នេះជារឿងមួយដ៏ញាក់សាច់ និងមិននឹកស្មានដល់ គ្រាដែលបុរសជាម្ចាស់ម្នាក់ ត្រូវមាន់ជល់របស់ខ្លួន ចាក់ត្រូវ១ផ្លែដែក បណ្តាលឲ្យរងរបួសយ៉ាងដំណំ ធ្វើឲ្យភ្ញាក់ផ្អើលពេញ «ពហុកីឡាដ្ឋាន» ជល់មាន់តែម្តង។
វីដេអូនៃហេតុការណ៍ដ៏កម្រនេះ ត្រូវបានចែករំលែកព្រោងព្រាត នៅលើបណ្តាញសង្គម កាលពីពេលថ្មីៗនេះ ខណៈដែលគេជឿថា វាបានកើតឡើងអាចនៅសង្វៀនជល់មាន់ដ៏ធំមួយ នៅក្នុងប្រទេសឥណ្ឌូណេស៊ី។
តាមរយៈវីដេអូដ៏រន្ធត់ ដែលថតដោយអ្នកទស្សនា បានបង្ហាញនៅមុនពេលកើតហេតុ គេបានឃើញម្ចាស់ទាំងពីរ បានលើកមាន់ជល់ «ជ្រល» ដាក់គ្នា។ ប៉ុន្តែ អ្វីដែលមិននឹកស្មានដល់នោះ គឺបន្ទាប់ពីម្ចាស់ព្រលែងភ្លាម ស្រាប់តែមាន់នោះដែលប្រហែលខ្លាចគូប្រកួតរបស់វា បានរត់ដេញតាមម្ចាស់តែម្តង។
នៅពេលនោះ បុរសជាម្ចាស់ ក៏បានព្យាយាមចាប់ ប៉ុន្តែ មិននឹកស្មានត្រូវមាន់របស់ខ្លួនលោតចាក់ត្រូវចំជើងស្តាំ មិនដឹងថាត្រូវជាមួយ «ផ្លែកដែក ឬផ្លែឡាម» នោះទេ ដែលបណ្តាលឲ្យហូរឈាមដូច «អារកមាន់» អ៊ីចឹង។ តែយ៉ាងណា ភ្លាមៗនោះ គេក៏បានឃើញបុរសម្នាក់ ប្រញាប់យកបង់មករុំជើងរបួសម្ចាស់មាន់នោះ ដែលកំពុងហូរឈាមដក់ថ្លុក ប្រហែលដាច់សរសៃធ្ងន់ធ្ងរ៕ រក្សាសិទ្ធិដោយ៖ លឹម ហុង
