ថ្មីៗនេះ កាសែតអង់គ្លេស Daily Mail បានចុះផ្សាយព័ត៌មានលម្អិត អំពីវីដេអូឃ្លីបដ៏ទាក់ទាញការចាប់អារម្មណ៍មួយ ដែលបង្ហាញម្ចាស់ឡានម្នាក់ បានលះបង់ការខូចខាតរបស់ទ្រព្យខ្លួន បើកបំបុកម៉ូតូចោរម្នាក់យ៉ាងចាស់ដៃ ដើម្បីជួយសង្រ្គោះស្រ្តីម្នាក់ បន្ទាប់ពីត្រូវបានចោរប្លន់កាបូប។
ហេតុការណ៍នេះ ត្រូវបានដឹងថា បានកើតឡើងកាលពីថ្ងៃទី៣០ ខែមិថុនា នៅទីក្រុង Guayaquil ប្រទេស Ecuador ។ តាមរយៈឃ្លីបនៃកាមេរ៉ាសុវត្ថិភាព បានបង្ហាញឲ្យឃើញមុនពេលកើតហេតុ ស្រ្តីម្នាក់កំពុងដើរលើចិញ្ចើមផ្លូវ កាន់កាបូប ស្រាប់តែប្រទះឃើញបុរសម្នាក់ ជិះម៉ូតូក្នុងទិសដៅស្របគ្នា។ ពេលបុរសរូបនេះឃើញស្ត្រីរូបនោះភ្លាមៗ រូបគេក៏បានឈប់ម៉ូតូ រួចរត់សំដៅទៅរកស្រ្តីនោះ ដើម្បីប្លន់យកកាបូប។
ស្ត្រីរូបនេះហាក់បានដឹងពីគ្រោះថ្នាក់ដែលនឹងមកដល់ ដូច្នេះនាងក៏បានរត់ត្រឡប់ក្រោយ ដើម្បីគេចខ្លួន។ ប៉ុន្តែ ដោយកម្លាំងរបស់នាងខ្សោយ ស្ត្រីម្នាក់នេះមិនអាចទប់ទល់នឹងចោរបានឡើយ ហើយក៏ត្រូវចោរប្លន់យកកាបូបឆៅៗតែម្តង។ ទោះជាយ៉ាងណាក៏ដោយ រឿងដែលមិននឹកស្មានដល់នោះ គឺទង្វើរបស់ចោរត្រូវបានចាប់បាននៅក្នុងក្រសែភ្នែកអ្នកបើកបររថយន្តម៉ាក Chevrolet Pickup ដែលទើបតែបត់ចូលផ្លូវនេះ មកទាន់ពេលវេលា។
ស្តែងណាស់! ពេលដណ្តើមបានកាបូប ហើយឡើងជិះម៉ូតូបម្រុងរត់គេចខ្លួន ស្រាប់តែរថយន្តភីកអាប់ដែលបានបត់ឆ្វេងចូលមក បានបើកទៅបំបុកម៉ូតូចោរមួយទំហឹង ដែលបណ្តាលឱ្យចោរនោះដួលទៅនឹងដី ហើយកាបូបក៏បានជ្រុះពីដៃផងដែរ។
តាមរយៈវីដេអូ ក៏បានបង្ហាញអ្នកបើកបរបានព្យាយាមបើកបំបុកយ៉ាងពេញៗទំហឹង បណ្តាលឲ្យទាំងម៉ូតូ និងម្ចាស់ជាចោរ ត្រូវផ្ទប់ទៅនឹងខឿនថ្មចិញ្ចើមផ្លូវចំនួន ៣ លើក។ ចំណែក ស្រ្តីរងគ្រោះក្នុងអំពើប្លន់នេះ ព្រោះតែមានការភិតភ័យខ្លាំងពេក ក៏បានរត់ទៅចិញ្ចើមផ្លូវម្ខាងទៀត។
ទោះជាយ៉ាងណា ក្រោយបុកលើកទី៣ ហាក់រាងធ្ងន់ដៃ គិតថាម៉ូតូប្រហែលលែងឆេះ អ្នកបើកបររ ក៏បានបើកថយន្តបង្ហួសបន្តិច ដោយទុកពេលឲ្យលោកចោរលើកម៉ូតូឡើង។ ប៉ុន្តែ ដោយសារឃើញចោរអាចជិះម៉ូតូបាន នៅពេលនោះ អ្នកបើកបររថយន្តមិនលើកលែងទោស បានបើករថយន្តថយក្រោយក្នុងល្បឿនយ៉ាងលឿន ដើម្បីដេញតាមបំបុកទៀត។ តែដោយសារចោរប្លន់នោះភ័យខ្លាចខ្លាំង បានបង្កើនល្បឿន បើករត់គេចខ្លួនបាត់ស្រមោលទាំងព្រលឹងចុងសក់ បន្សល់ទុកកាបូបនៅនឹងកន្លែង។
បន្ទាប់បានឃើញឡានបានចេញតាមចោរ ស្ត្រីរងគ្រោះក៏បានប្រញាប់ប្រញាល់ឆ្លងផ្លូវ រត់ទៅយកកាបូបរបស់នាង។ វីដេអូនេះក៏បង្ហាញពីអ្នកបើកបររថយន្តភីកអាប់ ត្រឡប់មកកន្លែងកើតហេតុវិញ និងទទួលបានការថ្លែងអំណរគុណយ៉ាងរំជួលចិត្តពីស្ត្រីនោះ។
ក្រោយពេលកើតហេតុ អ្នកបើកបររថយន្ត ត្រូវបានគេស្គាល់ឈ្មោះ Fidel Valarezo ។ អ្នកនិយមលេងអ៊ីនធឺណិតបានកោតសរសើរចំពោះភាពក្លាហាន និងការលះបង់របស់ Fidel ព្រមទាំងការថ្លែងសរសើរពីទង្វើមនុស្សធម៌របស់គាត់ផងដែរ។
ចែករំលែកជាមួយសារព័ត៌មាន លោក Fidel បាននិយាយថា «តាមពិតទៅ ស្ត្រីនោះមិនមានជាសាច់ញាតិរបស់ខ្ញុំទេ តែខ្ញុំចង់ជួយនាង ហើយក៏ចង់បង្រៀនដល់ចោរដ៏ទៃនូវមេរៀនមួយនេះ»៕ រក្សាសិទ្ធិដោយ៖ លឹម ហុង
