នៅថ្ងៃទី៣១ ខែកក្កដា ឆ្នាំ២០២៣ គេហទំព័រ ETtoday ចុះផ្សាយករណីដ៏គួរឲ្យចាប់អារម្មណ៍មួយ ពីការបង្ហោះរបស់ស្ត្រីម្នាក់ឈ្មោះ Nancy Walsh ដែលជាភ្នាក់ងារអចលនទ្រព្យនៅរដ្ឋ South Carolina សហរដ្ឋអាមេរិក ដោយនាងបានព្រមានថា ខណៈពេលកំពុងបើកបរទាំងកណ្តាលយប់ បើជួបស្ថានភាពដូចនេះ ហាមចុះចេញពីឡានជាដាច់ខាត ព្រោះអាចចូលក្នុង «អន្ទាក់» របស់ក្រុមចោរប្លន់។
ការបង្ហោះនេះទទួលបានការចាប់អារម្មណ៍យ៉ាងខ្លាំង ដោយត្រូវបានចែករំលែក 120,000 ដង និងចូលចិត្ត 44,000 ដង។ Nancy បានរៀបរាប់ឲ្យដឹងថា នាងបានចតឡានរបស់នាងនៅកណ្តាលផ្លូវ ខណៈភ្លើងចង្កៀងមុខរបស់រថយន្ត បានជះពន្លឺឲ្យឃើញរទេះរុញកូនក្មេងមួយយ៉ាងច្បាស់ ដែលត្រូវបានគេយកមកនៅក្បែរផ្លូវស្ងាត់មួយកន្លែង ដោយមិនអាចដឹងថាមានក្មេងនៅខាងក្នុង ឬគ្រាន់តែជារទេះរុញទទេនោះទេ។
វាជាខណៈដ៏គួរឲ្យសង្វេគចិត្តណាស់ Nancy ពិតមានការព្រួយបារម្ភថា អាចទារកនឹងត្រូវបានទុកឱ្យនៅក្នុងរទេះរុញម្នាក់ឯង។ ហើយនៅក្នុងគ្រោះថ្នាក់ដំបូង នាងគិតថា នាងត្រូវប្រញាប់ចុះទៅជួយ ប៉ុន្តែទន្ទឹមនឹងនោះ នាងបានគិតថា វាអាចជាការ «ឆបោក» ដោយក្រុមចោរ។ ប្រសិនបើនាងចុះក្រោម នាងអាចជាជនរងគ្រោះផងដែរ។
ទោះជាយ៉ាងណា ជម្រើសដ៏ល្អរបស់នាង គឺប្រញាប់ហៅអ្នកសង្គ្រោះបន្ទាន់ និងប៉ូលិសឱ្យចូលមកជួយពិនិត្យមើល។ ក្នុងពេលនោះ នាងបានចាក់សោរថយន្តយ៉ាងតឹងរ៉ឹង។ ហើយនាង និងគ្រួសារ អង្គុយរង់ចាំពួកគេក្នុងឡាន។
Nancy បាននិយាយថា «ប្រសិនបើអ្នកឃើញរទេះរុញ ឬស្ថានភាពដែលទាក់ទងនឹងកុមារផ្សេងទៀតទុកចោលតែម្នាក់ឯងបែបនេះ និងមិនអាចទៅជួយបាន សូមកុំចេញទៅក្រៅ សូមរក្សាសុវត្ថិភាពទាំងអស់គ្នា»។ ទោះជាយ៉ាងណា នាងពុំបានបញ្ជាក់ថា នៅក្នុងរទេះរុញនោះ មានកូនក្មេងនោះទេ។
ក្រោយការបង្ហោះព្រមានរបស់ Nancy ត្រូវបានគេចែករំលែក ឃើញថាមានមនុស្សជាច្រើន បានយល់ស្រប និងថានាងប្រុងប្រយ័ត្នបែបនេះ គឺត្រឹមត្រូវហើយ ដោយគេជឿដែរថា ករណីនេះ អាចជាចេតនាបង្កើតជាអន្ទាក់ប្រើរទេះរុញជានុយ ពីសំណាក់មនុស្សអាក្រក់ ដែលនឹងលាក់ខ្លួននៅក្នុងគុម្ពោតព្រៃ រង់ចាំប្លន់រថយន្តយើងតែម្តង៕ រក្សាសិទ្ធិដោយ៖ លឹម ហុង
