ជឿថាប្រិយមិត្តជាច្រើន បានទទួលជ្រាបរួចហើយ ចំពោះទង្វើរបស់បុរសអ្នកលក់តាមផ្លូវដ៏មានទឹកចិត្តល្អម្នាក់ គឺខណៈកំពុងរុញរទេះលក់ដែលជឿថានៅក្នុងទីក្រុងភ្នំពេញ ស្រាប់តែបុរសនោះឃើញស្នួលហាលខោខាវនៅមុខផ្ទះមួយកន្លែង បានដួល ហើយខោអាវក៏ធ្លាក់មកដី នៅពេលនេះ គាត់ក៏បានធ្វើសកម្មភាពភ្លាមៗ ដែលធ្វើឱ្យមនុស្សជាច្រើនភ្ញាក់ផ្អើល និងកោតសរសើរយ៉ាងខ្លាំង។
វីដេអូនៃទង្វើដ៏ល្អរបស់គាត់ បានទទួលការចាប់អារម្មណ៍យ៉ាងខ្លាំង ពីសហគមន៍អ៊ីនធើរណែត ហើយថ្មីៗនេះ កាសែតជាច្រើនរបស់វៀតណាម ក៏បានយកមកចុះផ្សាយព្រោងព្រាត។
តាមវីដេអូឃ្លីបបានបង្ហាញឲ្យឃើញ ខណៈពេលដែលបុរសនោះកំពុងរុញរទេះលក់ចំណីអាហារនៅលើផ្លូវ ស្រាប់តែគាត់បានប្រទះឃើញបង្គោលស្នួលហាលខោអាវនៅមុខផ្ទះមួយ ត្រូវបានខ្យល់បោកបក់ឲ្យដួលរំលំ បណ្ដាលឱ្យខោអាវដែលទើបនឹងបោក បានធ្លាក់ទៅនឹងដី។
ដោយបារម្ភថា សម្លៀកបំពាក់ត្រូវគ្របដោយធូលីដី ឬមាននរណាម្នាក់ដើរជាន់លើដោយចៃដន្យ បុរសនោះក៏បានឈប់រទេះរបស់គាត់ ហើយប្រញាប់ទៅលើកបង្គោលស្នួល រួចរើសខោអាវដែលជ្រុះមកព្យួរនៅលើខ្សែវិញ។
យ៉ាងណាមិញ សកម្មភាពដ៏ស្រស់ស្អាតទាំងស្រុងរបស់បុរសនេះ ត្រូវបានថតដោយកាមេរ៉ាសុវត្ថិភាព។ អ្នកនិយមលេងអ៊ីនធឺណែត បន្ទាប់ពីបានទស្សនាឃ្លីបនេះហើយ បានបញ្ចេញមតិវិជ្ជមាន ដោយសរសើរទង្វើរបស់បុរសនោះថា៖ «អ្នកក្រ គឺសាមញ្ញណាស់ដែលពួកគេមិនគិតច្រើន ក្នុងការជួយបែបនេះ, គាត់ក្រទ្រព្យមែនពិត ប៉ុន្តែ ទឹកចិត្តដ៏ល្អរបស់គាត់ គឺសម្បូរហូរហៀរ។ សូមអរគុណ សូមជូនពរឱ្យអ្នកជួបតែសេចក្ដីសុខ សុខភាព សុភមង្គល ជារៀងរាល់ថ្ងៃ ដើម្បីនាំមកនូវសេចក្ដីស្រឡាញ់ និងជួយដល់មនុស្សគ្រប់គ្នា, មនុស្សល្អ ពិតជាធ្វើអំពើល្អ ជូនពរឱ្យមានសំណាងក្នុងជីវិត»៕ រក្សាសិទ្ធិដោយ៖ លឹម ហុង
