នៅថ្ងៃទី១៩ ខែមិថុនា ឆ្នាំ ២០០៦ បុរសម្នាក់ឈ្មោះ ហ្លួង ជីនស៊ី រស់នៅក្នុងខេត្ត Guangxi ប្រទេសចិន បានទទួលមរណភាព បន្ទាប់ពីមានជំងឺធ្ងន់ធ្ងរមួយរយៈពេល។ ឮដំណឹងដ៏សោកសៅនេះ ប្រពន្ធឈ្មោះ លី ខុនឡាន ដែលបានឃ្លាតទៅធ្វើការឆ្ងាយពីស្រុកកំណើត ក៏ត្រឡប់មកផ្ទះវិញភ្លាមៗ ដើម្បីកាន់ទុក្ខប្តី។ អ្នកស្រី លី ខុនឡាន បាននាំកូនប្រុសទៅកាន់ផ្នូរប្តី យំស្ទើរគាំងតែម្តង!។
យោងតាមទំនៀមទម្លាប់ក្នុងស្រុក អ្នកស្រី លី ខុនឡាន ត្រូវឱនក្បាលគោរព ៣ ដង នៅមុខផ្នូរប្ដី។ អ្វីដែលនឹកស្មានមិនដល់នោះ គឺនៅពេលដែលនាងធ្វើពិធីនេះចប់ នាងហៀបនឹងក្រោកឡើង នាងក៏ស្រាប់តែបានឮសំឡេងចម្លែកមួយចេញពីដី។ កាន់តែព្រឺព្រួចទៀតនោះ គឺសូម្បីតែកូនប្រុសរបស់នាង ក៏បានឮសំឡេងនោះដែរ ហើយរូបគេស្រែកថា៖ «ម៉ាក់ឮដូចខ្ញុំទេ វាហាក់ដូចជាចេញពីផ្នូរប៉ា!»។
អ្នកស្រី លី គុនឡាន បានរំងាប់អារម្មណ៍ និងឈរស្តាប់មួយសន្ទុះ រួចយកចុចត្រចៀកទៅផ្អៀងស្តាប់ផ្ទាល់ដី ហើយពិតជាឮសំឡេងចម្លែកមែន។ នាងបានស្រែកហៅឈ្មោះប្តីដោយមិនដឹងខ្លួន ហើយតក់ស្លុតជាខ្លាំងពេលឮការឆ្លើយតបយ៉ាងច្បាស់ថា៖ «យកខ្ញុំចេញផង!»។ ពិតជារន្ធត់ចិត្តណាស់ អ្នកស្រី លី ខនឡាន ក៏រត់ទៅផ្ទះភ្លាមៗ ហើយបានស្នើសុំអ្នកភូមិជួយជីកផ្នូរប្តី។ គ្រប់គ្នាពិតជាស្រឡាំងកាំង ព្រោះស្ថានការណ៍គឺបន្ទាន់ពេក តែទោះជាយ៉ាងណា ពួកគេក៏មិនមានពេលសួរនាំច្រើន ក៏នាំគ្នាប្រញាប់ប្រញាល់ទៅជីកផ្នូរ។
បន្ទាប់ពីមឈូសត្រូវបានលើកចេញពីដី អ្នកស្រី លី ខុនឡាន ក៏បានបើកគម្របមឈូសដោយផ្ទាល់ ទាំងរំភើប និងស្រឡាំងកាំង ពេលដឹងថាប្តីពិតជានៅរស់។ ហើយភ្លាមៗនោះ អ្នកស្រី លី ខុនឡាន បានឱបប្តីរបស់នាងដែលទើបតែរស់ពីស្លាប់។
គេដឹងថា លោក ហ្លួង ជីនស៊ី និងលោកស្រី លី ខនឡាន បានរៀបការនឹងគ្នាតាមរយៈពីអ្នកផ្គូរផ្គង។ ស្ថានភាពជីវិតរបស់ប្ដីប្រពន្ធអ្នកទាំងពីរ គឺមានភាពក្រីក្រតាំងពីដើមមកម្ល៉េះ។ ក្នុងឆ្នាំ ២០០១ លោក ហ្លួង ជីនស៊ី បានធ្លាក់ខ្លួនឈឺធ្ងន់ ហើយគ្រួសារបានចំណាយលុយព្យាបាលច្រើន តែសុខភាពនៅតែមិនប្រសើរ។ ដោយសារតែភាពក្រីក្រ អ្នកស្រី លី ខនឡាន ក៏សម្រេចចិត្តត្រូវចាកចេញពីផ្ទះទៅធ្វើការឆ្ងាយពីស្រុកកំណើត ដោយឲ្យឪពុកម្តាយរបស់នាងជួយមើលថែប្តីនៅផ្ទះ។
នៅថ្ងៃនោះ ម្តាយក្មេកបានយកបាយមកឲ្យលោក ហ្លួង ជីនស៊ី ដូចសព្វមួយដង ប៉ុន្តែនឹកស្មានមិនដល់ ស្រាប់តែប្រទះឃើញកូនប្រសារដេកនៅលើគ្រែ ដៃជើងត្រជាក់ស្រិបតែម្តង។ គ្រូពេទ្យម្នាក់នៅភូមិត្រូវបានហៅទៅពិនិត្យ ក៏បានរកឃើញថា លោក ហ្លួង ជីនស៊ី លែងដកដង្ហើម ជីពចរគាត់មិនដំណើរការទៀតទេ ទើបកំណត់ថា គាត់បានលាចាកលោកហើយ។ ម្តាយក្មេកប្រញាប់ទាក់ទងហៅកូនស្រី ឲ្យមកធ្វើពិធីបុណ្យសពប្តី។
បន្ទាប់ត្រឡប់មកដល់ផ្ទះ អ្នកស្រី លី ខុនឡាន ក៏បានទៅមើលផ្នូរប្តីភ្លាមៗ ប៉ុន្តែ ពិតជានឹកស្មានមិនដល់ថា ប្តីរបស់នាងនៅមានជីវិតនៅក្នុងមឈូសនៅឡើយ។ អរគុណ ម្តាយ និងកូនប្រុស ត្រូវបានសង្គ្រោះប្តីទាន់ពេលវេលា។
គ្រូពេទ្យបានធ្វើការពិនិត្យសុខភាពរបស់ ហ្លួង ជីនស៊ី ដើម្បីស្វែងរកមូលហេតុនៃ «ការរស់ឡើងវិញ» របស់បុរសនេះ និងបានដឹងថា លោក ហ្លួង ជីនស៊ី មានជំងឺទឹកនោមផ្អែមធ្ងន់ធ្ងរ ជាតិស្ករក្នុងឈាមឡើងដល់ ៣៨.៥ ខណៈមនុស្សជាមធ្យមមានត្រឹមតែ ៥.៩ ប៉ុណ្ណោះ។ ដោយសារតែគាត់មិនបានទទួលការព្យាបាលយូរ សម្រាប់ជំងឺទឹកនោមផ្អែម រាងកាយរបស់គាត់បានធ្លាក់ចូលទៅក្នុងស្ថានភាពនៃការកង្វះជាតិទឹក ជីពចររបស់គាត់ចុះខ្សោយយ៉ាងខ្លាំង ដូច្នេះបាតុភូតនៃការស្លាប់មិនពិតបានលេចឡើង។ ការដែលលោក លួង ជីនស៊ី ភ្ញាក់ដឹងខ្លួនក្នុងមឈូស គឺដោយសារតែខ្វះអុកស៊ីហ្សែនភ្លាមៗ៕ រក្សាសិទ្ធិដោយ៖ លឹម ហុង
