នាង Melissa Sloan អាយុ ៤៦ ឆ្នាំ មកពីប្រទេស Wales ចក្រភពអង់គ្លេស ធ្លាប់ធ្វើការជាអ្នកសម្អាតបង្គន់ ប៉ុន្តែនាងមិនអាចរកការងារស្រដៀងគ្នានេះបានទៀតទេ ដោយសារការសាក់ជាបន្តបន្ទាប់លើមុខ និងដងខ្លួន ដែលធ្វើឲ្យម្ចាស់ទាំងអស់ មិនពេញចិត្ត ដោយបានវាយតម្លៃថា សាក់នៅលើខ្លួនប្រាណរបស់នាងអាក្រក់ខ្លាំង។
Melissa បានប្រាប់ Daily Star ថា “ខ្ញុំមិនអាចរកការងារធ្វើបានទេ ខ្ញុំបានដាក់ពាក្យសុំការងារសំអាតនៅកន្លែងដែលខ្ញុំរស់នៅ ប៉ុន្តែពួកគេមិនទទួលយកខ្ញុំ ដោយសារតែសាក់របស់ខ្ញុំ”។
ម្តាយកូនពីររូបនេះ បានបន្ថែមថា៖ «គេថា ខ្ញុំមិនដែលមានការងារជាប់លាប់ក្នុងជីវិតខ្ញុំទេ ប៉ុន្តែខ្ញុំជឿថានឹងមានមួយ វាមិនបានយូរទេ បើមានអ្នកណាផ្តល់ឲ្យខ្ញុំ ខ្ញុំនឹងទទួលនៅថ្ងៃស្អែក។ ហើយទៅធ្វើការភ្លាមៗ»។
Melissa បានចាប់ផ្តើមសាក់ដំបូងនៅអាយុ ២០ ឆ្នាំ ហើយចាប់តាំងពីពេលនោះមក នាងតែងតែចាប់អារម្មណ៍នឹងការសាក់។ នាងមានចំណាប់អារម្មណ៍ពិសេសលើការចាក់សាក់លើផ្ទៃមុខ។
ទោះបីជាមានការលំបាកក្នុងការងារក៏ដោយ ស្ត្រីជនជាតិវេលស៍រូបនេះ បានប្រាប់ The Mirror ថា នាងនៅតែទទួលបានទឹកថ្នាំថ្មីចំនួនបី រៀងរាល់សប្តាហ៍។
នាងបានប្រកាសថា “នៅអាយុ ៧០ ឆ្នាំ ខ្ញុំនឹងបន្តសាក់។ ខ្ញុំនឹងបិទបាំងរាល់ចំណុចដែលនៅសល់ ដើម្បីឱ្យរាងកាយរបស់ខ្ញុំប្រែពណ៌ខៀវ មុខរបស់ខ្ញុំក៏ប្រែទៅជាពណ៌ខៀវ ខ្ញុំនឹងមើលទៅដូចជាតុក្កតា Smurf” ។
ជាពិសេសនោះ គឺ Melissa ចូលចិត្តសាក់នៅលើមុខរបស់នាង ដោយមិនទុកឲ្យស្បែកនៅទទេ។ នាងបានសាក់បីដងនៅលើស្នាមសាក់ចាស់ៗ ដោយបង្កើតជារូបចម្លាក់ច្រើនស្រទាប់លើមុខរបស់នាង។
នាងបានប្រាប់ The Mirror ថា ការមិនមានការងារធ្វើ មិនមែនជាការលំបាកតែមួយគត់ដែលនាងជួបប្រទះនោះទេ។ នាងក៏ត្រូវបានហាមប្រាមមិនឲ្យចូល ពីហាងស្រាក្នុងស្រុក និងសាលារបស់កូនពីរនាក់របស់នាងផងដែរ ដោយសារតែស្នាមសាក់នៅលើដងខ្លួនរបស់នាង។
ទោះជាយ៉ាងណាក៏ដោយ អ្នកស្រលាញ់សាក់ដូចនាង នឹងប្រឆាំងរាល់ពាក្យចចាមអារ៉ាម ការជំទាស់ ការរើសអើង និងសូម្បីតែបណ្តាសា និងបានប្តេជ្ញាបង្កើតកំណត់ត្រាសាក់ផងដែរ។ Melissa បាននិយាយថា “ខ្ញុំចង់ក្លាយជាម្ចាស់កំណត់ត្រា ដែលនឹងធ្វើឱ្យខ្ញុំប្លែក ហើយខ្ញុំកំពុងព្យាយាមដាក់ឈ្មោះនៅក្នុងសៀវភៅកំណត់ត្រាហ្គីណេសផងដែរ”៕ រក្សាសិទ្ធិដោយ៖ លឹម ហុង
