យោងតាមព័ត៌មាន បានឲ្យដឹងថា នាង Tu មកពីទីក្រុង Nanjing ខេត្ត Jiangsu ប្រទេសចិន កាលពីប៉ុន្មានថ្ងៃមុន នាងបានទៅនេសាទជាមួយប្តី នៅមាត់ទន្លេ។ ដំបូងឡើយ អ្វីៗគឺសប្បាយ រីករាយយ៉ាងរលូន ប៉ុន្តែ អ្វីដែលមិននឹកស្មានដល់នោះ គឺនៅពេលប្តីលើកដងសន្ទួច ស្រាប់តែគប់ផ្លែទាក់ប្រពន្ធតែម្តង។
តែសំណាងមិនល្អ ផ្លែសន្ទួចបានទាក់ថ្ពាល់របស់នាង Tu ធ្វើឲ្យប្តីរបស់នាងភ័យស្លន់ស្លោយ៉ាងខ្លាំង។ តែផ្ទុយពីប្តី នាង Tu បែរជាមានភាពស្ងប់ស្ងាត់ និងដកទូរស័ព្ទថតវីដេអូ ទាំងស្រែកមិនយំ មិនជេរស្តីប្តីសូម្បីមួយម៉ាត់ ដោយគ្រាន់តែសុំប្តីដឹកទៅមន្ទីពេទ្យ ដើម្បីសម្លាប់មេរោគ និងដកផ្លែសន្ទួចចេញប៉ុណ្ណោះ។
នៅឯមន្ទីរពេទ្យ វេជ្ជបណ្ឌិតសួរនាំដំណើររឿងហេតុ នាង Tu បានប្រាប់ថា៖ «ប្តីខ្ញុំមិនបានធ្វើវាដោយចេតនាទេ ខ្ញុំច្បាស់ជាជំពាក់កម្មគេកាលពីជីវិតមុន»។ នាង Tu ក៏គិតថា ការស្តីបន្ទោសប្តីក៏គ្មានប្រយោជន៍ដែរ គឺមានតែសន្សំកម្លាំងខ្លះ ដើម្បីទៅពេទ្យព្យាបាល។ តែជាមួយស្ថានភាពដ៏ចម្លែក និងអាកប្បកិរិយាដ៏ស្ងប់ស្ងាត់បំផុតរបស់នាង បានធ្វើឲ្យគ្រូពេទ្យ ស្រឡាំងកាំង ឆ្ងល់ជាខ្លាំង។
យ៉ាងណាមិញ បន្ទាប់ពីព័ត៌មានអំពីហេតុការណ៍នេះ ត្រូវបានសាយភាយ អ្នកនិយមលេងអ៊ីនធឺណែតជាច្រើន បានបញ្ចេញមតិថា៖ «សូមសរសើរហើយ ដែលរក្សាភាពស្ងប់ស្ងាត់បាន បើខ្ញុំវិញមិនដឹងជាឈឺចាប់ គួរឲ្យខ្លាចយ៉ាងណាទេ»។ រីឯអ្នកផ្សេងទៀត បានចែករំលែកថា៖ «គ្រោះថ្នាក់បែបនេះ ត្រូវតែទៅមន្ទីរពេទ្យ ព្រោះសរសៃឈាម និងសរសៃប្រសាទ វាងាយនឹងកើតជំងឺខ្វិនមុខ ប្រសិនបើអ្នកដោះស្រាយដោយខ្លួនឯង»៕ រក្សាសិទ្ធិដោយ៖ លឹម ហុង
