ដូចដែលបានដឹងស្រាប់ហើយថា ព្រោះតែចង់ចំណេញ កុំឲ្យខាតជើង ម្ចាស់រថយន្តដឹកទំនិញភាគច្រើន តែងតែមានទម្លាប់ផ្ទុកអ៊ីវ៉ាន់ លើសៗចំណុះ ឡើងសំពីងសំពោង ឬអាចនិយាយថាស្ទើរកប់ៗពពកតែម្តង ដោយមិនខ្វល់ពីការបង្កឲ្យមានគ្រោះថ្នាក់កើតឡើងនោះទេ និងអាចធ្វើអាចចរាចរណ៍ទៅមុខយ៉ាងរលូន មិនរំខានដល់សមត្ថកិច្ចឡើយ។
តែអ្វីដែលធ្វើឱ្យភ្ញាក់ផ្អើលខ្លាំងនោះ គឺថាថ្មីៗនេះ (នៅពីថ្ងៃទី២៧ ខែសីហា ឆ្នាំ២០២៣) អ្នកប្រើប្រាស់ TikTok មួយបានបង្ហោះឃ្លីប ពេលកំពុងបើកបរលើដងផ្លូវ បានប្រទះឃើញចៃចន្យ ខណៈរថយន្តភីកអាប់ស៊េរីចាស់២គ្រឿង បានដឹកផ្ទុករយន្តទំនើបៗ៤គ្រឿង ដ៏មិនធម្មតា និងភ្ជាប់ចំណងជើងថា «ខ្ញុំសុំចុះចាញ់ហើយ!»។
ជាក់ស្តែង តាមរយៈវីដេអូបានបង្ហាញរថយន្តភីកអាប់ចាស់២គ្រឿង ដោយ១គ្រឿង បានផ្ទុករថយន្តទំនើប (ដាក់បន្តុបជាន់លើគ្នា) រហូត២គ្រឿង ខណៈបើកបរយឺតៗនៅកណ្តាលដងផ្លូវ។ ហេតុការណ៍នេះ បានធ្វើឲ្យមានការភ្ញាក់ផ្អើល និងការងឿងឆ្ងល់យ៉ាងខ្លាំង ពីអ្នកនិយមលេងអ៊ីនធើរណែត។ ក្នុងនោះ គេបានដាក់ជាសំណួរថា ឡានដឹកឡានបែបនេះ ម៉េចក៏អាចឆ្លងផុតប៉ុស្តិ៍ប៉ូលិសបាន??។
ទោះជាយ៉ាងណា មនុស្សមួយចំនួនមិនជឿថា រូបភាពកើតឡើងពិតៗ បានកើតឡើងក្នុងប្រទេសថៃនោះទេ។ តែបន្ទាប់មក អ្នកបង្ហោះបានបញ្ជាក់ថា ហេតុការណ៍នេះបានកើតឡើងនៅក្នុងប្រទេសជិតយើង (ថៃ) ធ្វើឲ្យមនុស្យជាច្រើនសើចចំអកដាក់គ្នា ពេញបណ្តាញសង្គមតែម្តង៕ រក្សាសិទ្ធិដោយ៖ លឹម ហុង
