុកធ្វើខ្លាំងជ្រុលពេកទេ។
៤- បង្កើនសមត្ថភាពរបស់បេះដូង និងសួត ឬដែលហៅថា ការហាត់ប្រាណបែបអ៊ែរ៉ូប៊ិក ( Aerobics) ជាការហាត់ប្រាណលើសាច់ដុំធំៗយ៉ាងបន្តបន្ទាប់ ដើម្បីឱ្យបេះដូងធ្វើការដល់កម្រិតមួយដែលហៅថា Target Heart Rate (TGR) ឬអត្រាការលោតរបស់បេះដូង ដែលនៅលើមនុស្សចាស់ TGR នេះ នឹងទាបជាងនៅលើមនុស្សវ័យកំលោះក្រមុំ ដូច្នេះគួរធ្វើឱ្យបាន ៣ដងក្នុង១សប្តាហ៍ ឬ១ថ្ងៃ ខាន ១ថ្ងៃ ជាមធ្យម។
យ៉ាងណាក៏ដោយ ចំពោះមនុស្សចាស់ខ្លះអាចមានកម្រិត ដូចជា មានបញ្ហារឿងឆ្អឹងសន្លាក់ក្បាលជង្គង់ ពិបាកក្នុងការធ្វើចលនា ឬមានភាពប្រឈមខ្លាំងក្នុងការដួលរងរបួស តែក៏អាចកែសម្រួលទៅជាការហាត់ប្រាណក្នុងឥរិយាបថអង្គុយ ឬគេងម្តងក៏បានដែរ៕
