នៅថ្ងៃទី១៨ ខែមេសា ឆ្នាំ២០២៣ គេហទំព័រ South China Morning Post បានលាតត្រដាងថា មានបញ្ហាចម្រូងចម្រាសនៅលើប្រព័ន្ធផ្សព្វផ្សាយសង្គមចិន បន្ទាប់ពីមានសេចក្តីរាយការណ៍ថា មន្ត្រីចិនបាននិងកំពុងវាយកម្ទេចផ្ទាំងថ្មដ៏ប្រឈមគ្រោះថ្នាក់ នៃតំបន់ទេសចរណ៍ធម្មជាតិដ៏ល្បីល្បាញមួយនៅជាយក្រុង Anyang ខេត្ត Henan ដោយសារតែមានការព្រួយបារម្ភសុវត្ថិភាព។
ផ្ទាំងថ្មនេះ ត្រូវបានគេស្គាល់ថាជា “ថ្មសាកល្បងនៃភាពក្លាហាន” ខណៈនៅលើប្រព័ន្ធផ្សព្វផ្សាយសង្គមចិន គេបានឃើញហ្វូងមនុស្សប្រុសស្រី នាំគ្នាទៅថតរូប Selfie យ៉ាងសប្បាយរីករាយ រួមទាំងការថតវីដេអូឃ្លីបជាច្រើនផងដែរ។ ទោះបីជាយ៉ាងណា មន្ត្រីទេសចរណ៍បាននិយាយថា តំបន់នេះមិនមែនជាកន្លែងទាក់ទាញភ្ញៀវទេសចរនោះទេ តែវាជាតំបន់គ្រោះថ្នាក់ ហើយគ្មានបុគ្គលិកមើលថែឡើយ។
មន្ត្រីនោះបាននិយាយថា តាំងពីឆ្នាំមុនមក មានការព្រមានថា អ្នកទេសចរមិនត្រូវបានអនុញ្ញាតឱ្យឡើងភ្នំឡើយ រហូតមកដល់ពេលថ្មីៗនេះ ការប្រេះបែកត្រូវបានគេរកឃើញនៅក្នុងផ្ទាំងថ្ម ដែលជាមូលហេតុ នាំឲ្យមន្រ្តីសម្រេចចិត្តនាំយកម៉ាស៊ីនមកគ្រប់គ្រង និងបំផ្លាញចោលតែម្តង។
មន្រ្តីក៏បានលើកហេតុផលថា «មនុស្សជាច្រើនបានឡើងភ្នំនោះដើម្បីថតរូប វាពិតជាប្រឈមគ្រោះថ្នាក់ពេកហើយ! ដូច្នេះយើងវាយកម្ទេចវា ដោយសារតែមានការភ័យខ្លាចថា មានគ្រោះថ្នាក់នឹងកើតឡើងនៅទីនោះ។ ហើយសម្រាប់ផ្ទាំងថ្មនេះ គឺទើបតែមានការពេញនិយមក្នុងរយៈពេលប៉ុន្មានឆ្នាំកន្លងមកនេះប៉ុណ្ណោះ»។
យ៉ាងណាក៏ដោយ ការសម្រេចរបស់រដ្ឋាភិបាលមូលដ្ឋានលើកនេះ បានបង្កឱ្យមានការជជែកដេញដោលរាលដាលនៅលើបណ្តាញសង្គម។ អ្នកប្រើប្រាស់ប្រព័ន្ធផ្សព្វផ្សាយសង្គមជាច្រើន មិនយល់ស្របនឹងវិធីសាស្រ្តនេះទេ ដោយបានចង្អុលបង្ហាញថា មិនចាំបាច់រុះរើបេតិកភណ្ឌធម្មជាតិដែលបានសាងសង់តាំងពីបុរាណកាលនោះទេ និងរួមជាមួយនឹងការផ្តល់យោបល់ខ្លះថា អាចប្រើរបងដើម្បីការពារហាមចូលប្រសើរជាងបំផ្លាញចោល។
ប៉ុន្តែអ្នកខ្លះទៀតបានយល់ស្របជាមួយមន្ត្រីដោយនិយាយថា៖ «បើទោះជាមានការជួសជុលក៏ដោយ ក៏មនុស្សជាច្រើននឹងប្រថុយជីវិតរបស់ពួកគេ ព្យាយាមរកផ្លូវឡើងរបងនៅទីនោះដែរ»។ ចំណែកអ្នកប្រើប្រាស់ម្នាក់ទៀត ក៏បានលើកឡើងដែរថា៖ «ទោះបីជាមើលពីខាងក្រៅ វាហាក់ដូចជាអាជ្ញាធរបានបំផ្លាញថ្មនេះប្រាកដមែន ប៉ុន្តែ វាពិតជាត្រូវបានបំផ្លាញដោយភ្ញៀវទេសចរមិនទទួលខុសត្រូវ»៕ រក្សាសិទ្ធិដោយ៖ លឹម ហុង
