វីដេអូមួយ ដែលទើបត្រូវបានចែករំលែកនៅលើបណ្តាញសង្គម TikTok កាលពីពេលថ្មីៗនេះ បង្ហាញរថយន្ត Corolla មួយគ្រឿង បើកឆ្លងផ្លូវចូលវត្ត ទាំងប្រថុយគ្រោះថ្នាក់ ប្រហែលខ្លាចប៉ូលិសនៅខាងមុខ ដែលឃើញហើយពិតជាគួរឲ្យហួសចិត្តខ្លាំងតែម្តង។
តាមរយៈវីដេអូនៃរថយន្តខាងក្រោយ ដែលបានកត់ត្រាពីករណីនេះ នៅវេលាម៉ោង ៩ និង១៩ នាទី ថ្ងៃទី២៧ ខែកក្កដា ឆ្នាំ២០២៣ បានបង្ហាញរថយន្ត Corolla ១គ្រឿង បានបើកយឺតៗ ខណៈវ៉ៃស៊ីញ៉ូឆ្វេងពីចម្ងាយ នៅត្រង់ចំណុចផ្លូវដាច់ក្បែរវត្តមួយកន្លែង ដែលត្រូវបានដឹងថាស្ថិតនៅតាមបណ្តោយផ្លូវជាតិលេខ១។ ហើយភ្លាមៗនោះ ស្រាប់តែរថយន្ត Corolla បើកឆ្លងផ្លូវ ខណៈកុងតឺន័រចូលមកដល់ ចាប់ហ្រ្វាំងសឹងតែមិនទាន់ ដែលឃើញហើយពិតជាគួរឲ្យស្រៀវជំនួសយ៉ាងខ្លាំង។
តែអ្វីដែលគួរឲ្យភ្ញាក់ផ្អើលខ្លាំងនោះ គឺបន្ទាប់គេចពីកុងតឺន័រ រថយន្ត Corolla ក៏បានបត់ចូលក្នុងវត្តយ៉ាងរំភើយ ខណៈប៉ូលិសដែលដាក់គោលដៅនៅមុខច្រកចូលវត្ត បានត្រឹមឈរមើលស្រឡាំងកាំង រកថ្លែងមិនចេញ។
ទោះជាយ៉ាងណា មិនដឹងថា រថយន្ត Corolla បើកប្រថុយគ្រោះថ្នាក់បែបនេះ ព្រោះតែខ្លាចប៉ូលិស ឬចូលវត្តធ្វើបុណ្យនោះទេ ខណៈមហាជនជាច្រើន បានសម្តែងការហួសចិត្តថា៖ «ព្រោះតែចង់គេចប៉ូលិស បើកឡានទាំងប្រថុយជីវិតបែបនេះ សំណាងហើយ អាធំមកពីមុខ ចេះបន្ថយល្បឿនទាន់ កុំអីខ្ទេច, ខ្លាចប៉ូលិស 99% ចេះច្បាប់1%, ពូប៉ូលីសឈរមើលអស់វាចារ,…»៕ រក្សាសិទ្ធិដោយ៖ លឹម ហុង
