ពិតជារឿងដ៏ភ្ញាក់ផ្អើលយ៉ាងខ្លាំង ក្រោយពីបានឃើញវីដេអូ ត្រូវបានចែករំលែកនៅលើប្រព័ន្ធផ្សព្វផ្សាយសង្គម ក្នុងប្រទេសវៀតណាម បានបង្ហាញស្រ្តីម្នាក់ត្រូវចោរឆក់ខ្សែក ខណៈកំពុងបោសសម្អាតផ្លូវមុខផ្ទះ តែប្រតិកម្មរបស់នាង ពិតជាធ្វើឱ្យអ្នករាល់គ្នាភ្ញាក់ផ្អើល ព្រោះថាជំនួសឱ្យការភ័យស្លន់ស្លោ ឬស្រែករកជំនួយ បែរជាស្រ្តីនោះញញឹម និងសើចស្ញាញតែម្តង ដែលធ្វើឲ្យចោរស្ទើរតែគ្រវែងខ្សែកមាសមកវិញ។
ហេតុការណ៍នេះបានកើតឡើងកាលពីថ្ងៃទី១៦ មិថុនា វេលាម៉ោង៤និង៣០នាទីរសៀល គឺនៅពេលស្រ្តីរងគ្រោះពាក់ខ្សែកមាស កំពុងបោសសំរាមមុខផ្ទះ។ តាមរយៈវីដេអូបានបង្ហាញឲ្យឃើញ ខណៈស្រ្តីនោះកំពុងបោសដី ស្រាប់តែបុរសម្នាក់ ជិះម៉ូតូមកពីខាងក្រោយ និងមកអែបឈោងដៃឆក់យកខ្សែកមាសពីករបស់គាត់ រួចបើកម៉ូតូគេចខ្លួនយ៉ាងលឿន។
ទោះជាយ៉ាងណា អាកប្បកិរិយារបស់ជនរងគ្រោះ បានទាក់ទាញការចាប់អារម្មណ៍ពីមនុស្សជាច្រើន ព្រោះតែស្រ្តីនោះពុំបានបញ្ចេញប្រតិកម្មស្រែកឆោឡោ តែបែរស្ងប់ស្ងាត់ សើចញញឹមស្ញាញ និងថែមទាំងនិយាយដាក់ចោរថា «មាសក្លែងក្លាយ» ទៀតផង។
ពិតមែនហើយ ការនិយាយបែបនេះ ត្រូវបានគេគិតថា អាចនឹងធ្វើឲ្យចោរភាគច្រើន គប់ខ្សែកត្រឡប់មកវិញ។ ប៉ុន្តែ ចោរម្នាក់នេះ នៅតែសម្រេចចិត្តយកខ្សែករបស់ស្រ្តីនោះ មិនគ្រវែងចោលឡើយ។
ក្រោយពេលកើតហេតុ ស្រ្តីរងគ្រោះបានរាយការណ៍ទៅសមត្ថកិច្ចភ្លាមៗ ដើម្បីជួយអន្តរាគមន៍ចាប់ចោរផង ដោយនាងបានបញ្ជាក់ថា ខ្សែកនេះបានទិញក្នុងតម្លៃ ២៥ លានដុង (ប្រហែល ១,០០០ ដុល្លារ)។ ក្រោយមក ប៉ូលីសក៏បានឆែកវីដេអូ CCTV ឃើញសកម្មភាពនេះមែន និងកំពុងបន្តស្រាវជ្រាវរកជនល្មើស ដើម្បីយកមកផ្តន្ទាទោសតាមច្បាប់ផងដែរ។
ស្រ្តីរងគ្រោះ បាននិយាយតាមត្រង់ថា មូលហេតុដែលរូបនាងព្យាយាមស្ងប់ស្ងាត់ និងសើចប្រាប់ចោរថា «មាសក្លែងក្លាយ» ដោយសង្ឃឹមថាចោរនឹងគ្រវែងខ្សែកមកវិញ។ តែទោះជាយ៉ាងណា នៅទីបំផុត វានៅតែត្រូវបានគេយកទៅបាត់ ពិតជាសោកស្តាយខ្លាំងណាស់!៕ រក្សាសិទ្ធិដោយ៖ លឹម ហុង
