បុរសម្នាក់ឈ្មោះ Mehmet Candan មកពីទីក្រុង Aksehir ប្រទេសទួរគី ត្រូវបានដឹងថា បានកំពុងធ្វើដំណើរទៅទិញគ្រឿងជាមួយប្រពន្ធរបស់គាត់ឈ្មោះ Fadime Candan និងកូនស្រីឈ្មោះ Almina Gunay Candan ។ ប៉ុន្តែ អ្វីដែលរន្ធត់ខ្លាំងនោះ គឺខណៈពេលគ្រួសារនេះ កំពុងដើរនៅលើផ្លូវដើរចិញ្ចើមផ្លូវសុខៗ ស្រាប់តែផ្ទាំងថ្មមួយបានធ្លាក់ពីលើ ត្រូវចំឪពុក និងកូនស្រី បណ្តាលឲ្យរងរបួសធ្ងន់ធ្ងរគួរឲ្យអាសូរ។
យោងតាមរបាយការណ៍ “ទូរទស្សន៍ NTV” របស់ប្រទេសទួរគី បានឲ្យដឹងថា គ្រោះថ្នាក់នេះបានកើតឡើងនៅថ្ងៃទី២ ខែសីហា នៅពេលដែលសមាជិកទាំងបីនាក់នៃគ្រួសាររបស់ Mohamed កំពុងដើរនៅលើចិញ្ចើមផ្លូវ។ រំពេចនោះ គេបានកត់សម្គាល់ឃើញលោក Mohamed បានដឹងភ្លាមៗ ហើយគាត់ក៏បានងាកស្រវ៉ាមកឱបការពារកូនស្រីរបស់គាត់ ប៉ុន្តែ គេចមិនទាន់ ត្រូវផ្ទាំថ្មនោះធ្លាក់ចុះមកយ៉ាងលឿន ចំពីលើឪពុកនិងកូនស្រីយ៉ាងពេញទំហឹង បណ្តាលឲ្យដេកដួលទៅនឹងដី ខណៈស្រ្តីជាប្រពន្ធបានស្ទុះទៅលើកកូនស្រីយ៉ាងលឿន។
ឃើញស្ថានភាពបែបនេះ ប្រជាពលរដ្ឋផ្សេងទៀត ក៏បានប្រញាប់ប្រញាល់រត់មកជួយ ហើយបញ្ជូនទៅឪពុក និងកូនស្រី ទៅកាន់មន្ទីរពេទ្យរដ្ឋ Aksehir ដើម្បីសង្គ្រោះ ប៉ុន្តែ ដោយសាររបួសធ្ងន់ធ្ងរ គេក៏បានបញ្ជូនបន្តទៅកាន់មន្ទីរពេទ្យ Melam ។ លោក Muhammad ត្រូវបានរងរបួសបាក់ឆ្អឹងខ្នង និងឆ្អឹងជំនី ខណៈកូនស្រី Almina រងរបួសធ្ងន់នៅត្រង់ដៃ និងជើង ដែលអាចពិការភាពអស់មួយជីវិត។
ផ្ទាំងថ្មនោះ ត្រូវបានដឹងថា បានធ្លាក់ពីជាន់ទី៤ នៃអគារមួយនៅជាប់នឹងចិញ្ចើមផ្លូវកន្លែងកើតហេតុ ប៉ុន្តែរបាយការណ៍មិនបានពន្យល់ ពីមូលហេតុនៃឧបទ្ទវហេតុនេះទេ តែគេជឿថា អាចបណ្តាលមកពីគ្រោះមហន្តរាយ៕ រក្សាសិទ្ធិដោយ៖ លឹម ហុង
