អ្នកលេងអ៊ីនធើរណែតជាច្រើន ពិតជាមានការភ្ញាក់ផ្អើលខ្លាំងតែម្តង នៅពេលដែលបានឃើញករណីគ្រោះថ្នាក់ចរាចរណ៍ដ៏ចម្លែក (មិនធ្លាប់ឃើញពីមុនមក) ដែលបានកើតឡើងនៅកន្លែងទីបញ្ចុះសព (ម៉ុងខ្មោច) បែបនេះ។
បើការចែករំលែកនៅលើគ្រុបហ្វេសប៊ុក Penang Blowing Water Station (槟城吹水站) បានឲ្យដឹងថា អ្នកបើកបរបានបើករថយន្តបញ្ច្រាស់ទិសគ្នា ហើយស្រាប់តែទៅបុកជាមួយរថយន្ត១គ្រឿងទៀត ដែលកំពុងបើកបរយ៉ាងលឿន បណ្តាលឲ្យរថយន្តធ្លាក់ចូលកន្លែងម៉ុងខ្មោចតែម្តង នៅក្នុងអំឡុងពេលសែន ឆេង ម៉េង (Qing Ming) នៅក្នុងទីក្រុងគូឡាឡាំពួរ។
បើពិនិត្យតាមរូបភាព ផ្នូរមិនមានការខូចខាតអ្វីធំដុំទេ ប៉ុន្តែយើងមិនអាចនិយាយបានអំពីរថយន្តនោះទេ។ តែបើទោះជាមានការចែករំលែកបន្តជាច្រើនដងក៏ដោយ ក៏គ្មានការបង្ហោះណាមួយបញ្ជាក់អំពីកាលបរិច្ឆេទ និងពេលវេលាពិតប្រាកដនៃឧបទ្ទវហេតុនេះទេ។ ប៉ុន្តែ ត្រូវបានគេបញ្ជាក់ថា ជាសំណាងល្អ ដែលមិនមានអ្នករងរបួស ឬស្លាប់នោះទេ។
ហេតុការណ៍នេះត្រូវបានចែករំលែកដោយសារព័ត៌មាន China Press ហើយអ្នកនិយមលេងអ៊ីនធឺណិតជាច្រើន គ្មានអ្វីក្រៅពីនិយាយលេងសើចអំពីឧប្បត្តិហេតុនេះ។ ពួកគេខ្លះនិយាយសុំលេខរថយន្ត ដើម្បីចាក់ឆ្នោត ខណៈខ្លះទៀតគិតអំពី “ប្រផ្នូលមិនល្អ” សម្រាប់គ្រួសារនោះ ដែលបានបើករថយន្តធ្លាក់ចូលទៅក្នុងកន្លែងផ្នូរបែបនេះ។ រីឯអ្នកខ្លះទៀត ក៏លេងសើចថា «សង្ស័យគេយកឡានដុតសែនខ្មោចទេដឹង!?»៕ រក្សាសិទ្ធិដោយ៖ លឹម ហុង
