វីដេអូឃ្លីបមួយ ដែលបានលេចឡើងនៅលើបណ្តាញសង្គមថ្មីៗនេះ បង្ហាញបុរសវ័យចំណាស់ម្នាក់ និងស្រ្តីវ័យក្មេងម្នាក់ ដែលគេជឿថាជាឪពុកក្មេក និងកូនប្រសាស្រី បានឡើងលើក្បាលរថយន្ត និងវាយតប់ផាំងៗ នៅលើដងផ្លូវ ខណៈនៅក្នុងរថយន្តមានបុរស និងស្ត្រីមួយគូកំពុងសម្ងំ។
យ៉ាងណាមិញ តាមប្រភពវីដេអូដែលត្រូវបានបង្ហោះនៅលើបណ្តាញសង្គម កាលពីថ្ងៃទី៣០ ខែមិថុនា ឆ្នាំ២០២៣ បានបញ្ជាក់ឲ្យដឹងថា ស្ត្រីម្នាក់បានប្រទះឃើញប្តី និងស្ត្រីម្នាក់ កំពុងជិះឡានជាមួយគ្នា ស្ថិតតាមបណ្តោយផ្លូវជាតិលេខ 1A ឆ្លងកាត់ឃុំ Dien Yen ស្រុក Dien Chau ខេត្ត Nghe An ប្រទេសវៀតណាម ។ នៅពេលនោះ ស្រ្តីជាប្រពន្ធ និងសាច់ញាតិរបស់នាង បាននាំគ្នាបញ្ឈប់រថយន្ត ដើម្បីត្រូវនិយាយគ្នាអំពីរឿងលួចផិតក្បត់នេះ។
ភ្លាមៗនោះ ប្រពន្ធ និងបុរសចំណាស់ ដែលគេជឿថា ជាកូនប្រសា និងឪពុកក្មេក បានឡើងទៅលើក្បាលរថយន្ត ប៉ុន្តែ អ្នកនៅក្នុងរថយន្តនៅតែបើករថយន្ត។ ទីបំផុត បុរសជាប្តីបានចុះពីលើរថយន្ត ទាញប្រពន្ធចុះ ហើយឱ្យ «ស្រីកំណាន់» បើករថយន្តរត់គេចខ្លួន។
ទោះជាយ៉ាងណា ស្ត្រីជាស្រីកំណាន់ បានបើករថយន្ត «ដឹក» បុរសចំណាស់ជាឪពុកក្មេក នៅលើក្បាលរថយន្តតែម្តង។ អ្នកធ្វើដំណើរបានស្រែកថា ទង្វើរបស់ស្ត្រីក្នុងរថយន្តជាអំពើឃាតកម្ម ប៉ុន្តែ ស្ត្រីរូបនេះមិនអើពើ ដោយនៅតែបន្តបើករថយន្តទៅមុខ។
តាមរយៈឃ្លីប ស្រ្តីជាប្រពន្ធ និងសាច់ញាត្តិ បានដេញតាម ហើយស្ទាក់ជាថ្មី ដើម្បី «រំដោះ» បុរសជាឪពុកក្មេក ចុះពីលើក្បាលរថយន្តដោយសុវត្ថិភាព។ ទោះបីជាយ៉ាងណា បុរសជាប្តីបានចូលទៅក្នុងរថយន្តរបស់ស្រីកំណាន់ ដើម្បីបន្តដំណើរទៅមុខ។ តែខណៈពេលនោះ ប្អូនថ្លៃ ក៏បានដេញតាមសួរនាំ និងកាក់វាយរថយន្ត ហើយភាគីទាំង២ ក៏បានបន្តឈ្លោះប្រកែកគ្នា បង្កការភ្ញាក់ផ្អើលពេញផ្លូវ។
ហេតុការណ៍នេះ បានទាក់ទាញការចង់ដឹងចង់ឃើញរបស់មនុស្សជាច្រើន ដែលបណ្តាលឱ្យមានការកកស្ទះចរាចរណ៍ជាខ្លាំង នៅទីតាំងដែលរថយន្តនោះត្រូវបានបិទផ្លូវ។ អ្នកធ្វើដំណើរខ្លះណែនាំបងថ្លៃស្រីឲ្យរក្សាភាពស្ងប់ស្ងាត់ និងជៀសវាងការប្រព្រឹត្តបំពានច្បាប់។
ទោះជាយ៉ាងណា នៅទីបំផុត ស្ត្រីដែលគេសង្ស័យថាស្រ្តីកំណាន់ ដែលត្រូវបានស្រ្តីជាប្រពន្ធ និងសាច់ញាតិ ដេញវាយដោយភ្លើងប្រច័ណ្ឌ បានចូលទៅកាន់ទីស្នាក់ការគណៈកម្មាធិការប្រជាជនឃុំក្នុងតំបន់ ដើម្បីសុំ «ជ្រក» ឲ្យប៉ូលិសជួយអន្តរាគមន៍៕ រក្សាសិទ្ធិដោយ៖ លឹម ហុង
