បច្ចុប្បន្នមានហាងកាហ្វេផុសឡើងច្រើន ដូចគ្នានឹងហាងមិនីម៉ាតដែរ មនុស្សជាច្រើនដែលមានអារម្មណ៍ថា រាងដូចជាស្ពឹកស្រពន់នៅពេលព្រឹកនោះ ដល់ពេលបានក្រេបកាហ្វេ ១កែវដំបូងនាពេលព្រឹកនៃថ្ងៃថ្មីភ្លាម អាការដែលថានោះ ក៏រលាយបាត់អស់រលីង។ មានមនុស្សមិនតិចទេ ដែលត្រូវអស់លុយថ្លៃកាហ្វេក្នុងថ្ងៃខ្លះ ច្រើនជាងថ្លៃបាយទៅទៀត អ្នកខ្លះទៀតរអ៊ូថា ហេតុអីបានជាកាហ្វេឡើងថ្លៃម្ល៉េះ?! តែពេលភ្លេចខ្លួន ក៏ដើរចូលហាងកាហ្វេដដែល។
ការចូលចិត្តកាហ្វេរបស់មនុស្សម្នាក់ៗ មានភាពខុសប្លែកពីគ្នា ទាំងរឿងរសជាតិ ក្លិន និងបរិយាកាសក្នុងហាងកាហ្វេ តែអ្វីដែលស្ថិតនៅពីក្រោយរឿងទាំងនេះគឺ សារធាតុកាហ្វេអ៊ីន ហើយកាហ្វេអ៊ីនេះ មិនមែនមាននៅតែក្នុងកាហ្វេប៉ុណ្ណោះទេ នៅមានក្នុងភេសជ្ជៈច្រើនប្រភេទទៀត ដូចជា ទឹកភេសជ្ជៈកំប៉ុងបង្កើនថាមពល ទឹកតែ និងទឹកតែបៃតងជាដើម។ កាហ្វេអ៊ីន មានឥទ្ធិពលជំរុញការធ្វើការងាររបស់ប្រព័ន្ធប្រសាទផ្នែកកណ្តាល ធ្វើឱ្យមានអារម្មណ៍រស់រវើក ស្វាហាប់។ អ្នកកីឡាមួយចំនួន ក្រៅពីញ៉ាំកាហ្វេដោយសារតែចូលចិត្តហើយ អាចញ៉ាំដោយសារនឹកសង្ឃឹមពីលទ្ធផលក្នុងការជំរុញសមត្ថភាពខាងរាងកាយ ដើម្បីការប្រកួតកីឡាទៀតផង។
តើគួរញ៉ាំកាហ្វេប៉ុនណា ទើបល្អ?
ការញ៉ាំកាហ្វេច្រើនជ្រុលពេក នឹងធ្វើឱ្យកើតអាការញ័របេះដូង ជាលទ្ធផលនៃការដែលកាហ្វេអ៊ីន បានទៅជំរុញឱ្យបេះដូងច្របាច់ខ្លួនខ្លាំង និងញាប់ឡើង និងថែមទាំងធ្វើឱ្យសម្ពាធឈាមឡើងខ្ពស់ខ្លាំងទៀតផង ។ ក្រៅពីនេះ ការញ៉ាំកាហ្វេច្រើនជ្រុល នឹងធ្វើឱ្យបាត់បង់ជាតិកាល់ស្យូមទៅតាមទឹកនោមកាន់តែច្រើនឡើង និងបង្កើនភាពប្រឈមក្នុងការកើតសភាវពុកឆ្អឹង ជាពិសេសនៅលើមនុស្សស្រី ដែលមានភាពប្រឈមស្រាប់ហើយដោយសារការខ្វះអ័រម៉ូនក្រោយពេលអស់វដ្តរដូវ។
ការបានទទួលកាហ្វេអ៊ីនក្នុងកម្រឹតខ្ពស់ អាចធ្វើឱ្យកើតអាការមួម៉ៅ បារម្ភកង្វល់ ឈឺក្បាល ឈឺពោះ រាក រួមទាំងអាចរំខានដល់ការគេង គឺនឹងធ្វើឱ្យគេងមិនលក់ ដូច្នេះគួរចៀសវាងការញ៉ាំភេសជ្ជៈ ដែលមានជាតិកាហ្វេអ៊ីន យ៉ាងតិចបំផុត ២-៦ម៉ោង មុនពេលចូលគេង។ ចំណែកការញ៉ាំកាហ្វេ ដែលសមល្មមល្អនោះគឺ ១-២ពែងតូច ក្នុង១ថ្ងៃ ដោយត្រូវទុកចន្លោះពេល ឆ្ងាយពីគ្នាពី ៤-៦ម៉ោង។
កាហ្វេអ៊ីន និងកីឡា
រូបមន្តការប្រើប្រាស់កាហ្វេអ៊ីនសម្រាប់អ្នកកីឡា ដែលធ្លាប់ប្រើតៗគ្នាមកនោះគឺ ញ៉ាំកាហ្វេអ៊ីន ១ម៉ោងមុនការប្រកួត និងបើចង់ឱ្យទទួលបានលទ្ធផលកាន់តែខ្លាំងឡើងទៀតនោះ គួរតមការញ៉ាំកាហ្វេអ៊ីនមុនពេលនោះ ១-២ថ្ងៃ។ ចំណែកបរិមាណដែលនិយមប្រើប្រាស់ កាលពីពេលមុននោះគឺ ច្រើនតែប្រើក្នុងកម្រឹតខ្ពស់ គឺ ៦មិល្លីក្រាម សម្រាប់ទម្ងន់ខ្លួន ១គីឡូក្រាម តែតាមរយៈការស្រាវជ្រាវវិភាគ នៅពេលក្រោយមក បានរកឃើញថា ការប្រើប្រាស់កាហ្វេអ៊ីនត្រឹមតែ ១-៣មិល្លីក្រាម សម្រាប់ទម្ងន់ខ្លួន ១គីឡូក្រាម គឺល្មមគ្រប់គ្រាន់ហើយ ចំណែកការតមកាហ្វេអ៊ីនមុនពេលប្រកួតកីឡា ១-២ថ្ងៃនោះ ក៏អាចមិនចាំបាច់ធ្វើដែរ។
សរុបសេចក្តីមកថា បើលោកអ្នកចូលចិត្តកាហ្វេ ក៏ញ៉ាំបាន តែកុំញ៉ាំច្រើន និងត្រូវគិតដល់សុខភាពរបស់ខ្លួនជាចម្បង៕
