ទ្រព្យរបស់យើងមិនថាជាអ្វីក៏ដោយ គួរតែត្រូវមានការប្រយ័ត្នជាមុន ចំពោះការខ្ចី ព្រោះមិនថាអ្នកនោះស្និទ្ធស្នាល ឬគួរឲ្យទុកចិត្តយ៉ាងណាក៏ដោយ ប្រសិនបើមានការខូចខាតមិនទទួលខុសត្រូវ នោះនឹងបានត្រឹមធ្វើឲ្យខកចិត្តប៉ុណ្ណោះ។ តួយ៉ាងណា ដូចក្នុងករណីនេះ ដែលបុរសម្នាក់អនុញ្ញាតឱ្យសាច់ញាតិមិត្តស្រីរស់នៅដោយឥតគិតថ្លៃ រយៈពេល ២ឆ្នាំ ហើយលទ្ធផលទទួលបាននូវការចងចាំពេញមួយជីវិត។
នៅថ្ងៃទី២៤ ខែកក្កដា ឆ្នាំ២០២៣ អ្នកប្រើប្រាស់ហ្វេសប៊ុកឈ្មោះថា Boat Land បានបង្ហាញបន្ទប់របស់គាត់ គឺពោរពេញដោយសំរាម ដែលភាគច្រើនជាប្រអប់អាហារ ដបទឹក និងកញ្ចប់អាហារសម្រន់ផ្សេងៗ ពោលគឺសឹងតែគ្មានកន្លែងទំនេរនោះទេ។ ហើយអ្វីដែលគគ្រេចខ្លាំងបំផុតនោះ គឺមានសំឡីអនាម័យប្រើរួច នៅក្នុងគំនរសំរាម ដែលឃើញហើយរកថ្លែងពុំចេញនោះទេ។
អ្វីដែលធ្វើឲ្យបុរសជាម្ចាស់ផ្ទះ កាន់តែឈឺចាប់ទៀតនោះ គឺថាអ្នកដែលមកស្នាក់នៅ គឺជាសាច់ញាតិរបស់មិត្តស្រីរបស់គាត់តែម្តង។ ហេតុការណ៍នេះ បានកើតឡើងកាលពីថ្ងៃទី១៧ ខែកក្កដា នៅពេលគាត់បានទៅបើកបន្ទប់ដើម្បីសម្អាត ក៏បានរកឃើញសោមួយដែលព្យួរចោល ហើយបានប្រទះឃើញរូបភាពដ៏គួរឱ្យរន្ធត់បែបនេះ បន្ទាប់ពីសាច់ញាតិមិត្តស្រី បានរើចាកចេញទៅបាត់នៅថ្ងៃទី១៦ កក្កដា។
បុរសនោះបាននិយាយថា «អ្វីដែលខ្ញុំឃើញពិតជាខ្លោចចិត្តណាស់ មិនដឹងថាពួកគេជាមនុស្សប្រភេទអ្វី ដែលហូបចុក ដេក រស់នៅជាមួយសំរាម និងក្លិនស្អុយបែបនេះ។ ពួកគេមិនទទួលខុសត្រូវនូវអ្វីដែលពួកគេបានធ្វើ។ របស់របរនៅក្នុងបន្ទប់ត្រូវតែបោះចោលទាំងអស់»។
បុរសនោះ ក៏បានឲ្យដឹងទៀតថា «អស់រយៈពេល២ឆ្នាំមកនេះ ខ្ញុំមិនដែលឲ្យបង់ថ្លៃជួលទេ។ តើផ្ទះនេះសម្រាប់ឲ្យអ្នករស់នៅហ្វ្រ៊ី ហើយធ្វើបែបហ្នឹងមែន ។ ខ្ញុំបានព្យាយាមសួរនាំ ប៉ុន្តែ ពួកគេមិនបានឆ្លើយតបនោះទេ»។
ក្រោយឃើញបែបនេះ អ្នកនិយមលេងអ៊ីនធឺណិត បានសម្ដែងការអាណិតដល់បុរសជាម្ចាស់ផ្ទះជាខ្លាំង។ ក្នុងនោះ គេឆ្ងល់ថា តើពួកគេជាមនុស្សប្រភេទណា ដែលរស់នៅក្នុងបន្ទប់ជាមួយគំនរសម្រាមដ៏កខ្វក់បែបនេះ?។ ជាមួយគ្នានេះ មនុស្សមួយចំនួនក៏បានណែនាំម្ចាស់ផ្ទះ ត្រូវតែទាមទារសំណងសម្រាប់ការជួសជុលបន្ទប់ ដើម្បីកុំឲ្យទម្លាប់ដ៏អាក្រក់នេះ «ឆ្លង» ទៅអ្នកដទៃទៀត៕ រក្សាសិទ្ធិដោយ៖ លឹម ហុង
