ទឹកជំនន់បានប៉ះពាល់ដល់តំបន់ជាច្រើន និងបណ្តាលឲ្យមនុស្សជាច្រើនជាប់គាំងនៅក្នុងរថយន្តរបស់ពួកគេ ខណៈច្រកចូលនៃអគារជាច្រើន ក៏មិនអាចចូលទៅដល់បានដែរ នៅពេលដែលតំបន់ទាំងនោះលិចទឹក។ ថ្មីៗនេះ ប្រព័ន្ធផ្សព្វផ្សាយហុងកុង បានរាយការណ៍ព័ត៌មានលម្អិត អំពីស្ថានភាពទឹកជំនន់ក្នុងទីក្រុងហុងកុង ដោយបង្ហាញពីការងារជួយសង្គ្រោះរបស់អាជ្ញាធរ។
យ៉ាងណាមិញ វីដេអូដ៏ពិសេសមួយ ឃើញថាទទួលបានការចាប់អារម្មណ៍ជាខ្លាំង ពីសំណាក់អ្នកនិយមលេងអ៊ីនធឺណិត។ នោះគឺខណៈពេលដែលនារីម្នាក់នៅទីក្រុងហុងកុង បានបង្ហាញទឹកមុខដ៏រំភើប និងញញឹមយ៉ាងផ្អែមល្ហែម បន្ទាប់ពីត្រូវអ្នកពន្លត់អគ្គីភ័យម្នាក់ បានជួយសង្គ្រោះនាងចេញពីឡានរបស់នាង ដែលជាប់ក្នុងទឹកជំនន់។
ជាមួយនឹងទឹកមុខញញឹមយ៉ាងរីករាយ នាងក៏ត្រូវបានគេមើលឃើញបានយកដៃរបស់នាងឱបរបស់អ្នកពន្លត់អគ្គីភ័យ ហើយថែមទាំងបានយកជើងរបស់នាង ក្រសោបចង្កេះរបស់គាត់ទៀតផង។ ទោះជាយ៉ាងណា វាមិនមែនជារឿងអ្វីត្រូវខ្មាសអៀននោះទេ គឺនាងឱបអ្នកពន្លត់អគ្គីភ័យប្រៀបដូចគូស្នេហ៍បែបនេះ ក៏ព្រោះតែនាងសប្បាយចិត្តខ្លាំង បន្ទាប់ពីត្រូវបានជួយសង្គ្រោះរួចផុតពីគ្រោះថ្នាក់ នៅក្នុងគ្រោះមហន្តរាយធម្មជាតិមួយនេះ។
ទន្ទឹមនឹងនោះ អ្នកនិយមលេងអ៊ីនធឺណេតហុងកុងជាច្រើន បានបញ្ចេញមតិលេងសើចថា៖ “បងស្រី បងកំពុងឱបប្តីអ្នកផ្សេងហើយ!”, “នាងមើលទៅសប្បាយចិត្តណាស់ ដែលបានឱបអ្នកពន្លត់អគ្គីភ័យ!”, “មិនងាយមានពេលវេលាបែបហ្នឹងទេ ពិតជាអស្ចារ្យណាស់ ស្រីស្អាត!”….៕ រក្សាសិទ្ធិដោយ៖ លឹម ហុង
