កាលពីពេលថ្មីៗនេះ វីដេអូរីករាលដាលមួយ ពីហាងសាឡនមួយកន្លែងក្នុងប្រទេសចិន ដែលបង្ហាញឱ្យឃើញជាងជាបុរសសង្ហារៗ មិនពាក់អាវបញ្ចេញសាច់សខ្ចី ទទួលភ្ញៀវនារីៗ តែបញ្ចប់ដោយឈាមច្រមុះ បានធ្វើឲ្យមានការភ្ញាក់ផ្អើល និងចង់ដឹងយ៉ាងខ្លាំង ពីសំណាក់អ្នកនិយមលេងអ៊ីនធើរណែត។
យោងតាមសារព័ត៌មាន China Press បានឱ្យដឹងថា បន្ទាប់ពីវីដេអូឃ្លីបនេះបានផ្ទុះឡើង ហាងកែសម្ផស្ស នៅក្នុងស្រុក Wuhua នៃទីក្រុង Kunming ប្រទេសចិន បានស្ថិតនៅក្រោមការស៊ើបអង្កេត ដោយអាជ្ញាធររបស់ប្រទេស។
វីដេអូឃ្លីបបានបង្ហាញឲ្យឃើញបុរសម្នាក់គ្មានអាវទាំងស្រុង និងម្នាក់ទៀតពាក់អាវអៀម កំពុងបម្រើសេវាកម្មដល់អតិថិជនស្រីៗ។ តែទន្ទឹមនឹងនោះ វីដេអូក៏បង្ហាញស្រ្តីម្នាក់ ស្រាប់តែបានហូរឈាមច្រមុះ អំឡុងពេលធ្វើក្រចកដៃ ដោយពុំដឹងមានរឿងហេតុអ្វីនោះទេ។
ទោះជាយ៉ាងណា ឆ្លើយតបនឹងសំណួររបស់សារព័ត៌មានចិនដីគោក ហាងកែសម្ផស្សនោះ បានប្រាប់ឲ្យដឹងថា ហាងរបស់ខ្លួនបើកដំណើរការធម្មតាទេ ហើយវីដេអូនេះត្រូវបានគេថតជារឿងកំប្លែង សម្រាប់ផ្សព្វផ្សាយពាណិជ្ជកម្មប៉ុណ្ណោះ។
ពួកគេក៏បានបញ្ជាក់ថា បុរសម្នាក់ក្នុងចំណោមបុរសដែលបង្ហាញក្នុងវីដេអូ តាមពិតគឺជាកូនជាងនៅហាងសាឡន និងបុរសទីពីរជាមិត្តភ័ក្តិរបស់គាត់។ ចំណែកអតិថិជនស្រីដែលមាន «ឈាមច្រមុះ» ជាបុគ្គលិករបស់ហាងផងដែរ។
សារព័ត៌មាន China Press បានដកស្រង់សម្តីអ្នកនាំពាក្យរបស់អាជ្ញាធរស្រុក Wuhua ដែលបាននិយាយថា ពួកគេបានចាប់ផ្តើមការស៊ើបអង្កេតនេះ គឺបន្ទាប់ពីបានទទួលពាក្យបណ្តឹងពីអ្នកប្រើប្រាស់៕ រក្សាសិទ្ធិដោយ៖ លឹម ហុង
