ថ្មីៗនេះ មានអ្នកប្រើគណនី TikTok នៅប្រទេសវៀតណាម បានចែករំលែកវីដេអូឃ្លីបដ៏គួរឱ្យរន្ធត់មួយ រហូតមានការចែកចាយតៗគ្នា បង្កការភ្ញាក់ផ្អើលយ៉ាងខ្លាំង នៅពេលដែលបានឃើញ «ពណ៌បៃតង» នៅលើដើមឈើ មិនមែនជាស្លឹកធម្មតាប៉ុណ្ណោះទេ ប៉ុន្តែ វាប្រែជាសត្វអសិរពិស ដែលមិនមែនមានតែមួយក្បាលទេ គឺជាសំបុកតែម្តង។
តាមរយៈវីដេអូឃ្លីប បានបង្ហាញម្ចាស់បានថតរូបដើមឈើនៅក្នុងចំការរបស់ខ្លួន ខណៈកត់សំគាល់ឃើញ «ពណ៌បៃតង» ដ៏ចម្លែកនៅលើដើមឈើកំពុងផ្លាស់ទី។ ហើយពេលពង្រីកឱ្យកាន់តែជិត ពួកគេពិតជាភ្ញាក់ផ្អើលយ៉ាងខ្លាំង នៅពេលដឹងថាទាំងនោះគឺពស់បៃតងច្រើនសិបក្បាល។ ម្ចាស់ចំការបាននិយាយថា ពួកវាកំពុងនៅផ្តុំគ្នានៅជុំវិញដើមឈើ ប៉ុន្តែបើមើលពីចម្ងាយ គឺមិនដឹងថាជាពស់នោះទេ ព្រោះពណ៌បៃតងរបស់វាដូចគ្នាទៅនឹងស្លឹកឈើដែរ។
ទោះជាយ៉ាងណា អ្នកបង្ហោះវីដេអូមិនបានបញ្ជាក់ច្បាស់លាស់ទេថា តើពស់ប្រភេទនេះជាពស់មានពិស ហើយតើវាទៅដល់ដើមឈើនោះដោយរបៀបណា? រួមទាំងវិធីបដែលម្ចាស់នឹងត្រូវដោះស្រាយជាមួយពួកវាយ៉ាងដូចម្តេចដែរ បន្ទាប់ពីនោះ?។
វីដេអូនេះទទួលបានការចាប់អារម្មណ៍នៅលើបណ្តាញសង្គម ដែលមានអ្នកចូលមើលច្រើនជាង ១៨ លានដង ខណៈមនុស្សជាច្រើនដែលបានបង្ហាញអារម្មណ៍គួរឲ្យខ្លាចណាស់។ តែក្នុងនោះ មានមនុស្សមួយចំនួនបានឆ្ងល់ថា តើពស់ទាំងអស់នេះមកពីណា? ខ្ញុំមិនយល់ថាហេតុអ្វីបានជាមានច្រើនម្ល៉េះ ដូចជាមិនមែនជាដើមឈើ តែជា “ដើមពស់”។
យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក ពស់ពិសជាច្រើនត្រូវបានគេរកឃើញនៅក្នុងប្រទេសវៀតណាម។ ជាទូទៅប្រវែងប្រហែល ៤០ ទៅ ៦៥ សង់ទីម៉ែត្រ ដោយផ្នែកខាងក្រោយរបស់វាមានពណ៌បៃតង និងជួនកាលមានឆ្នូតពណ៌សៗពាសពេញរាងកាយ។ ពស់ពិសបែបនេះរស់នៅលើដី ឬនៅលើដើមឈើ ដើម្បីឆ្មក់ចាប់សត្វព្រៃ។ ប៉ុន្តែភាគច្រើន ពួកវាមិនវាយប្រហារមនុស្សទេ។ ប៉ុន្តែមុននេះ នៅខេត្តជាច្រើននៃប្រទេសវៀតណាម មានសេចក្តីរាយការណ៍ថា មានមនុស្សត្រូវពស់ពិសខាំ ហើយត្រូវបានបញ្ជូនទៅសង្គ្រោះនៅមន្ទីរពេទ្យផងដែរ៕ រក្សាសិទ្ធិដោយ៖ លឹម ហុង
